ᐃᖕᒥᓂᒃ ᐋᓐᓂᖅᑐᐃᖃᑦᑕᕐᓂᖅ ᖃᓄᐃᓕᐅᕈᑕᐅᒐᓱᐊᕈᓐᓇᖅᑐᖅ ᐊᑲᐅᖏᓕᐅᕈᑕᐅᔪᓄᑦ.

PT_3611

ᐃᑲᔪᕐᓂᖃᕈᓐᓇᖅᑐᒃᓯᐅᔪᖅ ᓴᕿᑎᑦᑎᖃᑦᑕᕐᓂᖅ ᐅᖃᐅᓯᕆᔪᓐᓇᐃᓪᓕᓯᒪᔭᑎᑦ ᐅᖃᐅᓯᒃᑯᑦ, ᐃᓄᓰᑦ ᓇᓃᓕᕐᓂᖓᓂᒃ ᐃᓱᒪᒋᔭᖃᕈᓐᓃᖃᐃᓐᓇᕈᓐᓇᕐᓂᖅ ᐅᕝᕙᓗᓐᓃᑦ ᓴᖁᑦᑎᔪᓐᓇᕐᓂᖅ ᐃᓗᒃᑯᑦ ᐃᖕᐱᖕᓂᐊᔭᕐᓂᒃ ᐋᓐᓂᐊᕆᔭᕐᓂᒃ. ᑭᖑᓂᐊᒍᑦ, ᓴᐃᒻᒪᕐᔫᒥᓂᐊᖅᑐᑎᑦ−ᕿᓚᒥᑯᓘᒐᓗᐊᖅᐸᑦ. ᑭᓯᐊᓂ ᑕᐃᒃᑯᐊ ᐋᓐᓂᕐᓇᖅᑐᑦ ᐃᒃᐱᒋᕙᒃᑕᑎᑦ ᐅᑎᕐᒥᔪᒍᑎᒃ, ᐃᖕᓕᓂᒃ ᐋᓐᓂᖅᓯᒪᒃᑲᓐᓂᕈᒪᑐᐃᓐᓇᕆᐊᖃᖅᐳᑎᑦ. ᓄᖃᕈᒪᒍᕕᑦ, ᑭᓯᐊᓂ ᖃᓄᖅ ᓄᖃᕈᓐᓇᕐᓂᖅ ᖃᐅᔨᒪᖏᒃᑯᕕᑦ, ᐅᓇ ᐃᖅᑲᐅᒪᓂᐊᖅᐸᐃᑦ: ᐱᐅᓂᖅᓴᓂᒃ ᐃᒃᐱᒋᔭᐅᖃᑕᐅᔭᕆᐊᖃᕐᒥᒐᕕᑦ, ᑕᐃᑯᖓᑦᑕᐅᖅ ᑎᑭᐅᑎᔪᓐᓇᕐᒥᔪᑎᑦ ᐃᓕᖕᓂᒃ ᐊᓐᓂᖅᓯᖏᓪᓗᑎᑦ.

ᑐᑭᓯᐅᒪᓂᖅ ᖕᒥᓂᒃ ᑭᓕᖅᓯᕙᖕᓂᖅ ᐊᒻᒪᓗ ᐃᖕᒥᓂᒃ ᐋᓐᓂᖅᑐᐃᕙᖕᓂᖅ

ᐃᖕᒥᓃᒃ ᐋᓐᓂᖅᓯᕙᓕᕐᓂᖅ ᐱᐅᓯᕆᔭᐅᕙᒃᑭᕗᖅ ᓴᕿᑎᑦᑎᓂᕐᒧᑦ ᖃᓄᐃᓕᐅᕈᑎᖃᕆᐊᖃᕈᒪᓂᕐᒧᓪᓗ ᐃᓗᑐᔪᒥᒃ ᐃᓗᒃᑯᑦ ᐊᒃᓱᕈᕐᓇᖅᑐᒃᑰᕈᑎᖃᕐᓂᕐᒧᑦ ᐊᒻᒪᓗ ᐋᓐᓂᐊᕈᑎᖃᕐᓂᕐᒧᑦ. ᐊᑑᑎᖃᖏᑦᑎᐊᖅᑐᔮᕋᓗᐊᖅᑎᓪᓗᒍ ᑕᒪᓐᓇ ᐊᓯᒥᓄᑦ, ᐃᖕᒥᓂᒃ ᐋᓐᓂᖅᓯᓕᖃᑦᑕᕐᓂᖅ ᐃᓗᒃᑯᑦ ᐱᐅᓯᕚᓪᓕᕈᑕᐅᕙᖕᒥᔪᖅ ᑕᐃᒃᑯᓄᖓ. ᐊᓪᓚᓘᓐᓃᑦ, ᐃᓱᒪᖃᓕᕈᓐᓇᖅᑐᑎᑦ ᐊᓯᐊᒎᕐᕕᑦᓴᐃᕈᑎᓯᒪᓂᕐᒥᒃ. ᐃᓕᓐᓂᒃ ᐊᓐᓂᖅᓯᒪᕙᓐᓂᖅ ᖃᓄᖅᑐᕈᑎᑦᓴᑐᐊᕆᔪᔮᓕᕋᕕᐅᒃ ᐃᓗᒃᑯᑦ ᐃᒃᐱᓐᓂᐊᔭᕐᓂᒃ ᓲᕐᓗ ᓄᒫᓱᖕᓂᕐᒥᒃ, ᐃᖕᒥᓂᒃ ᓇᕐᕈᓂᕐᒥᒃ ᐱᐅᖏᑦᑑᔪᕆᓂᖅ, ᐃᓗᓕᒥᐅᑕᖃᕈᓐᓃᖅᑐᔮᕐᓂᖅ, ᐸᓯᒃᓯᒪᐃᓐᓇᓕᕐᓂᖅ ᐊᒻᒪᓗ ᐊᖏᔪᒥᒃ ᓴᖏᔪᒥᒃ ᓂᖓᐅᒪᓂᖃᕐᓂᖅ.

ᐊᑲᐅᖏᓕᐅᕈᑕᐅᓕᖅᐸᒻᒪ ᐃᒫᒃ ᐋᓐᓂᐊᓗᐊᕈᓐᓂᕈᑎᒋᑲᐃᓐᓇᖅᑕᐃᑦ ᐃᓕᓐᓂᒃ ᐊᓐᓂᖅᑐᐃᕙᓐᓂᕐᒧᑦ, ᐊᑯᓂᐅᔪᒥᒃ ᖃᓄᐃᑦᑐᓃᕈᑕᐅᒍᓐᓇᖏᒻᒪᑦ. ᓲᕐᓗ ᐄᒪᐅᓕᐅᖅᑐᑎᑐᑦ, ᐊᓐᓂᐊᕆᔭᐅᔪᖅ ᒪᑦᑐᑎᖅᑕᐅᑐᐃᓐᓇᑲᐃᓐᓇᖅᑐᖅ, ᓱᓇᐅᕙᓪᓕ ᒥᖅᓱᖅᑕᐅᔭᕆᐊᖃᕋᓗᐊᖅᑐᒥᒃ. ᐊᐅᓇᕈᓐᓃᑐᐃᓐᓇᑲᐃᓐᓇᓚᖓᔪᖅ, ᑭᓯᐊᓂ ᐋᕿᐅᒪᔾᔪᑕᐅᔾᔭᖏᑦᑐᖅ ᐊᑕᓃᑦᑐᒥᒃ ᐊᓐᓂᖅᓯᒪᓂᖓᓂᒃ. ᐊᑲᐅᖏᓕᐅᕈᑕᐅᒋᐊᒃᑲᓐᓂᑐᐃᓐᓇᓚᖓᒋᓪᓗᓂ.

ᐊᓯᒋᔭᕐᓂᒃ ᓲᕐᓗ ᑕᐃᒪᐃᓕᐅᖅᐸᒃᑐᓂᒃ ᒪᓕᖃᑕᐅᒍᕕᑦ, ᑕᐃᒪᐃᓕᐅᖃᑦᑕᖅᑐᒃᓴᐅᕗᑎᑦ ᐃᔨᕋᖅᑐᐊᕆᓪᓗᒍ. ᐃᒻᒪᖄ ᐃᓕᖕᓂᒃ ᑲᖑᓱᒃᑲᕕᑦ, ᐅᕝᕙᓗᓐᓃᑦ ᐃᓱᒪᖃᕋᕕᑦ ᑐᑭᓯᐅᒪᔭᐅᓚᖓᖏᓐᓂᖅ ᐊᓯᖕᓄᑦ. ᑭᓯᐊᓂ ᐃᔨᖅᓯᓯᒪᓂᖅ ᑭᓇᐅᓂᕐᓂᒃ ᐃᒃᐱᒋᔭᕐᓂᒡᓗ, ᐅᖁᒪᐃᑉᐳᖅ. ᐃᓱᐊᓂ, ᑕᐃᒃᑯᐊ ᐃᓚᖃᕈᑎᒋᕙᒃᑕᑎᑦ ᐊᒃᑐᖅᑕᐅᓯᒪᓂᐊᖅᑐᑦ ᐃᓚᖕᓂᒃ ᐱᖃᑎᐊᓗᖕᓂᒡᓗ, ᐃᔨᖅᑐᐊᕇᓐᓇᕈᕕᒋᑦ ᐊᒻᒪᓗ ᐃᓕᖕᓂᒃ ᐸᓯᔭᒃᓴᐅᒐᓱᖐᓐᓇᕈᕕᑦ, ᐊᒻᒪᓗ ᐊᒃᑐᖅᓯᓯᒪᓂᐊᕆᓪᓗᓂ ᖃᓄᖅ ᐃᓕᖕᓂᒃ ᐃᒃᐱᖕᓂᐊᖕᒪᖔᖅᐱᑦ. ᐃᒃᐱᒋᓕᕈᓐᓇᕐᒥᒐᕕᑦ ᐃᓅᑑᓗᐊᒃᑲᓐᓂᓕᕐᓂᖅ, ᓱᕙᓕᑭᐊᕆᓕᕐᓂᖅ ᐊᒻᒪᓗ ᓇᒧᖓᐃᕕᒃᓴᐃᕈᑎᓯᒪᓂᕐᒥᒃ.

ᖃᐅᔨᒪᔾᔪᑕᐅᔪᓐᓇᖅᑐᑦ ᓇᓗᓇᐃᒃᑯᑕᐅᔪᓐᓇᖅᑐᓪᓗ ᐃᖕᒥᓂᒃ ᑭᓕᖅᐸᖕᓂᖅ ᐊᒻᒪᓗ ᐃᖕᒥᓂᒃ ᐋᓐᓂᖅᓯᕙᖕᓂᖅ

ᐃᖕᒥᓂᒃ ᐋᓐᓂᖅᓯᕙᖕᓂᖅ ᐃᓚᖃᖅᑐᖅ ᑕᒪᐃᓐᓂᑦᑎᐊᖅ ᐃᓕᖕᓂᒃ ᖃᓄᑐᐃᓐᓇᖅ ᐊᓐᓂᖅᓯᕙᖕᓂᕐᒥᒃ. ᐃᓚᖏᑦ ᐊᑐᖅᑕᐅᒐᔪᖕᓂᖅᓴᐃᑦ ᒪᑯᓂᖓ ᐃᓚᖃᓲᑦ:

  • ᑭᓕᒃᓯᖃᑦᑕᕐᓂᖅ ᓇᐅᒃᑯᑐᐃᓐᓇᖅ ᐅᕝᕙᓗᓐᓃᑦ ᑲᐱᓪᓛᓪᓗᓂ ᕿᑦᓱᒃᓯᕙᖕᓂᖅ ᐅᕕᓃᔭᐃᓪᓗᓂ ᐅᕕᓂᖕᒥᒃ
  • ᐃᖕᒥᓂᒃ ᐆᑕᖅᑎᑦᑎᕙᖕᓂᖅ ᐊᐅᒪᓕᖕᒧᑦ ᐅᕝᕙᓗᓐᓃᑦ ᐃᒪᕐᒧᑦ ᐃᖕᒥᓂᒃ ᐆᑎᑦᑎᕙᖕᓂᖅ
  • ᐃᖕᒥᓂᒃ ᑎᒡᓗᒃᑐᖅᐸᖕᓂᖅ ᐅᕝᕙᓗᓐᓃᑦ ᓂᐊᖁᕐᒥᓂᒃ ᑲᔪᒃᑐᑎᕙᖕᓂᖅ ᓴᓂᕋᒧᑦ
  • ᑐᒡᒐᐃᕙᖕᓂᖅ/ᑎᒡᓗᒃᓯᑳᓪᓚᒃᐸᓐᓂᖅ ᐱᖁᑎᓂᒃ ᐅᕝᕙᓗᓐᓃᑦ ᐃᖕᒥᓂᒃ ᑎᒥᒥᒃ ᓴᓂᕋᒧᑦ ᑐᓗᖅᑎᑦᑎᑳᓪᓚᒃᐸᖕᓂᖅ ᐊᒻᒪᓗ ᓯᑎᔪᓄᑦ ᐱᖁᑎᓄᑦ
  • ᐃᓕᓯᕙᖕᓂᖅ ᓱᓇᑐᐃᓐᓇᕐᒥᒃ ᐅᕕᓂᕗᑦ ᐃᓗᐊᒍᑦ
  • ᐱᔮᕆᓪᓗᓂ ᐃᖕᒥᓂᒃ ᐋᓐᓂᖅᓯᒪᓂᕐᒥᓂᒃ ᒪᒥᑎᑦᑎᑕᐃᓕᒪᓕᖅᐸᓐᓂᖅ
  • ᐄᓯᕙᓕᕐᓂᖅ ᑐᖁᓐᓇᖅᑐᓕᖕᓂᒃ ᓈᒻᒪᖏᒃᑐᓂᒡᓗᓐᓃᑦ ᓱᓇᑐᐃᓐᓇᕐᒥᒃ

ᐃᖕᒥᓂᒃ ᐋᓐᓂᖅᑐᐃᕙᖕᓂᖅ ᐃᓚᖃᕈᓐᓇᕐᒥᔪᖅ ᖃᐅᔨᔭᐅᓴᕋᐃᖏᓐᓂᖅᓴᐅᔪᓂᒃ ᐋᓐᓂᖅᑐᐃᓂᐅᕙᖕᒥᔪᓂᒃ ᐃᖕᒥᓂᒃ, ᐅᕝᕙᓗᓐᓃᑦ ᐃᖕᒥᓄᑦ ᐅᓗᕆᐊᓇᖅᑐᒦᑎᑦᑎᓕᖃᑦᑕᕐᓂᖅ/ᐊᑦᑕᕐᓇᖅᑐᒦᑎᑦᑎᓕᖃᑦᑕᕐᓂᖅ, ᓲᕐᓗ ᖃᓄᐃᑐᐃᓐᓈᖅ ᐊᖁᖃᑦᑕᓕᕐᓂᖅ, ᑐᐊᕕᐊᕆᔭᒥᓂᒃ ᐃᒥᐊᓗᐃᓐᓇᓕᕐᓂᖅ ᐋᖓᔭᕐᓕᕐᓗᓂ, ᐊᒥᓲᓗᐊᖅᑐᓂᒃ ᐊᖓᔭᕐᓇᖅᑐᓕᒃᓯᒪᓂᖅ, ᐊᒻᒪᓗ ᐃᒻᒥᓂᒃ ᓴᐳᓐᓂᐊᕈᑎᖃᖏᓪᓗᓂ ᑯᔭᖃᑦᑕᕐᓕᓂᖅ.

ᖃᐅᔨᒪᕙᕇᕈᑎᒃᓴᐃᑦ ᐃᓚᒋᔭᐅᔪᖅ ᐱᖃᑎᐊᓗᒋᔭᐅᔪᕐᓗᓐᓂᑦ ᐃᖕᒥᓂᒃ ᑭᓕᒃᓯᕙᓕᕐᓂᖓᓂᒃ, ᐃᖕᒥᓂᒡᓗᓐᓃᑦ ᐋᓐᓂᖅᓯᕙᓕᕐᓂᖓᓂᒃ

ᐊᓐᓂᕌᕆᔭᐅᔪᑦ ᑕᓕᖓᑎᑦᑎᔾᔪᑕᐅᓐᓇᕐᓂᖏᓐᓄᑦ ᑎᒥᒃᑯᑦ ᐋᓐᓂᕈᑕᐅᓯᒪᔪᓂᒃ, ᐃᓗᒃᑯᑦ/ᐃᓱᒪᒃᑯᑦ ᐊᒃᓱᕈᕐᓇᖅᑐᒃᑰᕈᑎᖃᖅᑐᓂᒃ ᐃᓄᖕᓂᒃ ᐃᔨᖅᓯᒪᑎᑕᐅᔪᓐᓇᕐᑐᑦ ᖃᓄᐃᑦᑑᔭᖏᑦᑎᐊᖅᑐᒥᒃ ᐱᐅᓯᖃᕐᓗᑎᒃ, ᖃᐅᔨᔭᐅᑲᐅᑎᒋᔪᓐᓇᖃᑦᑕᖏᓚᑦ. ᑭᓯᐊᓂᓕᑦᑕᐅᖅ, ᓇᓗᓇᐃᒃᑯᑕᖃᕈᓐᓇᖅᑐᑦ ᕿᓂᕈᓐᓇᖅᑕᕐᓂᒥᒃ ᓲᕐᓗ (ᑭᓯᐊᓂ ᐃᖃᐅᒪᓂᐊᕆᕗᑎᑦ − ᖃᐅᔨᒪᒻᒪᕆᖏᒃᑲᓗᐊᕐᓗᑎᒃ ᐃᓵᒃᓯᒪᔪᓐᓇᕐᒥᔪᑎᑦ ᐊᓯᖕᓄᑦ ᐃᓱᒪᓘᑎᒋᓕᖅᑕᕐᓄᑦ):

  • ᐅᓂᒃᑳᖅᓯᒪᖏᑕᖏᑦ ᐋᓐᓂᖅᓯᒪᔪᕕᐅᔪᓂᖏᑦ, ᕿᓕᕈᓖᖅᑐᓪᓗᓐᓂᑦ ᑭᓕᖅᓯᒪᔪᕕᓂᐅᓂᕐᒧᑦ, ᓲᓐᖒᔭᖅᑐᑦ/ᑎᓪᓗᐃᔭᖅᑐᑦ ᐅᕝᕙᓗᓐᓃᑦ ᐆᓯᒪᔪᕕᓃᐅᔪᑦ ᑕᒫᓂ ᑕᓕᐊᖓᒍᑦ, ᑕᓕᖓᒍᑦ, ᖁᒃᑐᕆᐊᖓᒍᑦ ᐅᕝᕙᓗᓐᓃᑦ ᓴᕝᕕᖓᓂ.
  • ᐊᐅᖏᓐᓇᕕᓂᐅᓕᕐᓂᖏᑦ ᐊᓐᓄᕌᖏᑦ, ᐊᓪᓚᕈᑎᖏᓐᓂ ᐅᕝᕙᓗᓐᓃᑦ ᐃᒡᓗᕐᒥᓂᒃ ᕿᐱᖕᒥᓂᓗ. ᐊᐅᖏᓐᓇᐅᓂᖅ ᑲᒃᑯᐅᑎᒃᓴᐃᑦ.
  • ᐃᐱᒃᑐᓂᒃ ᓄᕗᓕᖕᓂᒃ ᓲᕐᓗ ᐅᖏᔭᐅᑎᓂᒃ, ᐱᓚᐅᑎᓂᒃ, ᒥᖅᑯᑎᓂᒃ, ᐊᓕᒍᕕᓂᕐᓂᒃ ᓯᖁᒥᓯᒪᔪᓂᒃ, ᐃᒥᐅᑏᓪᓗᓐᓃᑦ ᒪᑐᕕᓂᖏᓐᓂᒃ, ᐱᐱᖁᑎᖏᓃᖃᑕᐅᕙᓕᖅᑐᓂᒃ.
  • ᐊᒥᓱᓂᒃ “ᐱᓂᕐᓗᐊᖅᑭᓯᒪᔪᖅ.” ᑕᐃᓐᓇ ᐃᖕᒥᓂᒃ ᐋᓐᓂᖅᓯᕙᒃᑐᖅ ᑯᑦᑕᖓᔪᐊᓘᓂᕋᐃᔪᓐᓇᕐᒪᑦ ᐃᒻᒥᓂᒃ ᐅᕝᕙᓗᓐᓃᑦ ᐱᓂᕐᓗᒃᑲᐅᓗᖓ ᐱᔮᖁᑕᐅᔪᔮᖏᑦᑐᓂᒃ, ᐃᖕᒥᓂᒃ ᐃᔨᕋᖅᑐᕈᑎᒋᓗᓂᒋᑦ.
  • ᑕᓕᖓᑎᑦᑎᒐᓱᐊᒃᐸᓐᓂᖅ. ᑭᓇᑐᐃᓐᓇᖅ ᐃᖕᒥᓂᒃ ᐊᓐᓂᖅᑐᐃᕙᒃᑐᖅ ᐊᓄᕌᓂᒃ ᐊᑐᕈᒪᔪᓐᓇᖅᑐᖅ ᑕᑭᔪᓂᒃ ᑕᓕᖃᖅᑐᓂᒃ ᐊᓐᓄᕌᓂᒃ ᐅᕝᕙᓐᓃᑦ ᑕᑭᔪᓂᒃ ᖃᒡᓕᒃᓯᒪᓗᓂ, ᐅᖂᕋᓘᒐᓗᐊᖅᑎᓪᓗᒍᓗᓐᓂᑦ.
  • ᐃᓄᑑᒋᐊᖃᓲᖑᓪᓗᓂ ᐊᑯᓂᐊᓗᒃ, ᐱᓗᐊᖅᑐᒥᒃ ᐃᒡᓗᕈᓯᕐᒥᓂᓗᓐᓂᑦ ᐊᓇᕐᕕᖕᒥᓂᓘᓐᓃᑦ.
  • ᐃᓄᑑᖏᓐᓇᕐᓂᖅ ᐊᒻᒪᓗ ᐸᕝᕕᖃᑦᑕᐃᓐᓇᕐᓂᖅ ᐊᓯᒥᓂᒃ.
ᒪᒃᐱᒐᕐᒧᑦ ᒪᓕᒃᑐᒧᑦ ᑲᔪᓯᓕ: ᐱᑕᖃᕈᓃᕐᒪᑦ ᐅᕙᓐᓄᑦ ᑕᐃᓐᓇ ᐃᓄᒃ