PT_6178

ᐃᒻᒪᖄ, ᐅᓪᓗᕆᐊᖑᖏᑦᑑᒐᓗᐊᑦ, ᑭᓯᐊᓂᓕᖃᐃ ᐃᒃᑯᐊ ᒪᑐᐃᖓᕝᕕᐅᔪᑦ ᕿᓚᖕᒥᒃ ᓇᓪᓕᒋᔭᕗᑦ ᐃᓂᒋᔭᖏᓐᓂᒃ ᓇᒡᓕᓂᕐᒥᒃ ᐊᒻᒪᔫᓪᓗᑎᒃ ᐊᖅᑯᑎᒋᔭᐅᔪᑦ ᒃ ᓯᐊᒻᒪᒃᑎᕆᕕᐅᓂᕐᒧᑦ, ᖃᐅᒪᓂᖏᑦ ᐅᕙᑦᑎᓐᓄᒃ ᑐᕋᖓᑎᑕᐅᕙᖕᒪᑕ, ᖃᐅᔨᒪᑎᑦᑎᓂᖏᓐᓄᑦ ᐅᕙᑦᑎᓐᓂᒃ ᖁᕕᐊᓱᓕᕐᓂᖏᓐᓂᒃ.

– ᐃᓄᖕᓄᑦ ᐅᓂᒃᑳᖅᑐᐊᑐᖃᖅ, ᑭᓇᒧᑦ ᐅᖃᖅᑕᐅᖄᓚᐅᕐᒪᖔᑦ ᖃᐅᔨᒪᔭᐅᖏᑦᑐᖅ

ᓱᓕᔪᖅ ᐃᓅᔪᓐᓃᖅᑐᖃᖅᐸᑦ ᐃᖕᒥᓃᖅᓯᒪᓂᕐᒥᓄᑦ, ᐊᓯᔾᓰᕙᖏᓐᓂᖓ ᓇᒡᓕᖕᓂᑦᑎᓐᓂᒃ ᑕᐃᔅᓱᒥᖓ, ᐱᒻᒪᕆᐅᓂᖏᓐᓂᒃ, ᐊᒃᑐᖅᓯᓯᒪᓂᖏᓐᓂᒃ ᐃᓅᓯᑦᑎᓐᓂᒃ, ᐃᓚᒋᔭᐅᕙᓚᐅᕐᓂᖏᓐᓄᑦ ᐃᓚᒥᓄᑦ ᓄᓇᒥᓄᓪᓗ, ᐊᒻᒪᓗ ᐱᔪᓐᓇᐅᑎᖃᖅᓱᑕ ᐱᔭᕆᐊᖃᖅᐸᒃᓱᑕᓗ ᖁᕕᐊᓲᑎᖃᕈᓐᓇᕐᓂᖅ ᐊᒻᒪᓗ ᐃᓕᑕᕆᔭᐅᑎᑦᑎᔪᓐᓇᕐᓂᖅ ᐃᓅᓯᕆᓚᐅᖅᑕᖓᓂᒃ ᐊᒻᒪᓗ ᐱᔭᕇᑦᑎᐊᕈᓐᓇᓚᐅᖅᑕᖏᓐᓂᒃ. ᑐᑭᓕᐅᕈᑕᐅᕙᖕᒪᑕ ᐃᓄᐃᑦ ᖃᓄᖅ ᐃᓅᕙᓚᐅᕐᓂᖏᑦ, ᐃᓱᒪᒋᔭᐅᖏᓐᓂᖅᓴᐅᕙᒃᓱᑎᒃ ᖃᓄᖅ ᑐᖁᓚᐅᕐᒪᖔᑕ.

ᑕᒪᕐᒥᒃ ᐃᓄᐃᑦ ᑭᓇᒃᑯᑐᐃᓐᓇᑦᑎᐊᖅ ᓄᒫᓱᒍᑎᖃᕐᓂᖏᑦ ᕿᓄᕕᒃᓴᖃᕆᐊᖃᕐᓂᖏᑦ ᐊᔾᔨᒌᖏᑐᐃᓐᓇᐅᖕᒪᑕ, ᑐᖓᕕᖃᖅᓱᑎᒃ ᐃᓄᖕᒥᒃ ᖃᓄᐃᑦᑑᓂᖓᓂᒃ, ᐃᓚᖃᕐᓂᖓᓂᒃ ᐃᓄᔪᓐᓃᖅᑐᒥᒃ, ᓇᖕᒥᓂᖅ ᖃᓄᖅ ᐊᑕᖃᑎᒌᒃᐸᓚᐅᕐᒪᖔᑎᒃ, ᐊᒻᒪᓗ ᐃᑲᔪᖅᑎᖃᕈᓐᓇᕐᓂᖏᓐᓂᒃ. ᐱᒻᒪᕆᐊᓘᕗᖅ ᖃᐅᔨᒪᓂᖅ ᐃᒃᐱᖕᓂᐊᔭᑎᑦ ᖃᓄᐃᖏᑦᑎᐊᕐᒪᑕ ᐊᒻᒪᓗ ᐱᓪᓚᕆᐅᓪᓗᑎᒃ. ᐱᒻᒪᕆᐊᓘᖕᒪᑦ ᖃᐅᔨᒪᓂᖅ ᐃᓄᖃᕐᒪᑦ ᐃᑲᔪᕈᓇᖅᑐᓂᒃ, ᐃᑲᔪᕐᓂᐊᖅᑐᓂᒡᓗ ᐃᓕᖕᓂᒃ ᑲᔪᓯᑎᑦᑎᓂᖅ ᐊᒻᒪᓗ ᐊᓂᒎᑎᔪᓐᓇᕐᓂᖅ ᐊᒃᓱᕈᕐᓇᖅᑐᒃᑰᕈᑎᒋᓂᐊᖅᑕᕐᓂᒃ.

ᐃᓚᖏᑦ ᖃᓄᐃᖏᑦᑎᐊᖅᑐᑦ ᐊᑐᖅᑕᐅᕙᖕᒥᔪᑦ ᐃᖕᒥᓃᖅᑐᖃᖅᑐᒥᒃ ᐃᓅᔪᓐᓃᖅᑐᖃᖅᑎᓪᓗᒍ:

ᖁᐊᖅᓵᖅᓯᒪᓂᖅ ᐃᒃᐱᓐᓂᐊᕈᔪᓐᓃᕐᓂᕐᓗ ᐃᖕᒥᓃᖅᑐᖃᖅᑐᒥᒃ ᓄᒫᓲᑎᖃᕐᓂᖅ ᐋᓐᓂᕐᓇᕐᓂᖅᐹᖑᓂᐊᖅᑐᒥᒃ ᐃᒃᐱᓐᓂᐊᓚᖓᔭᑦᓴᕆᕙᐃᑦ. ᐋᓐᓂᕐᓇᕐᓂᖓ ᓴᖏᔫᓗᐊᕈᓐᓇᕐᒪᑦ ᓯᕗᓪᓕᕐᒥ ᐃᓛᒍᑦ ᐃᒃᐱᓐᓂᐊᒍᓐᓃᖅᑐᑎᑐᑦ ᐱᔪᓐᓇᕆᕗᙱᑦ. ᖃᖓᑭᐊᖅ ᑕᒪᓐᓇ ᐃᒃᐱᓐᓂᐊᖏᓐᓂᖅ ᐲᓲᖑᕗᖅ, ᐋᓐᓂᕐᓇᖓᒍᕆᐊᖃᓕᕐᓂᐊᖅᑐᑎᑦ ᑕᐃᔅᓱᒥ ᓴᐅᔭᐅᓯᒪᔪᒥᒃ ᐋᓐᓂᕐᓇᖅᑐᒥᒃ ᐃᒃᐱᒋᓕᕐᓗᑎᑦ.

ᑕᐃᒪᐃᑦᑐᖃᖏᓐᓂᕋᐃᖏᓐᓇᕐᓂᖅ

ᐊᖏᕈᑎᒋᔪᓐᓇᐃᓪᓕᑐᐃᓐᓇᕆᐊᖃᖅᐸᐃᑦ ᐱᓪᓚᑖᖅᑎᓪᓗᒍ ᐃᖕᒥᓃᓚᐅᖅᑐᖅ. ᓅᒍᓐᓇᕋᕕᑦ ᐅᑎᖅᑕᕐᓗᑎᑦ ᐃᓗᐊᓂ ᓯᓚᑖᓄᓪᓗ ᑕᒪᑐᒪ ᑕᐃᒪᐃᖏᓐᓂᕋᐃᓂᕐᓂᒃ.

ᐃᓗᑐᔪᐊᓗᖕᒥᒃ ᑕᖃᒪᖔᓗᒃ ᓄᒫᓱᖕᓂᖃᕐᓂᖅ

ᐃᑎᔪᐊᓗᖕᒥᒃ ᑕᖅᑲᒪᖔᓗᒃ ᓄᒫᓱᖕᓂᖃᕐᓂᖅ ᓈᒻᒪᒃᑐᖅ. ᐊᓯᖏᓐᓂᑕᐅᖅ ᐃᒃᐱᒐᔪᖕᒥᔪᒍᑦ ᐃᓚᖃᕈᓐᓇᖅᑐᒥᒃ ᓲᕐᓗ ᒪᑯᓂᖓ, ᖃᓄᐃᓕᐅᒃᑲᓐᓂᕐᕕᒃᓴᐃᕈᑎᓯᒪᔪᔮᕐᓂᖅ, ᓴᐱᓕᖅᓯᒪᓂᖅ, ᑲᑉᐱᐊᓱᖕᓂᖅ, ᐊᔪᕋᓱᒋᓕᕐᓂᖅ, ᖁᒃᓴᓱᐃᓐᓇᓕᕐᓂᖅ, ᖁᕕᐊᓇᖏᑦᑐᐊᓗᖕᒦᖏᓐᓇᓕᕐᓂᖅ, ᐱᖃᑕᐅᒍᒪᔪᓐᓃᕐᓂᖅ, ᐊᒻᒪᓗ ᕿᒪᒃᑕᐅᓯᒪᔪᔮᕐᓂᖅ. ᐃᖅᑲᐅᓂᐊᖅᐳᑎᑦ ᓇᔪᕇᓐᓇᓚᐅᖅᑕᐃᑦ ᖃᐅᔨᒪᐃᓐᓇᓚᐅᖅᑕᑎᓪᓗ ᐊᓯᖑᕐᒪᑕ ᑕᐃᒪᖓᑦ ᐃᓅᔪᓐᓃᕐᒪᑦ ᓇᒡᓕᒋᔭᐃᑦ. ᕿᒃᓵᓐᓂᖅ/ᓄᒫᓱᖕᓂᖅ ᐊᒃᑐᖅᓯᓯᒪᔪᓐᓇᕐᒪᑦ ᑕᒪᐃᓐᓂᒃ, ᓯᓂᒍᓐᓇᕐᒥᒃ, ᓂᕆᔪᓐᓇᕐᓂᖅ, ᐃᓱᒪᖃᑯᑖᒍᓐᓇᕐᓂᖅ, ᓄᕿᖃᑦᑎᐊᕈᓐᓇᕐᓂᖅ ᐊᒻᒪᓗ ᐱᒋᐊᕈᓐᓇᖅᓯᓂᕐᒥᒃ. ᑕᒪᒃᑯᐊ ᐱᐅᓯᕆᔭᐅᕙᒃᑐᑦ ᐃᓄᓕᒫᓄᑦ ᓇᓂᑐᐃᓐᓇᖅ ᖃᓄᐃᖏᑦᑐᑦ.

ᓂᖓᐅᒪᓂᖅ ᐊᒻᒪᓗ ᐸᓯᒃᓯᕙᖕᓂᖅ

ᓂᓐᖓᐅᒪᓂᖅ ᐊᒻᒪᓗ ᐸᓯᒃᓯᕙᖕᓂᖅ ᑐᕌᖓᑎᑕᐅᔪᓐᓇᕐᒥᔪᖅ ᑕᐃᒃᑯᓄᖓ ᐸᓯᔭᒃᓴᐅᓱᕆᓕᖅᑕᕐᓄᑦ. ᑕᐃᒃᑯᐊ ᐃᓚᖃᕈᓐᓇᖅᐳᑦ ᐊᓐᓂᐊᓯᐅᖅᑎᐅᓂᒃ, ᐱᖃᑎᐊᓗᒋᕙᓚᓚᐅᖅᑕᖏᓐᓂᒃ, ᐃᓕᖕᓂᒃ, ᐃᓄᖕᒥᒡᓗᓐᓃᑦ ᐃᖕᒥᓂᒃ ᑐᖁᖓᓕᖅᑐᒥᒃ.

ᑲᖑᓱᖕᓂᖅ

ᖃᑲᖑᓇᕈᑕᐅᕙᖕᓂᖓᓄᑦ ᐃᖕᒥᓃᖅᑐᖃᖅᑎᓪᓗᒍ ᐊᔪᕐᓇᕈᑕᐅᔪᓐᓇᕐᒥᔪᖅ ᐅᖃᐅᓯᖃᕈᓐᓇᕐᓂᕐᒧᑦ ᐱᔾᔪᑕᐅᓕᕐᓗᓂ ᓇᒡᓕᒋᔭᐃᑦ ᐃᓅᔪᓐᓃᕈᓯᕆᓚᐅᖅᑕᖓ, ᐃᖃᖅᑐᖅᑕᐅᓂᐊᕋᓱᓕᕐᓂᕐᒧᑦ. ᖃᓄᑉᐸᖏᓪᓚᖅ ᐱᕕᒃᓴᖃᑦᑎᐊᖃᑦᑕᕐᓗᑎᑦ ᐅᖃᐅᓯᖃᕈᓐᓇᕐᓂᖅ ᕿᒃᓵᓐᓂᕐᓂᒃ/ᓄᒫᓱᖕᓂᕐᒥᓂᒃ ᐃᓕᖕᓂᒃ ᑲᒪᑦᑎᐊᔪᓴᒍᑕᐅᓗᓂ ᐅᓗᕆᐊᓇᕈᑎᖃᖏᓪᓗᓂᓗ/ᐊᑦᑕᕐᓇᖅᑐᒦᓕᕈᑕᐅᓂᐊᖏᓪᓗᓂᓗ ᐃᓕᖕᓄᑦ. ᖃᐅᔨᒪᑎᑉᐸᒡᓗᒋᑦ ᐃᓚᑎᑦ ᐱᖃᑎᐊᓗᒃᑯᑎᓪᓗ ᖃᓄᖅ ᐃᑲᔪᖅᑕᐅᔭᕆᐊᖃᕐᒪᖔᖅᐱᑦ ᑕᐃᒃᑯᓄᖓ.

ᐸᓯᔭᒃᓴᐅᕙᓕᕐᓂᖅ

ᕿᒪᒃᑕᐅᓯᒪᔪᑦ ᐃᖕᒥᓃᖅᓯᒪᔪᒧᑦ ᐊᒥᓱᑦ ᐃᖕᒥᓂᒃ ᐸᓯᔭᒃᓴᐅᓕᖅᑎᑉᐸᒃᑐᑦ, ᐃᒃᐱᒋᓗᑎᒃ ᑐᖓᐅᑎᓯᒪᓂᕐᒥᓂᒃ ᐅᕝᕙᓗᓐᓃᑦ ᐃᓱᒪᒋᔭᖃᓚᐅᖏᓐᓂᖏᓐᓂᒃ ᓯᕗᓂᐊᒍᑦ ᐊᒃᓱᕈᕐᓇᖅᑐᒃᑰᕈᑎᕙᓚᐅᖅᑕᖏᓐᓂᒃ. ᐊᓯᖏᑦᑕᐅᖅ ᐃᓱᒪᓕᐅᖅᓯᒪᓕᕈᓐᓇᕆᕗᑦ ᖃᓂᑦᑐᒪᔪᓐᓃᕐᓂᖅ ᐃᓄᖕᒥᒃ ᐃᖕᒥᓂᒃ ᖃᓄᐃᖏᑦᑐᒪᓂᕐᒥᓄᑦ. ᐸᓯᒃᓯᕙᓕᕐᓂᖅ ᐅᕙᑦᑎᓐᓂᒃ ᐊᒥᓱᒻᒪᕆᖕᓄᑦ ᐊᑐᖅᑕᐅᕙᒃᑐᖅ ᐃᒃᐱᔭᐅᓪᓗᓂ ᐃᖕᒥᓃᖅᑐᖃᕌᖓᑦ, ᑭᓯᐊᓂᑕᐅᖅ ᐱᒻᒪᕆᐅᒋᕗᖅ ᖃᐅᔨᒪᓂᖅ ᐃᒡᕕᑦ ᐸᓯᔭᒃᓴᐅᖏᓐᓇᕕᑦ ᐊᓯᕕᑦ ᖃᓄᐃᓕᐅᕈᓯᕆᔭᖏᓐᓄᑦ.

ᐅᖁᒪᐃᒋᔭᒥᓂᒃ ᓴᒃᑯᑦᑎᓂᖅ

ᐃᒃᐱᒋᓕᕈᓐᓇᕆᕗᑦ ᑭᖑᓂᐊᒍᑦ ᓴᒃᑯᑦᑎᓯᓯᒪᓕᕈᓐᓇᕐᓂᖅ ᓇᖕᒪᐃᓐᓇᖅᑖᓗᖕᓂᒃ, ᐱᓗᐊᑐᒥᒃ ᐃᓅᖃᑎᒋᕙᓚᐅᖅᑕᐃᑦ ᑕᐃᓐᓇ ᐃᓅᔪᓐᓃᖅᑎᓯᒪᓕᖅᑐᖅ ᐊᒃᓱᕈᕐᓇᖅᑐᕙᓚᐅᖅᐸᑦ, ᑐᑭᓕᐅᑦᑎᐊᕈᑕᐅᕙᓚᐅᖏᑉᐸᓪᓗᓐᓃᑦ, ᐅᕝᕙᓗᓐᓃᑦ ᑕᐅᑐᖃᑦᑕᐃᓐᓇᓚᐅᕐᓂᕈᕕᐅᒃ ᑕᐃᓐᓇ ᐃᓄᒃ ᐋᒃᓱᕈᕐᓇᖅᑐᒃᑰᖏᓐᓇᕐᓂᖓᓂᒃ. ᑕᒪᓐᓇ ᓲᕐᓗ ᓇᖕᒪᐃᓐᓇᓚᐅᖅᑕᕐᓂᒃ ᓴᒃᑯᐃᓯᒪᔪᔮᕆᓕᖅᑕᐃᑦᑕᐅᖅ ᐃᓚᖃᕈᓐᓇᕐᒥᔪᖅ ᐸᓯᔭᒃᓴᐅᓱᕆᓕᖅᐸᖕᓂᕐᒥᒃ ᐃᓕᖕᓂᒃ.

ᐊᐱᖁᑎᖃᕐᓂᖅ “ᓲᖅ”

ᐃᓅᖏᓐᓇᖅᑎᓪᓗᑎᓪᓕ, ᐊᐱᕆᓕᕈᓐᓇᕆᕗᑯᑦ “ᓲᖅ”−ᓚᓯᒪᔪᒥᒃ ᐊᐱᖁᑎᒥᒃ ᑕᐃᒪᖓᑦ ᑕᐃᒪᖓᑦ, ᑐᑭᓯᓇᓱᐊᕐᓂᕐᒧᑦ ᐱᔾᔪᑕᐅᔪᓂᒃ ᓇᒡᓕᒋᔭᐃᑦ ᐃᖕᒥᓃᓚᐅᕐᓂᖓᓂᒃ. ᑕᒪᓐᓇᑕᐅᖅ ᐃᓄᖕᓄᑦ ᑕᒪᐃᓐᓄᑦ ᐱᐅᓯᖅ ᐊᑐᖅᑕᐅᕙᖕᒥᔪᖅ ᐃᓚᒋᔭᐅᒐᒥ ᒪᒥᓴᖅᐸᓪᓕᐊᓂᕐᒧᑦ, ᐊᐱᖁᑎᒃᓴᕆᔭᕋᓗᐊᑎᓪᓗᓐᓃᑦ ᑭᐅᔭᐅᒻᒪᕆᒍᓐᓇᖏᒃᑲᓗᐊᖅᑎᓪᓗᒋᑦ.

ᑲᑉᐱᐊᓱᖕᓂᖅ

ᑲᑉᐱᐊᓱᖃᑦᑕᓕᕈᓐᓇᕐᒥᔪᑎᑦ ᐊᓯᑎᑦ ᐃᓚᖏᑦ ᐱᖃᑎᐊᓗᒋᔭᑎᓪᓗᓐᓃᑦ ᐃᓄᔪᓐᓃᕈᓐᓇᕐᓂᖏᓂᑦᑕᐅᖅ, ᐃᖕᒥᓃᕐᓂᕐᒧᓪᓗᓐᓃᑦ, ᐊᓯᐊᒍᓪᓗᓐᓃᑦ. ᑲᐱᐊᓱᖃᑦᑕᓕᕐᓂᖅ ᐊᓯᐅᔨᒃᑲᓐᓂᕈᓐᓇᕐᓂᕐᒥᒃ/ᔭᒐᐃᔪᓐᓇᕐᓂᖅ ᐊᓯᖕᓂᒃ ᐃᑎᔪᐊᓗᖕᒥᒃ ᖃᒪᖔᓗᒃ ᓴᖏᔫᓕᖃᑦᑕᕆᕗᖅ ᐃᒃᐱᒋᓪᓗᒍ ᐃᓄᔪᓐᓃᑐᖃᖅᓯᒪᓕᖅᑎᓗᒍ ᐃᖕᒥᓃᕐᓂᕐᒧᑦ.

ᐅᒃᐱᕆᔭᐅᔪᑦ ᐅᕝᕙᓗᓐᓃᑦ ᑐᒃᓯᐊᕐᕕᒃᑯᑦ ᐅᒃᐱᕐᓂᕆᔭᐅᔪᑦ

ᐅᒃᐱᕐᓂᕆᔭᕗᑦ ᐊᒻᒪᓗ ᐱᒻᒪᕆᐊᓘᑎᑉᐸᒃᑕᕗᑦ ᓇᖏᐊᕐᓇᖅᑐᒦᓕᕈᓐᓇᕆᕗᑦ ᐃᖕᒥᓃᑐᖅᖃᓚᐅᖅᑎᓪᓗᒍ ᑭᖑᓂᐊᒍᑦ. ᐊᐱᖁᑎᖃᓕᕈᓐᓇᕋᕕᑦ ᑐᑭᖃᕐᓂᖓᓂᒃ ᐃᓅᓯᐅᑉ, ᐃᓅᔾᔪᑕᐅᓂᐅᑉ. ᓇᕐᕈᒋᔭᐅᓕᕈᓐᓇᕐᓂᖅᑕᐅᖅ ᑲᑉᐱᐊᓲᑎᒋᔭᐅᓕᖅᐸᒃᑭᕗᖅ ᐅᒃᐱᕐᓂᓕᕆᔨᐅᔪᓄᑦ ᓄᓇᔅᓯᓐᓂ ᐱᔾᔪᑕᐅᓕᕐᓗᑎᒃ.

ᐃᖕᒥᓃᕈᒪᓂᕐᒥᒃ ᑲᔾᔭᕐᓇᖅᑑᔭᖅᑎᑦᑎᕙᓪᓕᐊᓕᕈᓐᓇᕐᓂᖅ

ᐱᔾᔪᑕᐅᓪᓗᑎᒃ ᓴᖏᔫᔪᓐᓇᕐᓂᖏᑦ ᕿᒃᓵᓂᕐᒧᑦ/ᓄᒫᓱᖕᓂᕐᒧᑦ ᐱᐅᓯᖃᕈᑕᕙᒃᑐᑦ, ᐃᓚᖏᑦ ᕿᒪᒃᑕᐅᓯᒪᓕᖅᑐᑦ ᐃᓅᔪᑦ ᓱᓕ ᐋᓐᓂᐊᕈᒪᔪᓐᓂᖅᐸᒃᑐᑦ, ᐃᓱᓕᑦᑎᖁᔨᑐᐃᓐᓇᓕᖅᓱᑎᒃ, ᐃᓱᒪᖃᖅᐸᓪᓕᐊᓕᕈᓐᓇᕐᒥᔪᑦ ᐃᖕᒥᓃᕈᒪᓂᕐᒥᓂᒃᑕᐅᖅ. ᑕᒪᒃᑯᖓ ᐃᓱᒪᖃᖅᐸᖕᓂᖅ ᐃᓛᓐᓂᒃᑯᑦ ᐊᒥᓱᓄᑦ ᐃᒃᐱᒋᔭᐅᓲᖑᒋᕗᑦ, ᑐᑭᖃᑲᐅᑎᒋᓇᑎᒡᓗ ᐃᖕᒥᓃᓚᖓᓕᕐᓂᕐᓄᑦ. ᑭᓯᐊᓂᑕᐅᖅ, ᐱᒻᒪᕆᐊᓘᕗᖅ ᐃᑲᔪᖅᑕᐅᔭᖅᑐᕆᐊᖃᕐᓂᖅ, ᐅᖃᐅᓯᕆᓗᒋᑦ ᐃᓱᒪᒋᕙᓕᖅᑕᑎᑦ, ᐃᒃᐱᒋᕙᖅᑕᑎᓪᓗ ᖃᐅᔨᒪᑦᑎᐊᖅᑕᕐᓄᑦ ᐱᖃᑎᐊᓗᖕᓄᑦ, ᐃᓚᒋᔭᕐᓄᑦ ᐅᕝᕙᓗᓐᓂᑦ ᐃᓕᓐᓂᐊᖅᓯᒪᑦᑎᐊᖅᑐᒧᑦ ᐱᓕᕆᔨᐅᔪᒧᑦ.

ᐊᓂᒍᑎᒐᓱᐊᕈᓐᓇᕐᓂᕐᒧᑦ ᖃᓄᐃᓕᐅᕈᑎᒃᓴᐃᑦ ᐃᓅᖃᑎᖃᖅᓱᓂ ᕿᓵᓂᕐᒧᑦ ᓄᒫᓱᖕᓂᕐᒧᑦ ᑎᑭᑕᐅᓯᒪᔪᓂᒃ ᐃᖕᒥᓃᑐᖃᓚᐅᖅᑎᓪᓗᒍ

ᐊᑐᓂ ᐃᓄᐃᑦ ᓄᒫᓱᖕᓂᖏᓐᓂᒃ ᕿᒃᓵᓇᖅᑐᒃᑰᕐᓂᖏᓐᓂᒃ ᐊᔾᔨᒋᔭᐅᖏᒻᒪᑕ. ᑕᒻᒪᖅᓯᒪᓂᖃᖏᓚᖅ ᕿᒃᓵᓇᕐᓂᒃᑰᕈᓐᓇᕐᓂᖅ ᐊᒻᒪᓗ ᖃᓄᖅ ᐊᑯᓂᐅᑎᒋᔭᕆᐊᖃᕐᒪᖔᑦ ᐱᑕᖃᖏᓚᖅ. “ᐊᑯᓂᐅᓂᕆᔭᕆᐊᖃᕐᓂᒥᓂᒃ ᑕᒪᐃᓐᓂᒃ ᐊᑯᓂᐅᓂᖃᕐᓂᐊᕐᒪᑕ.” ᑲᔪᓰᓐᓇᕆᐊᕐᓂᖅ ᐃᖕᒥᓃᑐᖃᓚᐅᖅᑎᓪᓗᒍ ᑐᑭᖃᕐᒪᑦ ᐅᓪᓗᑖᕐᒥᒃ ᐅᓪᓗᒦᓐᓇᐅᔪᒦᓐᓂᖅ, ᑎᒍᒥᐊᕐᓂᕐᒥᒡᓗ ᐱᔪᓐᓇᐅᑎᖃᕐᓂᖅ ᓄᒫᓲᑎᖃᕈᓐᓇᕐᓂᖅ ᕿᓵᓇᖅᑐᒃᑰᕈᓐᓇᕐᓂᖅ ᐱᔪᓐᓇᕐᓃᑦ ᐊᑐᕐᓗᒍ, ᑐᐊᕕᕆᔭᐅᖏᓪᓗᑎᓪᓗ.

ᐊᑐᕐᓂᖅ ᐅᖃᐅᓯᖃᕐᓂᕐᓗ ᐃᒃᐱᖕᓂᐊᔭᕐᓂᒃ ᐃᑲᔪᕐᓂᖃᕐᓂᐊᖅᑐᖅ ᐃᓕᖕᓄᑦ ᑲᔪᓯᕙᓪᓕᐊᓂᕐᓄᑦ ᐊᑐᕐᓗᑎᑦ ᓄᒫᓱᖕᓂᕐᒥᒃ ᕿᒃᓵᓇᖅᑐᒥᒃ, ᖃᖓᖑᖅᐸᓪᓗ ᐊᒃᓱᕈᓗᐊᕈᓃᕐᓂᕐᒧᑦ ᒪᒥᓴᕐᓂᕐᒧᓪᓗ ᑎᑭᑦᑐᒫᕋᕕᑦ. ᓄᒫᓱᖕᓂᕐᒥᒃ ᖁᕝᕕᐅᕐᓂᖅ ᕿᒃᓵᓇᖅᑐᒃᑰᕐᓂᖅ ᑕᖃᓇᖅᑐᒻᒪᕆᐊᓘᕙᒃᐳᖅ: ᐃᓱᒪᒃᑯᓪᓗ, ᑎᒥᑯᓪᓗ. ᐱᕕᒃᓴᖃᑦᑎᐊᕐᓂᐊᖅᐳᑎᑦ ᕿᒃᓵᓇᖅᑐᒃᑰᕈᓐᓇᕐᓂᖅ, ᐅᒡᒍᐊᕐᓂᒃᑰᕈᓐᓇᕐᓂᖅ, ᓄᒫᓱᕐᓇᖅᑐᒃᑰᕈᓐᓇᕐᓂᖅ. ᐃᓄᐃᑦ ᖃᐅᔨᒪᑎᖃᑦᑕᕐᓗᒋᑦ ᐃᑲᔪᖅᓱᖅᑕᐅᔭᕆᐊᖃᕐᓂᕐᓂᒃ. ᐃᓕᓐᓂᐊᖅᑎᑦᑎᖃᑕᕐᓗᑎᑦ ᐊᓯᖕᓂᒃ ᖃᓄᖅ ᑕᐃᒃᑯᐊ ᐃᑲᔪᕈᓐᓇᕐᒪᖔᑕ. ᐊᐅᓚᔾᔭᒋᐊᖃᑦᑕᕐᓗᑎᒃ, ᐃᓕᖕᓂᒡᓗ ᑲᒪᑦᑎᐊᔪᓴᕐᓗᑎᑦ: ᐅᖃᓕᒫᖃᑦᑕᕐᓂᖅ, ᑎᑎᕋᖃᑦᑕᕐᓂᖅ ᐊᑐᖃᐅᔭᕐᓂᒃ ᐅᓪᓗᒥ ᐅᓂᒃᑳᖅᑐᓂᒃ, ᐱᓱᖃᑦᑕᕐᓂᖅ, ᑕᖅᒪᖔᓗᒡᓗ ᐊᓂᖅᓵᖅᑐᕆᐊᑦᑎᐊᖃᒃᑕᕐᓂᖅ ᐃᑲᔪᕐᓂᖃᕈᓐᓇᑦᑎᐊᕐᒪᑦ ᐊᒻᒪᓗ ᐱᐅᔪᑎᓂᒃ ᖃᓄᐃᓕᐅᕈᑎᖃᖅᐸᖕᓂᖅ (ᑕᑯᒋᐊᕐᓗᒋᑦ ᑕᐃᒃᑯᐊ ᖃᕆᑕᐅᔭᒃᑯᑦ ᑕᑯᓂᐊᖅᑕᐅᕝᕕᖏᑦ ᐅᕙᓃᑦᑐᑦ ᑐᕌᕉᑎᓕᒻᒥ www.de-stress.ca−ᒥ ᑐᑭᓯᒋᐊᑦᑎᐊᒃᑲᓐᓂᕈᒪᒍᕕᑦ ᐅᔾᔨᖅᑐᑦᑎᐊᕈᓐᓇᕐᓂᕐᒥᒃ ᐊᒻᒪᓗ ᐊᒃᓱᕈᕐᓇᖅᑐᒃᑰᕈᑎᒋᔭᕐᓂᒃ ᖃᓄᖅ ᐃᒃᐱᖕᓂᐊᔪᓃᕐᓂᖅᓴᐅᔪᓐᓇᕐᓂᖅ.

ᐊᒥᓱᓂᒃ ᐃᖕᒥᓃᕐᕕᐅᓯᒪᔪᑦ ᕿᒪᒃᑕᐅᓯᒪᓕᖅᑐᑦ ᖃᐅᔨᖃᑦᑕᖅᓯᒪᔪᑦ ᐃᑲᔪᕐᓂᖃᕐᓂᖏᓐᓂᒃ ᐃᓵᒃᓯᒪᔪᓐᓇᕐᓂᖅ ᐃᑲᔪᖅᑎᐅᔪᓐᓇᖅᑐᓄᑦ ᐱᖃᑎᐊᓗᒃᑯᖏᓐᓄᑦ, ᐃᓚᒥᓄᓪᓗ, ᐃᓕᓐᓂᐊᖅᓯᒪᔪᓄᓪᓗ ᐱᓕᕆᔨᐅᔪᓄᑦ ᑕᒪᒃᑯᓂᖓ, ᖃᓄᐃᓕᐅᕈᑎᖃᕈᓐᓇᕐᓂᖏᓐᓄᑦ ᐃᒃᐱᖕᓂᐊᔭᒥᓂᒃ. ᐊᓯᖏᑦ ᖃᐅᔨᒪᖃᑦᑕᖅᑐᑦ ᐅᖃᓕᒫᖃᑦᑕᕋᒥᒃᖅ ᐱᔾᔪᑎᖃᖅᑐᓂᒃ ᐃᖕᒥᓃᖅᓯᒪᔪᖃᖅᑐᒥᒃ ᔭᒐᐃᔭᐅᓯᒪᔪᓂᒃ ᐊᒻᒪᓗ ᐃᖕᒥᓂᒃ ᒥᐊᓂᕆᑦᑎᐊᕆᐊᕐᓂᖅ ᑲᒪᑦᑎᐊᕐᓗᑎᒃ ᕿᒪᒃᑕᐅᓯᒪᓕᖅᑐᑦ ᐃᑲᔪᕐᓂᖃᖅᓯᒪᔪᑦ. ᐃᓚᖏᑦ ᐃᓚᐅᓕᖃᑦᑕᖅᑐᑦ ᐃᖕᒥᓃᖅᑐᖃᖅᑐᓂᒃ ᓄᒫᓱᓕᖅᓯᒪᔪᓂᒃ ᕿᒃᓵᒃᑐᓂᒡᓗᓐᓃᑦ ᑎᒥᖁᑎᒋᔭᐅᔪᓂᒃ ᐃᑲᔪᖅᑕᐅᔾᔪᑎᒋᓪᓗᒋᑦ ᐊᒻᒪᓗ ᖃᐅᔨᒪᔾᔪᑎᒃᓴᕆᓪᓗᒋᑦ ᐊᓯᖏᓐᓂᒃ ᕿᒪᒃᑕᐅᓯᒪᖕᒥᔪᓂᒃ ᐃᖕᒥᓃᕐᕕᐅᓚᐅᖅᓱᑎᒃ. ᐊᓯᖏᑦᑕᐅᖅ ᓱᓕ ᐃᓚᐅᕙᒃᑭᕗᑦ ᓄᓇᓕᖕᓂ/ᑲᓇᑕᓕᒫᒥᓗᓐᓂᑦ ᐃᖕᒥᓃᖅᑎᑦᑎᑕᐃᓕᒪᓂᕐᒧᑦ ᑲᑐᔾᔨᖃᑎᒌᖑᔪᓂᒃ, ᓂᐱᖃᖅᐸᓕᖅᓱᑎᒃ ᐊᒻᒪᓗ ᐱᓕᕆᖃᑎᒌᒃᐸᒃᓱᑎᒃ ᐃᖕᒥᓃᖅᑎᑦᑎᑲᓐᓂᖅᑕᐃᓕᒪᓂᕐᒧᑦ ᓄᓇᓕᖕᓂ.

ᐃᓵᒃᓯᒪᒋᑦ ᐃᓅᓯᕐᒧᑦ ᑲᑎᒪᔨᖏᑦ ᒫᓐᓇᐅᔪᖅ ᑲᑎᖅᓱᐃᕙᓪᓕᐊᓕᖅᑐᑦ ᐱᑕᖃᕐᓂᖏᓐᓂᒃ ᐃᖕᒥᓃᖅᓯᒪᔪᓄᑦ ᕿᒪᒐᐅᔪᓂᒃ ᐊᑐᒐᒃᓴᐅᔪᓐᓇᖅᑐᓂᒃ ᐃᑲᔫᑎᒃᓴᓂᒃ, ᐅᖃᕐᕕᒃᓴᐅᔪᓐᓇᖅᑐᓂᒃ ᐃᑲᔪᖅᑎᓂᒃ ᐊᒻᒪᓗ ᐃᑲᔫᑎᒃᓴᓄᑦ ᐱᔨᑦᑎᕋᐅᑎᓂᒃ ᐊᑐᐃᓐᓇᐅᔪᓐᓇᖅᑐᓂᒃ ᑕᒪᐃᓐᓂᒃ ᓄᓇᓕᓕᒫᓂ ᓄᓇᕗᒻᒥ. ᖃᐅᔨᒪᔭᖃᕈᕕᑦ ᖃᓄᐃᑦᑐᑐᐃᓐᓇᑦᑎᐊᓂᒃ ᐊᑐᒐᒃᓴᐅᔪᓐᓇᖅᑐᓂᒡᓗᓐᓃᑦ ᐃᑲᔫᑎᒃᓴᓂᒡᓗᓐᓃᑦ ᓄᓇᔅᓯᓐᓂ, ᐊᑏᑐᖅ ᐅᖃᐅᓯᕆᓂᐊᖅᐸᑎᑦ ᐅᕙᑦᑎᓐᓂᒃ ᐅᕙᓂ ᑐᕌᕈᑎᓕᖕᓂ embracelife@inuusiq.com ᐊᒻᒪᓗ ᑐᓴᐅᒪᔭᐅᑎᖃᑦᑕᕐᓗᒋᑦ ᖃᐅᔨᒪᔭᑎᑦ ᐅᕙᑦᑎᓐᓄᑦ ᑕᐃᒫᒃᑕᐅᖅ ᑐᓴᐅᒪᔭᐅᑎᓐᓂᐊᕐᒥᒐᑦᑎᒍᑦ ᐊᓯᑦᑎᓐᓄᑦ.

ᐱᓕᕆᐊᖃᖅᐸᓪᓕᐊᓂᑦᑎᓐᓂᒃ ᓴᓇᔭᐅᑎᑦᑎᓂᖅ ᓇᓗᓇᐃᒃᑯᑎᒃᓴᓂᒃ ᒪᓕᒃᑕᐅᔪᓐᓇᕐᓂᐊᖅᑐᓂᒃ ᕿᒪᒃᑕᐅᓯᒪᓕᖅᑐᓄᑦ ᐃᖕᒥᓃᖅᓯᒪᔪᓄᑦ ᓄᓇᕗᒻᒦᓐᓇᖅ, ᐅᑯᐊ ᐊᑖᓃᑦᑐᑦ ᑎᑎᕋᕈᑕᐅᓯᒪᔪᑦ ᐊᑐᖅᑕᐅᓂᐊᖅᐳᑦ:

ᒪᒃᐱᒐᕐᒧᑦ ᒪᓕᒃᑐᒧᑦ ᑲᔪᓯᓕ: ᐃᑲᔪᕐᓂᖅ ᐱᖃᑎᐊᓗᒋᔭᕐᓂᒃ/ᐱᖃᑎᒋᕙᒃᑕᕐᓂᒃ