single_need_help

ᐃᓱᒪᖃᑦᑕᖅᓯᒪᕕᓪᓖ ᐃᖕᒥᓃᕈᒪᓂᕐᒥᒃ ᐃᒃᐱᖕᓂᐊᕐᒪᖔᖅᐱᑦ, ᓲᕐᓗ ᓇᒡᓕᑎᖃᖏᓂᕐᒥᒃ ᑕᖄᓂ? ᐃᓱᒪᓯᒪᓕᖅᐲᑦ ᑭᓯᐊᓂᐅᓕᕐᓂᖅ ᐃᖕᒥᓃᕈᕕᑦ? ᐊᒃᓱᕐᓇᖅᑐᒃᑰᕈᑎᖃᖅᐲᑦ ᐊᔪᕐᓇᓗᐊᖅᑑᔮᓕᖅᑐᓂᒃ? ᐃᓱᒪᖃᓕᖅᐱᑦ ᐃᑲᔪᖅᑕᐅᔪᓐᓇᐃᓕᓯᒪᓂᕐᒥᒃ ᐊᓯᖏᓐᓄᑦ ᑭᓇᑐᐃᓐᓇᕐᒧᑦ? ᐃᒃᐱᒋᓕᖅᐲᑦ ᐃᓕᖕᓂᒃ ᐃᑲᔪᕈᓐᓇᔾᔮᖏᓐᓂᖏᓐᓂᒃ? ᐊᒃᓱᓵᒍᑎᒋᔭᑎᑦ ᓄᖃᖁᑐᐃᓐᓇᓕᕋᓗᐊᖅᑕᑎᑦ? ᐊᓯᖕᓄᑦ ᑐᑭᓯᔭᐅᔪᓐᓇᖏᓐᓂᕐᓂᒃ?

ᑕᐃᒪᐃᓚᐅᖅᓯᒪᒋᕗᑦ ᓯᕗᓂᐊᒍᑦ. ᐃᒃᐱᒋᕙᓚᐅᖅᑐᖓ ᓇᒡᓕᒋᔭᐅᖏᓐᓂᕐᒥᒃ ᐃᓱᒪᒋᔭᐅᖏᓐᓂᕋᓂᒡᓗ. ᐊᒃᓱᕈᕐᓇᖅᑐᒃᑰᖅᓯᒪᓚᐅᕋᒪ ᐊᒥᓱᓂᒃ ᐅᑭᐅᖃᓕᕋᒪ 16−ᓂᒃ. ᐊᒥᓱᐃᖅᓱᖓ ᐃᖕᒥᓃᕋᓱᐊᖅᐸᓚᐅᖅᑐᖓ. ᐃᓱᒪᐃᓐᓇᖅᐸᓚᐅᕋᒪ ᐊᓯᓐᓄᑦ ᐃᑲᔪᖅᑕᐅᔪᓐᓇᖏᓐᓂᖅ. ᐃᒃᐱᒋᔭᓗᒃᑲ ᓄᖃᖁᑐᐃᓐᓇᓕᓚᐅᕋᒃᑭᑦ ᑕᒪᕐᒥᑦᑎᐊᖅ, ᐱᓗᐊᖅᑐᒥᒃ ᐃᓱᒪᒋᔭᓗᑐᐃᓐᓇᒃᑲ ᓂᐊᖁᓐᓂ.

ᐅᖃᖅᐸᓚᐅᖏᓚᖓ ᑐᑭᓯᔭᐅᓂᐊᕋᓱᖏᓗᐊᒧᑦ ᐃᓗᒃᑯᑦ ᐃᒃᐱᖕᓂᐊᔭᒃᑲᓂᒃ. ᑭᓯᐊᓂ ᑕᐃᔅᓱᒪᓂ ᐅᖄᕐᔪᒍᓐᓇᖅᓯᔭᕆᐅᓚᐅᖅᓯᒪᒐᒪ. ᐃᓗᓕᒥᐅᑕᕆᑐᐃᓐᓇᕈᓐᓇᐃᓪᓕᓚᐅᕋᒃᑯ. ᐊᖏᓗᐊᖅᑐᐊᓗᖕᒥᒃ ᐋᓐᓂᐊᕈᑎᖐᓐᓇᖅᑑᓗᒋᓕᓚᐅᕋᒃᑯ ᐃᓱᒪᒃᑯᑦ, ᐅᒡᒍᐊᕆᔮᓗᒋᓕᖅᑕᒃᑲᓐᓂᒡᓗ ᐊᑐᖃᑦᑕᓕᓚᐅᕋᒪ ᓈᒻᖏᑦᑐᓂᒃ.

ᐅᓪᓗᒥᓕ, ᑕᐃᒪᔅᓴᑕᐃᓐᓇᖅ, ᐅᔾᔨᖅᑐᕈᓐᓇᖅᓯᕗᖓ ᐃᓄᖃᐅᕐᓂᖏᓂᒃ ᑕᖄᓂ ᓈᓚᒍᒪᔪᓐᓇᖅᑐᓂᒃ ᖃᓄᓕᒫᕐᓗ ᐱᔪᓐᓇᕐᓂᕐᒥᓂᒃ ᐃᑲᔪᕋᓱᐊᕈᒪᔪᓂᒃ ᐅᕙᓐᓂᒃ ᖃᓄᑐᐃᓐᓇᖅ. ᑕᑯᓕᓚᐅᕋᒪ ᐃᓄᐃᑦ ᓇᒡᓕᒍᓱᒃᐸᖕᓂᖏᓐᓂᒃ, ᐃᓕᖕᓂᒡᓗᓐᓃᑦ ᖃᐅᔨᒪᓗᐊᖏᒃᑲᓗᐊᕈᑎᒃ, ᑐᑭᓯᐊᓇᓱᖃᑦᑕᕐᒪᑕ ᒥᑭᔫᒐᓗᐊᒥᒃ ᐃᓕᖕᓂᒃ, ᑐᑭᓯᔭᐅᕌᓂᒍᓐᓇᕐᓇᖏᒻᒪᑦ ᐃᓚᓂᒃᑯᑦ ᐃᓘᓐᓇᖏᓐᓂᒃ ᑕᒪᐃᓐᓂᒃ 100% ᐳᓴᓐᑎᓂᒃ…ᐃᒡᕕᑐᐊᖅ ᑭᓯᐊᓂ.

ᐃᑲᔪᖅᑕᐅᔪᓐᓇᖅᓯᓕᑕᐃᓐᓇᓚᐅᕋᒪ ᐃᑲᔪᖅᑕᐅᔭᕆᐊᖃᖅᑐᑐᖃᓘᓐᓂᕋᒪ, ᐊᒥᓱᓗᐊᖕᓂᒃ ᐅᓪᓗᒐᓵᓗᖕᓂᒃ ᐱᓇᓱᐊᕈᓯᒐᓵᓗᖕᓂᒡᓗ ᐊᒃᓱᕈᕐᓇᖅᑐᒦᖏᓐᓈᓗᒃᓱᖓ. ᐃᑲᔪᖅᑕᐅᓕᓚᐅᕋᒪ ᒫᓐᓇᐅᓕᖅᑐᖅ ᐃᓱᒪᒥᐅᑕᖃᐃᓐᓇᕈᓐᓃᕐᔫᒥᔪᖓ. ᑕᐃᒃᑯᓂᖓ ᐃᓱᒪᓕᕌᖓᒪ ᐃᓄᖕᓄᖓᐅᖃᑦᑕᓕᖅᑐᖓ ᐃᑲᔪᕈᓐᓇᖅᑐᓄᑦ, ᖃᓄᐃᓕᐅᕆᐊᓚᐅᖏᓐᓂᖏᓐᓂᒃ ᑐᑭᖃᖏᑦᑐᓐᓇᖅᑐᓂᒃ.

ᑕᐃᒪᐃᒪᑦ ᑕᒡᒐ, ᑐᑭᓯᐅᒪᖁᕙᒋᑦ ᐃᖕᒦᓂᖃᑦᑕᕐᓂᖅ ᐊᓯᑕᓕᐊᓗᒃ, ᐊᑐᒐᒃᓴᐅᔪᑑᖏᑦᑐᖅ. ᐊᒥᓱᓂᒃ ᐊᓯᑕᖃᖅᐳᖅ. ᐃᖕᒥᓃᕈᒪᓂᕐᒥᒃ ᐃᓱᒪᓕᑐᐊᕈᕕᑦ, ᐃᓱᒪᒋᑦᑎᐊᖄᕐᓂᐊᖅᐸᐃᑦ ᖃᓄᐃᓕᐅᕈᑎᒋᒋᐊᓚᐅᖏᓐᓂᕐᓂᒃ. ᐃᓱᒪᒋᓗᒋᑦ ᐃᓚᑎᓪᓗ ᐱᖃᑎᐊᓗᒃᑯᑎᓪᓗ, ᖃᓄᖅ ᐋᓐᓂᖅᓯᒪᓂᐊᕐᒪᖔᑕ ᑕᐃᒪᐃᓕᐅᕋᔭᕈᕕᑦ, ᑭᐅᔭᐅᔪᓐᓇᖏᔾᔭᖏᑦᑐᓂᒃ. ᓲᕐ ᑕᐃᒪᐃᓕᐅᕋᔭᖅᐱᑦ?

ᐱᒃᐱᒍᓱᓕᖅᑎᑦᑎᔪᓐᓇᕐᓂᖅ ᓲᕐᓗ ᐸᓯᔭᒃᓴᐅᓂᖏᓐᓂᒃ, ᐃᖕᒥᓂᒡᓗ ᐸᓯᒃᓯᓕᕐᓗᑎᒃ ᖃᓄᐃᓕᓯᒪᓕᕐᓂᕐᓄᑦ. ᕿᒪᖕᓂᐊᖅᑕᑎᑦ ᓯᖁᒥᓯᒪᓕᕐᓗᑎᒃ ᐆᒪᑎᐊᒍᑦ ᐊᑯᓂᐊᓗᒃ ᒪᒥᓇᓱᒋᐊᖃᕐᓂᐊᖅᑐᒥᒃ. ᐊᖓᔪᖄᒃᑯᑎᑦ ᐊᓈᓇᐃᓪᓗ ᐊᑖᑕᐃᓪᓗ ᐊᒃᓱᕈᕐᓇᖅᑐᒻᒪᕆᐊᓗᒃᑰᕐᓂᐊᖅᑐᑦ ᐃᖕᒥᓃᕈᕕᑦ. ᐃᒃᐱᖕᓂᐊᖅᑎᑦᑎᓇᔭᖅᑐᑎᑦ ᐊᖓᔪᖄᕐᓂᒃ ᓲᕐᓗ ᐊᔪᖅᑐᐊᓗᒃᑎᑐᑦ ᐃᓱᒪᓂᕐᒥᒃ, ᐃᑲᔪᖏᓗᐊᐸᓚᐅᕐᓂᖏᓐᓂᒃ, ᓇᒡᓕᒍᓱᖏᓗᐊᓚᐅᕐᓂᖏᓐᓂᒃ, ᐱᑕᖃᖏᓗᐊᖃᑦᑕᓚᐅᕐᓂᖏᓐᓂᓗᓐᓂᑦ ᐃᓕᖕᓄᑦ. ᕿᒪᑐᐃᓇᕐᓂᐊᖅᑕᑎᑦ ᐃᖃᐅᒪᕙᖕᓂᐊᓕᖅᑕᖏᓐᓂᒃ ᐊᔾᔨᖁᑎᕕᓂᐊᓗᖕᓂᒃ ᐱᕈᖅᓴᕙᓪᓕᐊᓚᐅᕐᓂᕐᓂᒃ.

ᐃᓱᒪᒋᓗᒋᓪᓗ ᐱᖃᑎᐊᓗᒃᑯᑎᑦ? ᑭᓇᒧᓪᓕ ᐸᒡᕕᓴᖅᑕᐅᖃᑦᑕᓚᖓᓕᕐᒪᑕ? ᑭᓇᒥᓪᓕ ᖃᓄᐃᓕᐅᖃᑎᖃᖅᐸᓐᓂᐊᕐᒪᑕ ᓱᐊᖓᔭᐅᒍᑕᐅᓕᕈᓐᓇᕐᒥᔪᓂᒃ? ᑭᓇᒥᓪᓕ ᐃᒡᓚᖃᑎᖃᕐᓂᐊᓕᕐᒪᑕ, ᑭᓇᒧᓪᓗ ᐅᖃᐅᓯᐅᖁᖏᑕᖏᓐᓂᒃ ᐅᖃᕐᕕᒃᓴᖃᕐᓂᐊᓕᕐᒪᑕ? ᐱᖃᑎᐊᓗᒃᑯᑎᑦᑕᐅᖅ ᑕᐃᒪᓕᐅᑐᐃᓐᓇᕆᐊᖃᕐᒥᔪᑦ ᐊᑐᕐᓂᐊᖅᑕᕐᓂᒃ. ᑕᐃᒪᐃᓕᖓᕈᒋᔭᕋᕖᑦ? ᐱᖃᑎᐊᓗᒃᑯᑎᑦ ᐃᖕᒥᓃᑐᐃᓐᓇᕈᓇᕐᒥᖕᒪᑕ ᐃᓕᖕᓂᒃ ᑭᖑᓂᖃᓈᖅᓯᓗᐊᒧᑦ ᐊᖏᔪᐊᓗᖕᒥᒃ.

ᐊᑏᑐᖅ ᐃᓱᒪᒋᑐᐃᓐᓇᑲᐃᓐᓇᓚᐅᕈᖅ ᐊᑐᒐᒃᓴᐅᖏᑦᑐᐊᓗᖕᒥᒃ ᐊᑐᓚᐅᖏᓂᕐᓂᒃ, ᐅᑎᕐᕕᒃᓴᐃᕈᑎᒋᓚᖓᒐᕕᑦ. ᓴᐱᓕᖅᑕᐃᓕᒋᑦ, ᐊᒥᓱᐊᓘᖕᒪᑕ ᓱᓕ ᐃᓅᓯᕐᒥᒃ ᐊᑐᒐᒃᓴᐃᑦ. ᓱᓕᔪᕆᔪᓐᓇᖅᑕᕐᒪᑕ, ᐊᒥᓱᐊᓗᖕᓂᒃ ᐱᑕᖃᓕᒃ. ᑲᔪᓯᓇᕐᓂᕈᒪ, ᐊᔪᖏᔪᑎᑕᐅᖅ.

ᑕᐃᒪᑐᖅ ᐅᓂᒃᑳᕆᔭᕋ ᐃᑲᔪᕐᓂᖃᕈᓐᓇᕐᓂᐊᖅᐳᖅ, ᐊᑕᐅᓯᕐᒥᒡᓗᓐᓃᑦ ᐃᓄᖕᒥᒃ, ᖁᕕᐊᓱᖕᓂᐊᖅᑐᖓ!!

ᒪᒃᐱᒐᕐᒧᑦ ᒪᓕᒃᑐᒧᑦ ᑲᔪᓯᓕ: ᐃᔨᒃᑲᒃ ᑕᑯᓯᒪᔭᖏᓐᓂᒃ