cmb_0142

ᐃᖕᒥᓃᓯᒪᓂᖅ, ᐃᓱᒪᒃᑯᑦ ᐋᓐᓂᐊᕈᑎᖃᕐᓂᖅ ᐊᒻᒪᓗ ᐋᖓᔭᕐᓇᖅᑐᓂ ᐊᑐᕐᓂᕐᓗᖕᓂᖅ ᐊᒃᑐᖅᓯᓯᒪᕗᖅ ᐃᓚᑦᑎᓐᓂᒃ, ᐃᓄᖕᓂᒃ ᓄᓇᓕᖕᓂ ᐃᒃᐱᐊᕐᔪᖕᒥᒃ ᐊᒻᒪᓗ ᓄᓇᕗᒻᒥ. ᐅᖃᐅᓯᐅᓂᖏᓐᓂᒃ ᑕᒪᒃᑯᐊ ᐊᑲᐅᖏᓕᐅᕈᕼᐅᔪᑦ ᓄᓇᕗᒻᒥ ᑐᑭᓕᐅᕐᓇᖏᒪᑦ. ᑕᐃᔅᓱᒪᓂᓕ ᐱᐅᓯᑐᖃᕆᔭᐅᕙᓚᐅᖅᑐᓂ, ᐃᓄᐃᑦ ᐃᓱᒪᕙᓚᐅᖏᒻᒪᑕ ᐊᐅᓚᑦᑎᔪᒪᓂᕐᒥᓂᒃ ᐱᖃᑎᒋᔭᒥᓂᒃ ᐅᕝᕙᓗᓐᓃᑦ ᐃᖕᒥᓃᕈᒪᓂᕐᒥᒃ ᐱᔾᔪᑕᐅᓪᓗᑎᒃ ᒥᑭᔫᑎᑦ ᐊᑲᐅᖏᓕᐅᕈᑕᐅᔪᑦ ᐊᓂᒍᑎᔭᕆᐊᖃᕋᓱᒋᔭᖏᓐᓂᒃ ᐃᓅᖏᓐᓇᕐᕈᓐᓇᕐᓂᐊᕋᒥᒃ. ᑭᓯᐊᓂᓕ ᒫᓐᓇᐅᓕᖅᑐᖅ ᐊᒥᓲᓂᖅᓴᐅᓕᕐᒪᑕ ᐊᑲᐅᖏᓕᐅᑕᐅᕙᓕᖅᑐᑦ ᓵᖓᔭᐅᕙᓕᖅᑐᑦ ᐃᓄᖕᓄᑦ ᐃᓅᓯᕆᔭᖏᓐᓂ ᐅᓪᓗᒥ. ᐊᔾᔨᒌᖏᓐᓂᖃᕐᒪᑕ ᐅᑯᓇᓂ, ᑕᐃᒃᑯᐊ ᐊᒃᓱᕈᕆᐊᓖᑦ ᐃᓅᓇᓱᐊᕐᓂᖏᓐᓂᒃ ᐊᖏᔪᒥᒃ ᐊᔾᔨᒋᖏᒻᒪᑕ ᐃᓄᖏᓐᓂᒃ ᐊᒃᓲᕈᑎᖃᖅᐸᓕᖅᑐᓂᒃ ᐃᓅᔪᓐᓃᕈᒪᓂᕐᒧᑦ. ᐃᓱᒪᓇᖅᑐᖅ ᐅᓂᒃᑲᐅᓯᕐᒥᒃ ᑐᓴᓚᐅᖅᓯᒪᔭᕋᓂᒃ ᐆᒥᖓ: ᐃᓄᒃ ᑐᖁᒍᓂ ᐃᖕᒥᓃᕐᓂᕐᒥᓄᑦ ᐊᒻᒪᓗ ᐊᒥᓲᖏᑦᑐᓂᒃ ᐃᑲᕐᕋᓂᒃ ᑭᖑᓂᐊᒍᑦ ᐃᓄᒃ ᐃᓅᓇᓱᐊᖅᓯᒪᔪᖅ − ᑐᖁᓪᓗᓂ ᑳᓐᓴᒥᒃ ᐋᕿᒃᑕᐅᔪᓐᓇᖏᑦᑐᒥᒃ ᖃᓂᒪᓂᕐᒥᒃ.

ᐃᓱᒪᓇᖅᑐᖅ ᓱᐴᖅᑐᒐᕐᓘᑏᑦ ᒥᐊᕆᐅᐋᓇᐃᑦ ᑕᒪᐃᓐᓂᑦᑎᐊᖅ ᐃᓅᓯᕆᔭᐅᔪᓂᒃ ᐊᔪᖅᓴᕈᑕᐅᓕᖅᐸᒃᑐᑦ ᐱᕈᖅᓴᐃᑦᑎᐊᕈᓐᓇᕐᓂᕐᒧᑦ ᓄᑕᕋᑦᑎᓐᓂᒃ, ᐱᓕᕆᕕᒃᓴᖅᑖᕈᓐᓇᕐᓂᖅ, ᑮᓇᐅᔭᓂᒃ ᐊᑐᖅᑐᒃᓴᓂᒃ ᐊᑐᑦᑎᐊᕈᓐᓇᕐᓂᕐᒧᑦ, ᐃᓕᓐᓂᐊᕆᐊᕈᓐᓇᕐᓂᕐᒧᓪᓗ, ᐱᔾᔪᑎᒋᓗᒍ ᐊᑐᓕᖅᓱᒍ ᐊᒃᓱᐊᓗᒃ ᐅᐃᕆᓐᓇᕐᓂᖓᓄᑦ ᑕᐃᒃᑯᓄᖓ ᓱᐳᖅᑐᖃᑦᑕᓕᖅᓱᓂ. ᐅᕙᖓᑦᑕᐅᖅ ᐊᑐᖅᐸᒃᑲᒪ, ᑕᓪᓕᒪᐅᓕᖅᑐᓂᖃᐃ ᐊᕐᕋᒎᓕᖅᑐᓂ. ᐊᒃᑐᖅᓯᓯᒪᓕᕐᓕᒪᑦ ᐃᓅᓯᕋᓂᒃ, ᐊᓈᓇᓐᓂᒃ, ᐃᓕᓐᓂᐊᕐᕕᓐᓂᒃ, ᐱᖃᓐᓈᓐᓂᒃ, ᐊᒻᒪᓗ ᓄᑲᒃᑯᒃᑲᓂᒡᓗ. ᐃᓚᒃᑲ ᐊᑐᖁᓇᔭᖏᑦᑎᐊᖅᑕᒃᑲ ᐊᑐᖅᓯᒪᔭᒃᑲᓐᓂᒃ. ᑕᐃᒫᒡᓗ ᐃᒃᐱᖕᓂᐊᖁᖏᑦᑎᐊᖅᓱᒋᑦ. ᒪᓕᒍᒥᓇᖅᑑᓱᕆᔭᐅᕙᒃᑲᒪ ᑕᐃᒃᑯᓄᖓ, ᑭᓯᐊᓂ ᓱᕙᓕᑭᐊᖑᓕᖅᑐᓂᒃ ᐊᑐᖅᐸᓕᖅᑐᖓ ᐃᓱᒪᒋᔭᑐᐊᕆᓪᓗᒍ ᖃᓄᖅ ᐅᕙᖓᓗ ᐱᖃᓐᓈᕋᓗ ᓱᐳᖅᑐᕐᓗᒍᑎᒃᓴᓂᒃ ᐱᔪᓐᓇᕐᓂᐊᓕᕐᒥᖕᒪᖔᓐᓄᑦ, ᐅᔭᕋᓯᒪᓂᐊᕋᓐᓄᒃ. ᓱᐳᖅᑐᐊᓂᒃᑯᒪ, ᑕᒪᓐᓄᑦᒃ ᐱᐅᒋᔪᓐᓃᖃᑦᑕᐅᑎᓪᓗᓄᒃ ᐅᕝᕙᓗᓐᓃᑦ ᓂᖓᐅᒪᖃᑦᑕᐅᑎᓕᖅᓱᓄᒃ ᐱᒃᑲᓐᓂᕈᒪᓂᑯᒧᑦ, ᐱᔭᕆᐊᖃᖏᑕᑦᑎᓐᓂᒃ ᑮᓇᐅᔭᓂᒡᓗ ᐊᑐᕆᐊᖃᓂᑦᑎᓐᓄᑦ. ᑕᒪᒃᑯᐊ ᑎᑎᕋᓕᕋᒃᑭᑦ ᑐᑭᖃᖅᑐᔮᖏᒻᒪᑦ, ᐅᔾᔨᖅᑐᑎᐊᕆᐊᖃᓕᕋᒪ ᓄᖃᕆᐊᖃᓕᕐᓂᓐᓂᒃ ᐊᒻᒪᓗ ᐊᐅᓚᑦᑎᑦᑎᐊᕆᐊᖃᕐᓂᕋᓂᒃ ᐃᓅᓯᓐᓂᒃ, ᖃᓄᐃᑦᑐᓃᕐᓂᐊᕋᒪ, ᐱᑦᑎᐊᕐᓗᖓᓗ ᐊᒻᒪᓗ ᓱᓕᔪᕆᔭᐅᔪᓐᓇᕐᓂᐊᕋᒪ ᓇᒡᓕᒋᔭᒃᑲᓐᓄᑦ.

ᑕᒪᒃᑯᐊ ᓵᓚᒃᓴᐅᓯᐊᕈᑕᐅᒐᓱᐊᖃᑦᑕᖅᐸᑕ ᐃᓄᖕᓄᑦ ᑐᑭᓯᐅᒪᔭᐅᓂᖅᓴᐅᓕᕈᓐᓇᖅᑐᑦ ᖃᓄᑎᒋ ᖃᓄᐃᓕᐅᖅᑐᖃᓕᕐᒪᖔᑦ ᐃᓅᓯᖏᓐᓂᒃ, ᐅᕙᓐᓄᓪᓗᓐᓃᑦ. ᓄᓇᑎᓐᓂᒃ ᐊᐅᓪᓚᖅᐸᓚᐅᕋᓗᐊᕋᒪ ᖃᓄᐃᓕᐅᖃᑕᐅᓚᖓᓪᓗᖓ ᓲᕐᓗ ᐱᖑᐊᖃᑕᐅᔪᓂᒃ ᓵᓚᒃᓴᕋᓱᐊᓂᐊᖅᑐᓂᒃ ᐃᓚᐅᓂᕐᒥᒃ, ᒪᒃᑯᒃᑐᓂᒃ ᒐᕙᒪᒋᔭᐅᖑᐊᖅᑐᓂᒃ, ᐅᑭᐅᖅᑕᖅᑐᒥ ᒪᒃᑯᒃᑐᑦ ᑲᓇᑕᐅᑉ ᓯᓚᑖᓃᑦᑐᓂᒃ ᐊᒻᒪᓗ ᐃᓕᓐᓂᐊᖅᑎᓂᒃ ᓯᑯᒦᖃᑕᐅᔪᓂᒃ. ᐋᖓᔮᕐᓇᖅᑐᖅᑐᕆᐊᖃᓚᐅᖏᓚᖓᓗᓐᓃᑦ ᐱᔭᕆᐊᖃᖏᓐᓇᒃᑭᑦ. ᑕᐅᑐᒃᑕᒃᑲᓂᒃ, ᑕᒪᐃᓐᓂᒃ ᐱᖁᑎᓂᒃ ᐅᕙᑦᑎᓐᓂᒡᓗ ᓴᐱᓕᖅᓯᒪᔪᕕᓂᐅᔪᔮᖅᑐᒍᑦ ᐊᒃᓲᕈᑎᒋᓯᒪᖏᑦᑎᐊᖅᓱᒋᑦ.

ᒫᓐᓇᐅᓕᖅᑐᕐᓕ ᐃᓄᐃᑦ ᐃᓱᒪᓘᑎᖃᖅᐸᓕᕐᒪᑕ, ᓄᒫᓱᓕᖅᓯᒪᕙᓕᖅᓱᑎᒃ ᕿᒃᓵᒍᑎᖃᓕᖅᓱᑎᒃ, ᐆᒻᒪᑎᖃᑦᑎᐊᖅᑐᔮᕈᓐᓃᖅᓱᑎᒃ ᓇᒡᓕᖕᓂᖃᕈᓐᓇᕐᓂᕐᒥᒃ ᐊᓯᒥᓂᒃ ᓄᓇᕗᒻᒥ. ᐃᓐᓇᑐᖃᐃᓪᓗ ᐃᓄᐃᓪᓗ ᐃᑲᔪᖅᑎᐅᒋᐊᖃᖅᐸᓚᐅᖅᑐᑦ ᐃᓱᒪᒋᓕᖅᑕᕗᓪᓕ ᐱᑕᖃᕆᐊᖃᓕᖅᓱᑎᒃ (ᑕᒪᓐᓇ ᐅᖃᐅᓯᐅᓂᖓᓂᒃ ᐃᖃᐃᑎᒋᕙᕋ ᑕᒑᖅ ᑰᕐᓕᐅᑉ ᐅᖃᐅᓯᕆᓯᒪᔭᖏᓐᓂᒃ). ᖃᐅᔨᒪᓂᖃᕐᓂᖅ ᓴᖏᓂᖃᕈᑕᐅᔪᓐᓇᕐᒪᑦ ᐱᐅᓂᖅᓴᖅᓯᐅᕈᓐᓇᓂᕐᒧᑦ ᐊᒻᒪᓗ ᐊᓯᖑᖅᑎᑦᑎᔪᓐᓇᕐᓂᕐᒧᑦ. ᒪᕐᕉᖕᒥᒃ ᐊᔾᔨᒌᖏᑦᑑᒃ ᐱᐅᓯᕆᔭᐅᔪᓐᓇᖅᑑᖅ ᐃᓅᓯᕐᓂᒃ, ᓴᖏᔫᓗᑎᒃ, ᐃᖕᒥᓂᒃ ᐱᓇᓱᒍᓐᓇᑦᑎᐊᕐᓗᑎᒃ ᐊᒻᒪᓗ ᐃᖕᒥᓂᒃ ᓈᒻᒪᒍᓱᒡᓗᑎᒃ. ᑕᒪᓐᓇ ᓈᒻᒪᒍᓱᖕᓂᖅ ᐅᕙᑦᑎᓐᓂᒃ ᓴᕿᐅᒪᑲᓐᓂᕆᐊᖃᖅᐳᖅ, ᑕᐅᑐᒐᖃᕆᐊᖃᖅᑐᒍᑦ ᖃᓄᐃᓕᖓᖁᔭᑦᑎᓐᓂᒃ, ᑕᐅᑐᒐᖃᖅᐸᖏᑐᐊᕈᑦᑕ ᖃᓄᖅ ᐱᐅᓯᑎᑦᑎᒋᐊᒃᑲᓐᓂᕈᓇᖏᓇᑦᑕ ᓯᕗᓂᒃᓴᐅᑦᑎᐊᕙᐅᓕᕈᓐᓇᕐᓂᕐᒧᑦ.

ᓄᓇᓕᖕᓂ ᐱᑕᓕᒻᒪᕆᐊᓘᓕᖅᑐᓂ ᐃᒥᐊᓗᖕᒥᒃ, ᐋᖓᔭᕐᓇᖅᑐᓂᒃ, ᐃᖕᒥᓃᖅᐸᒃᑐᓂᒃ, ᐊᔪᕐᓇᖅᐸᓚᐅᖏᓚᖅ ᓱᓕᔪᖅᓴᕈᓐᓇᕐᓂᖅ ᐃᓄᐃᑦ ᓴᖏᓐᓂᖃᑦᑎᐊᖏᓐᓂᖏᓐᓂᒃ. ᓯᕗᓕᐅᖅᑎᒋᔭᕗᑦ ᖁᕕᐊᓲᑕᐅᕙᓚᐅᖏᑦᑐᑦ. ᐱᔭᕇᑦᑎᐊᕈᑎᒋᓯᒪᔭᕗᑦ ᖁᕕᐊᓲᑕᐅᕙᓚᐅᖏᓚᑦ, ᔭᒐᐃᓯᒪᓕᖅᑕᕗᓪᓗ ᐱᑕᖃᕈᓃᖅᓯᒪᔪᑦ ᐅᓂᒃᑳᖅᑕᐅᕙᓚᐅᖏᓚᑦ. ᒪᓕᒍᒥᓇᖅᓯᑎᑕᐅᓪᓗᑎᒃ ᓴᖏᔪᓂᒃ ᓯᕗᓕᐅᖅᑎᓄᑦ; ᐃᖏᖃᑦᑕᕆᐊᖃᖅᑐᒍᑦ ᓯᕗᓕᐅᖅᑎᑦᑎᓐᓄᑦ; ᒧᒥᕈᑎᒋᖃᑦᑕᕐᓗᒋᓪᓗ ᐱᔭᕆᖅᓯᒪᑦᑎᐊᖅᑕᕗᑦ; ᓴᖏᔫᒋᐊᖃᑦᑕᕐᓗᑕᓗ ᐊᔪᕐᓇᖅᑐᒃᑯᒥᒃ ᐊᑐᕐᓂᑦᑎᓐᓂᒃ. ᐃᓕᑦᑎᕚᓪᓕᕈᓐᓇᖅᑐᒍᑦ ᑕᒪᐃᓐᓂᑦᑎᐊᖅ, ᓯᓚᑦᑐᕈᓐᓇᖅᓱᑕᓗ, ᓂᕆᐅᖕᓂᕐᒥᓂᒡᓗ ᐱᑕᖃᓕᕈᓐᓇᖅᓱᓂ ᑕᒪᒃᑯᐊ ᐱᔾᔪᑕᐅᓪᓗᑎᒃ. ᑕᐃᒫᒃ ᑭᓯᐊᓂ ᑐᑭᓯᐅᒪᓕᕈᓐᓇᖅᑐᒍᑦ ᖃᓄᐊᓗᒃ ᐃᓅᖏᓐᓇᖅᓯᒪᖕᒪᖔᑦᑕ. ᐅᐱᓂᖃᕈᓐᓇᕐᓂᕐᒥᒃ ᓇᓂᓯᔪᓐᓇᖅᑐᒍᑦ ᐅᕙᑦᑎᓐᓂᒃ, ᐃᓅᖃᑎᑦᑎᓐᓂᒃ, ᐊᒻᒪᓗ ᓄᓇᕐᔪᐊᕆᔭᑦᑎᓐᓂᒃ. (ᑖᒃᑯᐊ ᐅᖃᐅᓯᐅᓂᖏᑦ ᐃᖃᐃᑎᒋᕙᒃᑲ ᐅᖃᐅᓯᕆᓚᐅᖅᑕᖏᓐᓂᒃ ᔅᑏᓯ ᐊᒡᓗᖅ ᒪᒃDᐋᓄᓪᑦ)

ᐃᒥᐊᓗ ᐊᖏᔪᒥ ᐊᓯᖑᖅᑎᑦᑎᓯᒪᖕᒪᑕ ᐃᓕᖅᑯᓯᑦᑎᓐᓂᒃ, ᐃᓄᐃᑦ ᐋᖓᔮᖅᐸᓕᕐᒪᑕ ᐊᑲᐅᖏᓕᐅᕈᑎᖃᓕᖅᓱᑎᒃ ᐅᕝᕙᓗᓐᓃᑦ ᓄᒫᓇᖅᑐᐊᓗᖕᒦᓕᖅᐸᒃᓱᑎᒃ , ᓂᖓᒍᑕᐅᓕᖅᓱᑎᒃ, ᐅᕝᕙᓗᓐᓂᑦ ᐃᖕᒥᓃᕈᑕᐅᓕᖅᐸᒃᓱᑎᒃ ᑕᐃᒃᑯᓄᖓ ᐃᖕᒥᓂᒃ ᐊᔪᕋᓱᒋᓕᖅᑐᓄᑦ. ᐃᒥᖅᓯᒪᔪᓃᕋᓗᐊᕋᒥᒃ, ᐅᖃᕈᓐᓇᖃᑦᑕᖏᓇᒥᒃ ᐅᖃᕈᒪᔭᕋᓗᐊᒥᓂᒃ ᐅᖃᕆᐊᖃᖅᑕᕋᓗᐊᒥᓂᒡᓗ ᐊᓯᒥᓄᑦ ᖃᐅᔨᒪᔭᐅᓂᐊᕐᒪᑦ ᖃᓄᖅ ᐃᒃᐱᒋᓕᕐᓂᕐᒥᓂᒃ ᐃᓗᒃᑯᑦ. ᑕᐃᓐᓇ ᐃᓄᒃ ᐅᖃᕈᓐᓇᖅᓯᓵᖅᐸᖕᒪᑦ ᐃᒃᐱᔭᒥᓂᒃ ᐊᒻᒪᓗ ᐃᓱᒪᒋᔭᒥᓂᒃ ᑭᓯᐊᓂ ᐋᖓᔮᓕᕌᖓᒥ. ᑕᐃᒪᐃᓕᖓᓪᓗᓂᓗ ᐊᓱᐃᓛᒃ, ᑐᓴᖅᑕᐅᔪᒪᖏᓚᖅ ᐅᖃᑦᑎᐊᔾᔭᖏᒻᒪᑦ, ᐅᖃᐅᓯᕆᑐᐃᓐᓇᓕᖅᓱᓂᒋᓪᓗ ᐊᓂᑎᑦᑐᒪᒧᑦ. ᐃᓅᓯᖅ ᐊᒃᓱᕈᕐᓇᖅᐸᖕᒪᑦ ᐃᓛᓂᑯᑦ, ᑐᑭᓯᐊᓂᒍᓐᓇᖏᑕᕋᓗᐊᕗᑦ ᑭᓯᐊᓂ ᓱᓕ ᐆᒃᑐᐃᓐᓇᕆᐊᖃᖅᐳᒍᑦ.

ᒪᒃᐱᒐᕐᒧᑦ ᒪᓕᒃᑐᒧᑦ ᑲᔪᓯᓕ: ᐃᖕᒥᓃᖃᑦᑕᕐᓂᖅ ᓄᓇᕗᒻᒥ