ᒪᒥᓴᖅᐸᓪᓕᐊᔪᓐᓇᕐᓂᖅ ᓇᒡᓕᒋᔭᐃᑦ ᐃᓅᔪᓐᓃᖅᓯᒪᓕᖅᑎᓪᓗᒍ ᐃᖕᒥᓃᓚᐅᖅᓱᓂ ᐊᑯᓂᐊᓘᕈᓐᓇᖅᐳᖅ.

pt_7500 copy

ᐃᓚᖏᓐᓂ, ᑕᕿᒐᓴᐅᔪᓂᒃ ᐊᑯᓂᐅᓂᖃᕈᓐᓇᖅᑐᖅ, ᐃᓚᖏᓐᓂᑦ ᐊᑯᓂᐅᓂᖃᖅᑎᒋᔪᓐᓇᕆᕗᖅ ᐊᒥᓱᒻᒪᕆᐊᓗᖕᓂᒃ ᐊᕐᕋᒍᒥᒃ. ᐊᒥᓱᓂᒃ, ᑕᐃᓐᓇ ᐊᐃᑉᐱᕆᔭᐅᕙᓚᐅᖅᑐᖅ ᑲᑉᐱᐊᓱᓕᖃᑦᑕᖅᐳᖅ ᐃᓄᖕᓂᒃ ᑭᓇᒃᑯᑐᐃᓐᓇᑦᑎᐊᖅᑐᓂᒃ, ᑐᕌᕐᕕᐅᓴᕋᐃᓐᓂᖅᐹᖑᔪᓐᓇᕐᓂᖏᓐᓄᑦ ᑎᒃᑯᐊᖅᑕᐅᓗᓂ ᐱᔾᔪᑕᐅᓂᕋᖅᑕᐅᓗᓂ. ᑕᒪᕐᓂᒃ ᐃᓄᐃᑦ ᐋᓐᓂᖅᓯᒪᓕᖅᐸᖕᒪᑕ, ᐃᓛᓂᒃᑯᓪᓗ ᐃᓄᐃᑦ ᑕᐃᒃᑯᐊ ᑕᒪᕐᒥᒃ ᐋᓐᓂᖅᓯᒪᖃᑕᐅᔪᐃᓐᓇᐅᓕᖅᑐᑦ ᐊᑭᕋᖅᑐᔭᓕᖅᐸᒃᓱᑎᒃ. ᑕᒪᕐᒥᒃ ᐃᓄᐃᑦ ᖃᓄᐃᓕᖓᓂᖏᑦ ᐊᔾᔨᒌᖏᒻᒪᑕ, ᑭᓯᐊᓂ ᐊᑕᐅᓯᕐᒥᒃ ᓈᒻᒪᖏᑦᑐᒥᒃ ᐊᔾᔨᒌᖕᓂᖃᓕᖅᐳᑦ. ᐋᓐᓂᖅᓯᒪᔪᑦ. ᐊᓯᐅᔨᓯᒪᓕᕐᒪᑕ ᐱᑕᖃᕈᓃᕐᒪᑦ ᓇᒡᓕᒋᓚᐅᖅᑕᖓᑦ, ᐊᓯᑕᖃᕐᓂᐊᕈᓃᖅᓱᓂᓗ.

ᐅᕙᓐᓄᓪᓕ ᐊᑯᓂᐊᓗᒃ ᐅᕙᓐᓂᒃ ᓇᓂᓯᓇᓱᒃᑐᔮᕆᐊᖃᓕᓚᐅᖅᓯᒪᕗᖓ. ᐳᐃᒍᓚᐅᕋᒪ ᐃᖃᐅᒪᔪᓐᓇᐃᓪᓕᓗᖓ ᑭᓇᐅᒐᓗᐊᕐᒪᖔᕐᒪ, ᖃᓄᖅ ᐃᓚᖃᕋᓗᐊᕐᒪᖔᕐᒪ. ᐃᓅᔪᓐᓃᖅᑐᖃᕐᒪᑦ, ᐊᒥᓲᓚᐅᕐᒪᑕ ᐊᓯᖏᑦᑕᐅᖅ ᓴᕿᓚᐅᖅᑐᑦ; ᑭᓯᐊᓂ ᐊᖅᑯᑎᒃᑰᕆᐊᖃᓕᓚᐅᖅᑐᖓ ᖃᐅᔨᓇᓱᓕᖅᓱᖓ ᑭᓇᐅᓚᐅᕐᒪᖔᕐᒪ, ᑭᓇᐅᓕᕐᒪᖔᕐᒪᓗ. 19−ᓂᒃ ᐅᑭᐅᖃᓕᖅᓱᖓ, ᑐᓴᖅᑎᑕᐅᖄᓚᐅᖅᓯᒪᔪᖓ ᐸᓖᓯᒃᑯᓐᓂᒃ/ᐳᑭᖅᑕᓕᒃᑯᓐᓂᒃ ᑕᐃᓐᓇᒎᖅ ᐱᖃᑎᒐ ᐃᖕᒥᓃᕐᓂᕐᒪᑦ. ᖁᐊᖅᓵᖅᓯᒪᓗᐊᓚᐅᕋᒪ, ᑕᐃᒫᒃ ᓇᓗᓕᖅᓱᖓ ᖃᓄᐃᓕᐅᕆᐊᖃᕐᒪᖔᕐᒪ. ᓱᒃᑲᓕᔪᐊᓗᖕᒥᒃ ᐃᒃᐱᒋᓕᓚᐅᕋᒪ ᑎᒡᓕᖅᑕᕐᓂᖓᓂᒃ ᓈᕋᓂᒃ. ᑲᑉᐱᐊᓱᓕᕐᓂᖅ ᑕᕐᓂᓐᓂᒃ ᐅᒪᐃᓐᓂᖅᓴᐅᓚᐅᖅᑐᖅ ᐅᔭᕌᓗᖕᓂᒃ ᐅᒪᐃᑐᓂᒃ ᐊᒥᓱᓂᒃ.

ᐊᒃᓱᕈᕐᓇᕐᓂᖅᐹᖑᓚᐅᖅᑐᖅ ᐅᕙᓐᓄᑦ ᐃᓄᓯᓐᓂᒃ ᐱᔾᔪᑎᖃᓚᐅᖅᑐᖅ ᐋᒐᓯ 25, 2008−ᖑᑎᓪᓗᒍ. ᑐᓴᖅᑎᑕᐅᓚᐅᖅᓯᒪᒐᒪ ᑕᐃᔅᓱᒪᓂ ᖁᐊᖅᓵᕐᓇᖅᑐᐊᓗᖕᒥᒃ. ᖃᐅᔨᓚᐅᕋᒪ ᓯᖓᐃᓂᓐᓂᒃ/ᓇᔾᔨᓂᕋᓂᒃ ᐸᓂᑯᓗᒐᓂᒃ ᒫᓐᓇ ᐱᖓᓱᓂᒃ ᐅᑭᐅᖃᓕᖅᑐᒥᒃ. ᐃᖕᒥᓃᕈᒪᓂᕐᒥᒃ ᐃᓱᒪᐃᓐᓇᖅᑐᐊᓘᓚᐅᖅᑐᖅ ᖃᐅᑕᒫᑦᑎᐊᖅ. ᐃᑲᔪᖅᑕᐅᔪᒪᓚᐅᕋᓗᐊᕋᒪ ᐅᖃᕐᕕᒃᓴᖃᖅᑎᑕᐅᓗᖓ ᐱᔪᒪᓚᐅᖏᓐᓇᒪ ᐊᓯᐅᓯᒪᓗᐊᓂᕐᒧᑦ. ᐊᒥᓱᐊᓗᖕᓂᒃ ᐊᐱᖁᑎᒃᓴᖃᓚᐅᕋᒪ ᑭᐅᔭᐅᖁᔭᒃᑲᓐᓂᒃ, ᓂᖓᒍᑎᒋᓯᒪᓚᐅᖅᑕᑲᓂᒃ. ᑕᐅᑐᒃᑕᐅᔪᒪᔪᓐᓇᐃᓪᓕᑦᑎᐊᓚᐅᖅᑐᖅ. ᐃᓱᒪᖃᖏᑦᑐᑎᑐᑦ ᑲᔪᓯᑐᐃᓐᓇᓕᓚᐅᖅᑐᖓ.

ᖃᐅᔨᑐᐊᕋᒪ ᓯᖓᐃᓂᓐᓂᒃ, ᐃᓕᓐᓂᐊᖏᓐᓇᕈᒪᓚᐅᖅᑐᖅ ᓄᓇᕗᒻᒥ ᐃᓕᓴᐃᔨᐅᔭᕆᐅᖅᓴᓂᕐᒧᑦ ᐃᓕᓐᓂᐊᕈᑎᓂᒃ. ᓯᕗᓪᓕᕆᓚᐅᕋᒃᑯ ᐊᕐᕋᒍᒋᔭᕋᓂᒃ ᐃᓕᓐᓂᐊᓕᓵᖅᓱᖓ. ᐊᒃᓱᕈᕐᓇᓚᐅᖅᐳ ᐅᕙᓐᓄᑦ ᐃᓄᖃᑎᒃᑲᓐᓃᖏᓐᓇᕆᐊᖃᓚᐅᕐᓂᖅ. ᑕᐃᒪᖓᓕᒫᑲᓴᒃ ᓄᒫᓱᖕᓃᕐᒦᖏᓐᓇᓚᐅᖅᑐᖓ. ᐃᔨᖅᑐᐊᕇᓐᓇᓚᐅᖅᓯᒪᔭᕋ ᐋᓐᓂᐊᕐᓂᕋ. ᐅᓪᓗᓕᒪᑦᓯᐊᖅ ᐃᓱᒪᒋᕙᓚᐅᖅᑕᕋ ᖃᓄᐃᓕᐅᖅᑕᐅᓚᐅᕐᓂᕋ. ᐅᕙᓐᓂᒃ ᓇᕐᕈᒋᔭᖃᓕᖅᓱᖓ. ᐱᐊᓂᓕᖅᑐᖓ ᒫᓐᓇᐅᓕᖅᑐᖅ ᓯᕗᓪᓕᖅᐹᒥᒃ ᐊᕐᕋᒍᒥᒃ ᐃᓕᓐᓂᐊᖅᑎᑦᑎᓂᒃ ᖁᕙᓯᖕᓂᓕᖕᓂᒃ 3-ᓂᒃ ᓄᑕᕋᓂᒃ.

ᐃᓅᔪᓐᓂᖅᓯᒪᓕᖅᑎᓗᒍ, ᐊᒥᓱᓂᒃ ᖁᕕᐊᓇᖏᑦᑐᓂᒃ ᐃᓱᒪᖃᐃᓐᓇᖅᑐᐊᓘᕙᓚᐅᖅᑐᖓ ᐅᓪᓗᓕᒪᕌᓗᒃ. ᓂᕆᐅᖕᓂᖃᕈᓐᓃᖅᓯᒪᓗᖓ, ᖃᓄᐃᓕᐅᖃᑕᐅᔪᒪᔪᓐᓇᐃᓪᓕᓗᖓ. ᐃᓕᓐᓂᐊᕆᐊᖃᑦᑕᐃᓐᓇᖅᑐᐊᓘᓚᐅᖅᐳᖓᐃᓛᒃ. ᐃᓅᖃᑎᖃᕈᓐᓂᖅ ᐊᓯᑲᓂᒃ ᓇᒻᒪᖏᒃᑐᐃᓐᓇᐅᓕᓚᐅᖅᑐᑦ ᐊᓯᔾᔨᖅᑐᐃᓐᓇᐅᓗᑎᒃ. ᐊᔪᕐᓇᖅᑐᐊᓘᓚᐅᖅᑐᖅ ᐊᓯᒃᑲᓐᓂᒃ ᐋᓐᓂᖅᑎᑦᑎᑕᐃᓕᒪᒋᐊᕈᓐᓇᕐᓂᖅ. ᓇᒻᒪᓈᖅᓯᒪᓪᓗᐊᖅᑐᕕᐅᓂᐅᓂᕋᒪ ᐃᓚᖃᕐᓂᖅ/ᐱᖃᓐᓂᕆᔭᖃᕐᓚᐅᕐᓂᖅ ᐅᕙᓐᓂᒃ ᓇᒡᓕᒍᓱᐃᓐᓇᓚᐅᖅᑐᒥᒃ ᐱᔾᔪᑎᒃᓴᖃᖅᑎᑦᑎᒐᑎᒃ ᖃᓄᐃᓐᓂᓐᓂᒃ. ᑕᐱᕆᔭᐅᖏᓐᓇᓚᐅᕋᒪ ᐃᓚᒋᔭᐅᒐᓱᐊᖏᓐᓇᖅᓱᖓᓗ ᐅᕙᓐᓂᒃ ᐊᒡᓛᑦ ᐱᐅᒃᓴᕈᓐᓃᕐᔪᐊᖅᓯᒪᔪᐊᓘᒐᓗᐊᖅᑎᓪᓗᖓ. ᐱᖃᓐᓂᕆᔭᖃᕋᒪ ᕿᐊᕝᕕᒋᔪᓐᓇᖅᓯᓵᓚᐅᖅᑕᐅᒃᑲᓐᓂᒃ ᐊᑯᓂᐊᓘᓕᕐᒪ ᑭᓯᐊᓂ. ᐃᓄᐃᑦ ᑕᐃᒃᑯᐊ ᐅᕙᓐᓂᒃ ᐃᑲᔪᓗᐊᖅᐸᓚᐅᖅᑐᑦ ᐅᖃᖃᑦᑕᓚᐅᕐᒪᑕ ᐃᒫᒃ, “ᐊᓂᒎᑎᓂᐊᕐᒥᔪᑦ. ᑲᔪᓯᐊᓂᖕᓂᐊᕐᒥᔪᖅ. ᓴᖏᔫᕗᑎᓐ”. ᑕᐃᒃᑯᐊ ᐅᕙᓐᓂᒃ ᐃᕿᑦᑎᕙᓚᐅᖅᑐᑦ ᐅᕙᓐᓂᒡᓗ ᕿᐅᔪᓐᓇᖅᑎᑦᑎᕙᓚᐅᖅᑐᑦ ᐃᖕᒥᓄ ᐊᓐᓂᐊᕈᑎᒋᔭᕋᓂᒃ. ᐅᕙᓐᓄᑦ ᐊᑑᑎᖃᓚᐅᖅᑐᑦ. ᑕᒪᕐᒥᑦᑎᐊᖅ ᖁᔭᓕᔭᒃᑲ, ᓇᒡᓕᒋᔭᐅᕙᓚᐅᕋᒪ.

ᑭᓯᐊᓂᓕᑕᐅᖅ, ᐃᖃᐅᒪᓂᐊᖅᐳᑎᑦ ᐊᔾᔨᒋᖏᑦᑐᐃᓐᓇᐅᔪᓂᒃ ᕿᒃᓵᖕᓂᖃᖅᐸᒃᑲᑦᑕ, ᓄᒫᓱᖕᓂᒃᑰᖅᐸᒃᑲᑦᑕ. ᓇᓂᓯᒐᓱᐊᕈᓐᓇᖅᐳᑎᑦ ᖃᓄᐃᓕᐅᕈᑎᒋᔪᓐᓇᖅᑕᕐᓂᒃ ᐃᕿᐊᖑᐃᔭᐅᑎᒋᓗᒍ. ᖃᐅᔨᒋᐊᔪᖅᑐᖓᓕ ᖃᕆᑕᐅᔭᒃᑯᑦ ᖃᓄᖅ ᐅᕙᓐᓂᒃ ᐃᑲᔪᒃᑲᓐᓂᕈᓐᓇᕐᒪᖔᕐᒪ, ᐊᒥᓱᓂᑦ ᐅᖃᓕᒫᒐᕐᓂᒃ ᐅᖃᓕᒫᖅᐸᒃᑐᖓ ᐱᔾᔪᑎᖃᖅᑐᓂᒃ ᐃᖕᒥᓃᕐᓂᕐᒥᒃ, ᕿᓂᖃᑦᑕᕐᒥᔪᖓ ᐊᔾᔨᒋᖏᑦᑐᓂᒃ ᓴᐃᒻᒪᓂᕐᒧᑦ ᐃᑲᔪᖅᑎᒃᓴᐅᔪᓐᓇᖅᑐᓂᒃ, ᐊᒥᓱᓂᒃ ᐃᑲᕐᕋᓂᒃ ᒥᖅᓲᔭᖅᐸᒃᑐᖓ, ᐱᓱᒃᐸᒃᑐᖓ ᓇᒧᑦ ᐃᓅᑐᓪᓗᖓ, ᑐᒃᓯᐊᖅᐸᒃᑐᖓ ᒎᑎᒧᑦ, ᕿᐊᕙᒃᑐᖓ ᐱᖃᓐᓂᕆᔭᓐᓄᑦ ᓱᓕᔪᕆᔭᓐᓄᑦ, ᓈᒻᒪᒍᓐᓂᖅᓯᒪᓂᓐᓂᒃ ᐅᖃᐅᓯᖃᕆᐊᖃᓕᕈᒪ ᐱᖃᑎᐊᓗᒃᑯᒃᑲᓄᑦ ᓂᖓᐅᒪᕝᕕᒋᔪᓐᓇᖅᑕᒃᑲᓐᓄᑦ, ᓇᒡᓕᒍᓱᕐᓂᖏᓄᑦ ᐅᕙᓐᓂᒃ. ᐅᑕᕿᑦᑎᐊᕈᓐᓇᖅᑐᐃᓐᓇᐅᕙᓚᐅᖏᒻᒥᔫᒐᓗᐊᑦ, ᐱᑕᖃᕈᓃᓚᐅᕐᒥᔪᖅ ᑕᐃᓐᓇ ᐃᓄᒃ ᐅᕙᓐᓄᑦ ᖃᓂᑉᐸᓚᐅᖅᓯᒪᔫᒐᓗᐊᖅ.

ᑕᒪᒃᑯᐊ ᑐᑭᖃᕈᑕᐅᖏᓚᑦ ᐱᐅᖏᑦᑑᓂᕋᓂᒃ ᐃᓅᓪᓗᖓ. ᑕᐃᒃᑯᐊᑦᑕᐅᖅ ᐱᐅᖏᑦᑑᖏᓐᓂᕗᑦ ᐃᓅᓪᓗᑎᒃ. ᑕᑯᒃᓴᐅᑎᑦᑎᑐᐃᓐᓇᖅᑐᑦ ᐊᓯᐅᓯᒪᓗᐊᓚᐅᕐᓂᕋᓂᒃ ᐊᒻᒪᓗ ᐅᐃᒪᔮᖅᑐᐊᓘᓚᐅᕐᓂᕋᓂᒃ ᖃᓄᐃᑦᑐᓂᒃ ᐱᒻᒪᕆᐅᑎᖃᕋᓗᐊᕐᒪᖔᕐᒪᑦ ᐃᓅᓯᓐᓂᒃ ᓱᕙᓕᑭᐊᕆᓕᖅᓯᒪᓪᓗᒋᑦ. ᓯᕗᓪᓕᐅᔪᓐᓇᓚᐅᖅᑐᑦ ᐃᓅᓯᓐᓂᒃ ᐱᑕᖃᕈᓐᓃᓚᐅᕐᒪᑕ. ᓯᑕᒪᑲᓴᐅᓕᖅᐳᓪᓕ ᑕᐃᒪ 4 ᐊᕐᕋᒍᐃᑦ ᑕᐃᒪᖓᓂᒃ ᐃᖕᒥᓂᒃ ᐃᓅᓯᕐᒥᓂᒃ ᓇᑲᑦᑎᓚᐅᖅᑎᓪᓗᒍ. ᐃᓕᑦᑎᓯᒪᕐᔪᐊᖅᑐᖓ ᐊᖏᔪᒥᒃ ᑭᓇᐅᓂᓐᓂᒃ, ᑭᓇᐅᔭᕆᐊᖃᒪᖔᕐᒪᓗ. ᖁᔭᓕᓯᒪᔪᖓ ᑕᐃᒃᑯᓂᖓ ᓴᖏᔫᖃᑦᑕᓚᐅᖅᑐᑦ ᐅᕙᓐᓄᑦ.

CPS_0078
ᒪᑐᐃᖓᔪᒥᒃ ᐅᖃᐅᓯᕆᔪᓐᓇᓚᐅᖏᑦᑕᑲ ᐊᑐᖅᓯᒪᔭᒃᑲ, ᑲᖑᒋᓗᐊᕐᓂᑯᒧᑦ. ᐅᐊᑦᑎᕈᒃᑲᓐᓂᐅᓕᕐᒪᑦ ᓯᕗᓂᒃᓴᐅᓕᖅᑐᒥ,ᐊᓯᔾᔨᖅᓯᕙᓪᓕᐊᔪᒪᓕᓚᐅᖅᑐᖓ ᖃᓄᐃᓕᖓᓂᓐᓂᒃ. ᓂᑯᕕᖓᕙᓕᖅᐳᖓ ᐅᖃᖅᐸᓕᖅᓱᖓᓗ ᑕᐃᒃᑯᓄᖓ ᐃᑲᔪᖅᑕᐅᔪᒪᔪᓄᑦ. ᑕᒪᓐᓇ ᐊᑐᖅᓯᒪᓪᓗᒍ ᓇᖕᒥᓂᖅ ᐃᒃᐱᖕᓇᕐᒪᑦ ᐃᑎᓂᖅᐹᑦᑎᐊᕐᒧᑦ ᐃᐱᔪᕕᓂᐅᔪᔮᖅᓯᒪᓂᖅ ᑕᕆᐅᕋᓘᑉ ᐃᒫᓂ. ᐃᓱᒪᓚᐅᖅᓯᒪᖏᑦᑐᖓ ᐃᓅᓯᓐᓂᒃ ᐊᑐᖅᓯᒪᔭᓐᓂᒃ ᐅᖃᐅᓯᖃᕈᓐᓇᕈᒫᕐᓂᖅ. ᐊᑐᖅᓯᒪᔭᒃᑲ ᐊᑑᑎᒃᓴᖃᖅᑎᑦᑐᒪᓕᓚᐅᕋᒃᑭᑦ ᐅᖃᐅᓯᕆᖃᑦᑕᓕᖅᓱᒋᑦ ᐊᓯᒃᑲᓐᓄᑦ ᐃᑲᔪᖅᑕᐅᔭᕆᐊᖃᖅᑐᓄᑦ. ᐃᓚᖏᑦ ᐃᓄᐃᑦ ᐅᖃᕐᓂᐊᕐᒥᔫᒐᓗᐊᑦ ᐃᒫᓐᓇ ᖃᓄᑐᐃᓐᓇᖅ ᐅᕙᓐᓂᒃ ᐱᓪᓗᑎᒃ, ᖃᓄᐃᖏᓚᖅ, ᐊᐅᓚᑦᑎᔪᓐᓇᖏᓐᓇᒪ ᓄᖃᖓᑎᑦᑎᔪᓐᓇᕐᓂᖅ ᐅᖃᐅᓯᖃᕐᓂᐊᕐᒥᔪᓂᒃ. ᑭᓇᐃᓛᒃ ᐊᐅᓚᑎᔪᓐᓇᕐᒪᑦ? ᐃᓱᒪᒋᖏᕈᓗᒡᓗᒋᑦ ᐱᐅᖏᑦᑐᐃᓐᓇᕐᓂᒃ ᐅᖃᐅᓯᖃᕈᒪᔪᐃᑦ ᐃᓚᖏᑦ ᐃᓄᐃᑦ , ᖃᐅᔨᒪᖏᒻᒪᑕᑕᐅᖅ ᖃᓄᐃᓕᐅᖅᑐᖃᕐᓂᐊᕐᓂᖅ ᓯᕗᓂᒃᓴᐅᓂᐊᖅᑐᒥ. ᖃᐅᔨᒪᖏᑕ ᖃᓄᐃᓕᖓᓂᐊᕐᒪᖔᑕ ᓯᕗᓂᕆᓂᐊᖅᑕᑦᑎᓂᒃ ᐃᓅᓯᕐᒥᓂᒃ ᑭᓯᐊᓂᓕ, ᖁᕕᐊᓲᑎᖃᖅᑕᐃᓕᕙᒋᑦ ᐊᑭᕋᕆᔭᕕᑦ ᐋᓐᓂᐊᕐᓂᖏᓂᒃ/ᐊᒃᓱᕈᕐᓇᖅᑐᒃᑰᕈᑎᒋᔭᖏᓐᓂᒃ. ᐊᑎᖕᓂᕐᒧᐊᖅᑕᐃᓕᒋᑦ ᐃᓕᖕᓂᒃ ᑲᑕᒃᑎᓪᓗᑎᑦ, ᐃᖃᐃᑎᑦᑎᒋᐊᖅᑕᐃᕙᒡᓗᑎᓐ ᖃᓄᖅ ᐋᓐᓂᖅᑕᐅᓚᐅᕐᒪᖔᖅᐱᑦ ᑕᐃᒃᑯᓄᖓ. ᓇᓕᒡᒋᑐᐃᓐᓇᕆᐊᖃᑦᑕᕐᓗᒋᑦ ᑕᐃᑯᑎᑐᓇ ᐃᓕᖕᓂᒃᑕᐅᖅ ᓴᕿᐅᒪᑎᑦᑎᕙᓚᐅᖅᑐᓂᒃ ᓇᒡᓕᕐᓂᕐᒥᓂᒃ ᐃᓕᖕᓄᑦ ᐊᑐᕐᕕᒋᓗᒋᑦ.

ᐃᓅᓯᖅ ᓇᐃᑦᑑᖕᒪᑦ, ᓂᕈᐊᖃᑦᑕᖏᑦᓗᑎᑦ ᓇᐃᒡᓕᒋᐊᖅᑎᑦᑎᑲᓐᓂᕈᑕᐅᔪᓐᓇᖅᑐᓂᒃ ᑕᑭᔫᓂᕆᔭᕆᐊᖃᖅᑕᖓᓂᒃ ᓚᑭᑦᑎᑦᑕᐃᓕᓗᑎᑦ. ᐅᕙᖓᑦᑕᐅᖅ ᓴᐱᓕᖅᓯᒪᑦᑎᐊᓕᖃᑦᑕᕐᒥᔪᖓ, ᑭᓯᐊᓂ ᐃᓴᒃᓯᒪᒋᐊᑐᐊᕈᒪ, ᑎᒍᒥᐊᖅᑐᑐᔪᔮᕈᓐᓃᖃᑦᑕᖅᐳᖓ ᐃᒃᐱᖕᓂᐊᔭᓐᓂᒃ. ᐃᓛᓐᓂᒃᑯᑦ ᐅᓂᒃᑳᕆᐊᖃᓲᖑᔪᖓ ᐸᓂᒐᓄᑦ ᐊᑖᑕᖓᑕ ᖃᓄᐃᑦᑑᕙᓚᐅᕐᓂᖓᓂᒃ, ᖃᐅᔨᓚᐅᖏᒻᒪᑦ ᓯᖓᐃᓕᖅᓯᒪᓚᐅᕐᓂᕋᓂᒃ. ᖃᐅᔨᒪᖏᓚᖓ ᖃᓄᐃᓕᖓᓂᐊᕐᒪᖔᑦ ᑕᒪᑐᒧᖓ, ᑭᓯᐊᓂ ᖃᐅᔨᒪᑦᑎᐊᖅᑐᖓ ᓴᖏᔫᔭᕆᐊᖃᕐᓂᐊᕋᒪ ᑖᔅᓱᒧᖓᑕᐅᖅ. ᓴᖏᔫᔪᓐᓇᕐᓂᖅ ᑐᑭᖃᖏᓚᖅ ᑲᑕᒍᓐᓇᖏᓐᓂᕋᐃᓂᕐᒥᒃ, ᐊᒻᒪᓗ ᓂᖓᒍᓐᓇᖃᑦᑕᖏᓐᓂᕐᒥᒃ. ᓴᖏᔫᓂᖅ ᑐᑭᖃᖅᑐᖅ ᖃᓄᐃᓕᐅᕈᑎᖃᕈᓐᓇᕐᓂᖅ ᐊᓐᓂᐊᕈᑕᐅᔪᓂᒃ ᒫᓐᓇᐅᓕᖅᑐᖅ, ᖃᐅᔨᒪᓪᓗᓂᓗ ᐱᐅᓂᖅᓴᐅᓕᕐᓂᐊᕐᒥᔪᖅ ᓯᕗᓂᐅᓂᐊᖅᑐᒥ. ᒪᑭᑕᑦᑎᐊᕆᐊᖅᐸᒡᓗᑎ, ᖃᐅᔨᒪᓇᖏᓇᑦᑕ ᖃᓄᖅ ᑎᑭᑕᐅᓂᐊᕐᓂᑦᑎᓐᓂᒃ. ᐳᐃᒍᖅᑕᐃᓕᑦᑎᐊᕆᑦ ᐃᓱᒪᒋᔪᓐᓃᕐᕕᔪᓐᓇᕐᓂᖅ ᑕᐃᓐᓇ ᐃᓄᒃ ᐃᖕᒥᓃᓚᐅᕐᓂᖓᓄᑦ ᐱᑕᖃᕈᓃᖅᓯᒪᔪᖅ. ᐱᓗᐊᖅᑐᒥᒃ ᐃᓕᖕᓂᒃ ᐃᓱᒪᒋᔪᓐᓂᕐᕕᖃᕐᓂᐊᖅᐳᑎᑦ! ᐃᓅᓯᖃᑐᐃᓐᓇᖅᑕᐃᓕᒋᑦ ᐃᓕᖕᓂᒃ ᐸᓯᒃᓰᓐᓇᕐᓂᕐᒥᒃ. ᖃᐅᑕᒫᖅ ᐃᓕᖕᓂᒃ ᐃᓱᒪᒋᔪᓐᓂᕐᕕᖃᕈᓐᓇᕐᓂᕐᒥᒃ ᐊᑐᖃᑦᑕᐃᓐᓇᕐᓗᑎᑦ, ᓱᓕᔪᖅᓴᕐᓗᑎᓪᓗ ᖁᕕᐊᓱᖃᑕᐅᑦᑎᐊᕈᓐᓇᕐᓂᕐᓂᒃ, ᐃᓅᖃᑕᐅᓂᕐᓄᑦ.

ᒪᒃᐱᒐᕐᒧᑦ ᒪᓕᒃᑐᒧᑦ ᑲᔪᓯᓕ: ᐃᖕᒥᓂᖅᑐᖃᕐᓂᕐᒧᑦ ᐊᒃᑐᖅᑕᐅᓯᒪᔪᑦ ᐃᓚᕗᑦ