ᑲᓇᑕᒥ ᑲᑐᔾᔨᖃᑎᒌᖏᑦ ᐃᖕᒥᓃᖅᑎᑦᑎᑕᐃᓕᒪᓂᕐᒧᑦ ᑐᓂᓯᓯᒪᕗᑦ ᓇᓗᓇᐃᒃᑯᑕᕐᓂᒃ ᐊᑕᓃᑦᑐᓂᒃ ᐃᖕᒥᓃᖅᑐᖃᕐᓂᕐᒧᑦ ᐃᑲᔪᖅᑎᐅᖄᕈᑎᓂᒃ.

suicide-prevetion

ᑕᒪᒃᑯᐊ ᓇᓗᓇᐃᒃᑯᑕᐃᑦ ᓴᓇᔭᐅᓯᒪᕗᑦ ᐃᑲᔫᑕᐅᓂᕐᒧᑦ ᐃᓄᓕᒫᓂᒃ ᐃᑲᔪᖅᑎᐅᖄᕐᓂᖏᓐᓂᒃ ᐃᓄᖕᓂᒃ ᐃᖕᒥᓃᑐᐃᓐᓇᕆᐊᖃᓕᖅᑐᓂᒃ. ᖃᓄᐃᓕᐅᖅᑎᐅᕙᖕᒪᑕ ᓯᕗᓪᓕᖅᐹᖑᓪᓗᑎᒃ ᐃᑲᔪᖅᑎᐅᖄᖅᑐᑦ ᐅᑕᕿᓂᖏᓐᓂᒃ ᖃᐅᔨᒪᔨᑕᕐᓂᒃ ᐃᑲᔪᖅᑎᒃᓴᓂᒃ ᖃᐃᔪᖃᕐᓂᐊᖅᑐᓂᒃ ᐅᕝᕙᓗᓐᓃᑦ ᑐᐊᕕᕐᓇᖅᓯᓯᒪᓂᖓ ᐋᕿᐅᒪᔭᐅᑦᑎᐊᓕᕈᓐᓇᕐᓂᖓᓄᑦ ᑎᑭᓪᓗᒍ.

ᐱᕙᓪᓕᐊᑎᑕᐅᓯᒪᓂᖏᑦ ᓴᓇᔭᐅᓂᖏᑦ ᓇᓗᓇᐃᒃᑯᑕᐃᑦ

ᑖᒃᑯᐊ ᐊᑕᓃᑦᑐᑦ ᒪᓕᒐᒃᓴᐃᑦ ᓇᓗᓇᐃᒃᑯᑏᑦ ᑐᖓᕕᖃᖅᐳᑦ ᖃᐅᔨᒪᔨᓂᒃ ᐃᓱᒪᒋᔭᐅᓯᒪᔪᓂᒃ ᐱᓕᕆᔨᐅᓚᐅᖅᑐᓂᒃ ᐃᓱᒪᒃᑯᑦ ᖃᓄᐃᓐᓂᖃᖅᑎᑦᑎᑕᐃᓕᒪᓂᕐᒧᑦ ᐃᑲᔪᖅᑎᐅᔪᓂᒃ, ᑲᒪᔨᐅᔪᓂᒃ ᐊᒻᒪᓗ ᐃᓱᒪᓕᕆᕕᖕᒥ ᐱᓕᕆᔨᐅᕙᒃᑐᓂᒃ ᓄᓇᓕᒡᔪᐊᖏᓐᓂᒃ ᐋᔅᑐᕇᓕᔭᒥ, ᓂᐅ Zᐄᓚᓐᒥ, Bᐅᕆᑕᓐᒥᐅᑕᓂ, ᐊᒥᐊᓕᑲᒥᐅᑕᓂ ᐊᒻᒪᓗ ᑲᓇᑕᒥᐅᑕᓂᒃ, ᐱᔾᔪᑎᖃᖅᑐᓂᒃ ᖃᓄᖅ ᐃᑲᔪᕈᓐᓇᕐᓂᖅ ᐃᓄᖕᒥᒃ ᐃᖕᒥᓃᕆᐊᑐᐃᓐᓇᕆᐊᖃᖅᑐᒥᒃ.

ᖃᓄᖅ ᐊᑐᖅᑕᐅᓲᖑᒻᒪᖔᑕ ᐃᑲᔫᑕᐅᓂᕐᒧᑦ ᒪᓕᒐᒃᓴᐃᑦ ᓇᓗᓇᐃᒃᑯᑕᐃᑦ

ᑕᒪᒃᑯᐊ ᒪᓕᒐᒃᓴᐃᑦ ᓇᓗᓇᐃᒃᑯᑕᐃᑦ ᑕᒪᐃᓐᓄᑦ ᑭᓇᑐᐃᓐᓇᐅᕐᓄᑦ ᑐᕋᖓᒐᓗᐊᖅᑐᑦ ᐊᑐᓕᖁᔭᐅᓯᒪᔪᑦ ᖃᓄᖅ ᐃᑲᔪᕈᓐᓇᕐᓂᕐᒧᑦ ᑭᓇᑐᐃᓐᓇᕐᒥᒃ ᐃᖕᒥᓃᕋᓱᐊᑐᐃᓐᓇᕆᐊᖃᖅᑐᒥᒃ. ᐊᑐᓂ ᐃᖕᒥᒎᖅᑐᑦ ᐃᓄᐃᑦ ᐊᔾᔨᒌᖏᑦᑐᐃᓐᓇᐅᓂᖏᓐᓄᑦ, ᐱᒻᒪᕆᐅᔪᒥᒃ ᐱᔾᔪᑕᐅᕗᑦ ᐋᕿᒋᐊᖅᑕᐅᓯᒪᑦᑎᐊᕆᐊᖃᕐᓂᖏᑦ ᐃᑲᔪᖅᑕᐅᔭᕆᐊᖃᖅᑑᑉ ᐱᔭᕆᐊᖃᖅᑕᖏᓐᓄᑦ ᓱᖏᐅᑎᔭᐅᓯᒪᓗᑎᒃ. ᑕᒪᒃᑯᐊ ᐊᑐᓕᖁᔭᐅᓯᒪᔪᑦ ᑕᐃᒪᐃᓐᓂᖏᓐᓄᑕᐅᖅ ᓈᒫᓂᖏᑦᑑᐃᓐᓇᕆᐊᖃᕆᕗᑦ ᐊᑐᓂ ᐃᓄᖕᓄᑦ ᐃᖕᒥᓃᕈᒪᑐᐃᓐᓇᕆᐊᖃᖅᑐᓄᑦ. ᐊᒻᒪᑕᐅᖅ, ᓇᓗᓇᐃᒃᑯᑕᓕᐊᑦ ᒪᓕᒐᒃᓴᐃᑦ ᑐᕌᖓᑎᑕᐅᕗᑦ ᓯᕗᓪᓕᐅᔪᓂᒃ ᐃᑲᔪᖅᑎᐅᓕᖅᑐᓄᑦ ᐱᕙᓪᓕᐊᓯᒪᓂᖅᓴᐅᔪᓂ ᖃᓪᓗᓇᐅᔭᕈᓐᓇᖅᑐᓂᒃ ᓄᓇᓕᒡᔪᐊᕐᒥᐅᑕᐅᔪᓄᑦ. ᓈᒻᒫᓂᖏᑐᐃᓐᓇᕆᐊᖃᕐᒪᑕ ᐊᓯᖏᓐᓄᑦ ᐃᓕᖅᑯᓯᖃᑎᒋᖕᒋᑕᖏᓐᓄᑦ ᑎᒥᖁᑎᒋᔭᐅᔪᓄᑦ ᑲᑐᔾᔨᖃᑎᒌᖕᓄᓪᓗᓐᓃᑦ ᐅᕝᕙᓗᓐᓃᑦ ᓄᓇᓕᒡᔪᐊᖃᖅᑐᓄᑦ ᐊᔾᔨᒋᖏᑕᖏᓐᓂᒃ ᐋᓐᓂᐊᖅᑐᓕᕆᔾᔪᑎᖃᖅᑐᓂ.

ᐱᒻᒪᕆᐊᓗᒃ ᖃᐅᔨᒪᔭᐅᔭᕆᐊᓕᒃ:

ᐃᖕᒥᓂᒃ ᐊᓐᓂᖅᓯᖃᑦᑕᕐᓂᖅ ᐊᒥᓱᔫᓐᓇᖅᑐᓂᒃ ᐊᔾᔨᒌᖏᑦᑑᑎᐅᔪᓂᒃ ᐱᔾᔪᑎᖃᕈᓐᓇᖅᐳᖅ. ᑭᓇᑐᐃᓐᓇᖅ ᐃᖕᒥᓂᒃ ᐊᓐᓂᖅᑐᐃᕙᒃᑐᖅ ᐅᓗᕆᐊᓇᖅᑐᒦᑦᑐᓐᓇᕐᒪᑦ ᐃᖕᒥᓃᕈᒪᑐᐃᓐᓇᕆᐊᖃᕐᓂᖅ. ᐊᓯᖏᑦ ᐃᖕᒥᓂᒃ ᐊᑯᓂ ᐱᓇᓱᐊᕈᒐᓵᖕᓂᒃ, ᑕᕿᒐᓴᐅᔪᓂᒃ ᐅᕝᕙᓗᓐᓃᑦ ᐊᕐᕋᒍᒐᓴᐅᔪᓂᒃ ᐱᐅᓯᖃᓕᖅᑐᑦ ᐋᓂᖅᑐᐃᕙᒃᑐᖅ ᐃᖕᒥᓃᕈᒪᖏᑦᑐᐃᓐᓇᕆᐊᖃᕆᕗᖅ. ᑕᒪᒃᑯᐊ ᒪᓕᒐᒃᓴᐃᑦ ᓇᓗᓇᐃᒃᑯᑕᐃᑦ ᐃᑲᔪᕈᓐᓇᖅᑐᑦ ᐃᓕᖕᓂᒃ ᑭᓯᐊᓂ ᐃᓄᒃ ᐃᑲᔪᕋᓱᐊᖅᑕᐃᑦ ᐃᖕᒥᓃᕈᒪᓐᓂᕈᓂ. ᐃᓄᒃ ᐃᑲᔪᖅᑕᐃᑦ ᐃᖕᒥᓂᒃ ᐋᓐᓂᖅᓯᖃᑦᑕᕈᓂ, ᐃᖕᒥᓃᕈᒪᖏᓗᓂᓗ, ᐊᑏᑐᖅ ᑐᑭᓯᓂᐊᕐᕕᒋᓂᐊᖅᐸᑎᑦ ᒪᓕᒐᒃᓴᐃᑦ ᓇᓗᓇᐃᒃᑯᑕᐃᑦ ᑐᕌᖓᔪᑦ ᓯᕗᓪᓕᐅᓗᑎᒃ ᐃᑲᔪᖅᑎᐅᔪᑦ ᐱᔮᕆᓪᓗᑎᒃ ᐃᖕᒥᓂᒃ ᐋᓐᓂᖅᑐᐃᕙᒃᑐᓂᒃ.

ᖃᓄᖅ ᖃᐅᔨᒪᓂᐊᕋᒪ ᑭᓇᑐᐃᓐᓇᖅ ᐃᖕᒥᓃᕈᒪᔮᓕᖅᐸᑦ?

ᐱᒻᒪᕆᐊᓘᕗᖅ ᖃᐅᔨᒪᔭᕆᐊᖃᖅᑕᑎᑦ ᐃᓕᑕᕐᓇᕈᓐᓇᖅᑐᑦ ᓴᕿᐅᒪᓕᕈᓐᓇᖅᑐᑦ ᐃᖕᒥᓃᕈᒪᔪᖃᓕᖅᑎᓪᓗᒍ.

ᐃᓄᐃᑦ ᓴᕿᐅᒪᑎᑦᑎᓕᕈᓐᓇᕐᒪᑕ ᐊᑕᐅᓰᓐᓇᕐᒥᒃ ᐊᒥᓲᓂᖅᓴᓂᓪᓗᓐᓂᑦ ᓴᕿᐅᒪᓕᕈᓐᓇᖅᑐᓂᒃ ᐊᒻᒪᓗ ᓱᓕ ᐃᓚᖏᑦ ᐊᓯᖏᓐᓂᒃ ᐅᖃᐅᓯᐅᓯᒪᖏᑦᑐᓂᒃ ᑖᒃᑯᓇᓂ ᐊᑐᖓᕈᓐᓇᕆᓪᓗᑎᒃ.

ᐸᓴᒍᓱᓕᕈᕕᑦ ᑭᓇᑐᐃᓐᓇᕐᒥᒃ ᐅᓗᕆᐊᓇᖅᑐᒦᓕᖅᑐᒥᒃ ᐃᖕᒥᓃᕋᓱᐊᑐᐃᓐᓇᕆᐊᖃᕐᓂᖅ, ᐱᒻᒪᕆᐊᓘᕗᖅ ᓇᖕᒥᓂᖅ ᐊᐱᕆᓗᒋᑦ ᐃᖕᒥᓃᕈᒪᓂᕐᒥᒃ ᐃᓱᒪᖃᕐᒪᖓᑦ. ᐅᖃᖑᓯᕆᑦᑕᐃᓕᓂᐊᖏᑕᐃᑦ ᐅᖃᐅᓯᖅ ᐱᔾᔪᑎᓕᒃ ‘ᐃᖕᒥᓃᕈᒪᓂᕐᒥᒃ’. ᐱᒻᒪᕆᐊᓘᖕᒪᑦ ᐊᐱᖅᑯᑎᒋᔭᕆᐊᖃᕐᓂᖅ ᑲᑉᐱᐊᒋᑦᑕᐃᓕᒪᓗᒍ ᐊᒻᒪᓗ ᐃᖃᖅᑐᐃᕙᓗᒃᑕᐃᓕᒪᑦᑎᐊᕐᓗᑎᓐ. ᐊᐱᖁᑎᒋᔭᐃᑦ ᑖᔅᓱᒧᖓ ᑐᕌᖓᑦᑎᐊᕆᐊᓕᒃ, ᑐᑭᓯᓇᑎᐊᑲᐅᑎᒋᓗᓂᓗ. ᓲᕐᓗ ᐆᒃᑑᑎᒋᓗᒍ, ᐊᐱᕆᔪᓐᓇᖅᐳᑎᓐ:

ᐃᓱᒪᒐᕖᑦ ᐃᖕᒥᓃᕈᒪᓂᕐᒥᒃ? ᐅᕝᕙᓗᓐᓃᑦ “ᐃᓕᖕᓂᒃ ᑐᖁᑐᒻᒪᓂᕐᒥᒃ ᐃᓱᒪᖃᓕᖅᐲᑦ?”

ᖃᐅᔨᒪᔪᔮᕈᕕᑦ ᐊᔪᖏᓪᓗᑎ ᐃᖕᒥᓃᑐᐃᓐᓇᕆᐊᖃᖅᑐᒧᑦ, ᑕᒪᓐᓇ ᐃᓕᖕᓄᑦ ᐅᒃᐱᕆᔭᐅᓐᓇᕐᓂᖅᓴᐅᓂᐊᖅᑐᖅ ᑕᐃᔅᓱᒧᖓ ᐃᖕᒥᓃᕈᒫᔮᖅᑐᒧᑦ.

ᐃᓚᖏᑦ ᐃᓄᐃᑦ ᐃᓱᒪᓲᖑᖕᒪᑕ ᐅᖃᐅᓯᖃᑐᐊᕈᑎᒃ ᐃᖕᒥᓃᖃᑦᑕᕐᓂᕐᒥᒃ ᐃᓱᒪᒋᔭᐅᓕᕈᑕᐅᓂᐊᕋᓱᒋᓗᒋᑦ ᐃᓄᖕᒧᑦ, ᑕᒪᓐᓇ ᓱᓕᖏᓚᖅ. ᐊᓯᖓᓂᒃᑕᐅᖅ ᐃᓱᒪᒋᔭᐅᒐᔪᖕᒥᔪᖅ ᒪᓐᓇ ᑭᓇᑐᐃᓐᓇᖅ ᐅᖃᐅᓯᖃᖅᐸᒃᖅᑐᖅ ᐃᖕᒥᓃᕈᒪᓂᕐᒥᒃ ᐱᓪᓚᑖᖏᓚᖅ. ᐃᖅᑲᐅᒪᓂᐊᖅᐳᑎᑦ ᐅᖃᐅᓯᖃᕐᓂᖅ ᐃᖕᒥᓃᕈᒪᓂᕐᒥᒃ ᐱᐅᓯᕆᔭᐅᑐᐃᓐᓇᕆᐊᖃᕐᒪᑕ ᐃᓄᖕᒧᑦ ᐅᖃᕋᓱᐊᕐᓂᖅ ᖃᓄᖅ ᐃᒃᐱᖕᓂᐊᑎᒋᓂᕐᒥᓂᒃ ᐃᓗᒥᒍᑦ, ᐊᒃᓱᕈᕐᓇᕆᔭᒥᓂᒃ.

ᖃᓄᖅ ᐅᖃᓪᓚᒋᐊᖃᖅᐳᖓ ᐃᓄᖕᒧᑦ ᐃᖕᒥᓃᕈᒪᔪᒧᑦ?

ᐱᒻᒪᕆᐊᓘᕗᖅ ᒪᑯᓂᖓ ᐊᑐᖃᑦᑕᕆᐊᖃᕐᓂᖅ:

  • ᐅᖃᐅᑎᕙᒡᓗᒍ ᐃᖕᒥᓃᕈᒪᔪᖅ ᓇᒡᓕᒋᓂᕋᕐᓗᒍ ᐊᒻᒪᓗ ᐃᑲᔪᕈᒪᓂᕋᕐᓗᒍ.
  • ᓇᒡᓕᒍᓱᖕᓂᕐᓂᒃ ᖃᐅᔨᑎᓪᓗᒍ ᐊᒻᒪᓗ ᑐᑭᓯᓯᒪᓂᕋᕐᓗᑎᑦ ᖃᓄᖅ ᐃᒃᐱᖕᓂᐊᓕᕐᒪᖔᑕ ᒫᓐᓇᐅᔪᖅ.
  • ᑐᑭᓯᓇᑦᑎᐊᖅᑐᒥᒃ ᐅᖃᐅᑎᖃᑦᑕᕐᓗᒍ ᐃᓱᒪᒋᔭᖃᕐᓂᖓ ᐃᖕᒥᓃᕈᒪᓂᒃ ᐊᒥᓱᓂᒃ ᐱᔾᔪᑎᖃᓲᖑᕗᖅ ᐃᑲᔪᖅᑕᐅᔪᓐᓇᖅᑐᓂᒃ ᐃᓱᒪᒃᑯᑦ ᓈᒻᒪᒍᓐᓃᖅᓯᒪᓂᕐᒥᒃ, ᑕᒪᓐᓇ ᓂᕆᐅᖕᓂᖅᑖᕈᑕᐅᔪᓐᓇᕐᒪᑦ ᐃᓄᖕᒧᑦ.
  • ᐅᖃᐅᑎᓗᒍ ᑕᐃᓐᓇ ᐃᓱᒪᒋᔭᖏᑦ ᐃᖕᒥᓃᕈᒪᓂᕐᒥᒃ ᐊᓯᖏᓐᓄᑦ ᐊᑐᖅᑕᐅᒐᔪᖕᒥᔪᑦ, ᐊᒻᒪᓗ ᐊᑐᖅᑕᐅᖏᑦᑐᓐᓇᕐᒥᔪᑦ.
  • ᐃᖕᒥᓂᕈᒪᓂᕐᒥᒃ ᐃᓱᒪᖃᕐᓂᖅ ᐊᒥᓱᓄᑦ ᐃᓄᖕᓄᑦ ᑐᒃᓯᕋᐅᑕᐅᕙᒃᐳᖅ ᐃᑲᔪᖅᑕᐅᔪᒪᓂᖅ, ᐊᒻᒪᓗ ᐊᒃᓱᕉᓴᓪᓗᓂ ᕿᒫᐃᒐᓱᐊᕈᑕᐅᕙᖕᒥᔪᖅ ᐊᑲᐅᖏᓕᐅᕈᑎᒋᔭᒥᓂᒃ ᐊᒻᒪᓗ ᐊᒃᓱᕈᕐᓇᖅᑐᒃᑰᕈᑎᒋᔭᒥᓂᒃ. ᐱᔫᒥᓴᐃᔭᒋᐊᖃᖅᐳᑎᑦ ᐃᖕᒥᓃᕈᒪᔪᓂᒃ ᐅᖃᓪᓚᐃᓐᓇᕈᓐᓇᕐᓂᖓᓂᒃ, ᐊᔪᖏᑉᐸᑦ. ᐱᕕᒃᓴᖃᖅᑎᑕᐅᔭᕆᐊᖃᕐᒪᑦ ᐅᖃᐅᓯᖃᕈᓐᓇᕐᓂᖅ ᐃᒃᐱᒋᔭᒥᓂᒃ, ᐱᔾᔪᑎᒋᔭᒥᓂᒡᓗ ᓲᖅ ᐃᓅᔪᒪᔪᓐᓃᕐᒪᖔᑦ, ᐊᒻᒪᓗ ᖁᓚᖏᓐᓂᖅᓴᐅᓕᕈᓐᓇᕐᓂᐊᕐᒪᑦ ᑕᐃᒪᐃᓕᐅᕈᓂ. ᐃᑲᔪᕈᓐᓇᕐᒥᔪᖅ ᐅᖃᐅᓯᖃᕈᓐᓇᕐᓂᖅ ᐃᓚᖏᓐᓂᒃ ᐃᖕᒥᓃᕈᒪᔫᑉ ᐊᑲᐅᖏᓕᐅᕈᑎᒋᔭᖏᓐᓂᒃ ᐊᑐᓕᖅᑕᖏᓐᓂᒃ. ᐅᖃᐅᓯᕆᓗᓯᐅᒃ ᖃᓄᐃᓕᐅᕈᓐᓇᕐᒪᖔᔅᓯᒃ ᐊᑲᐅᖏᓕᐅᕈᑎᓂᒃ ᐊᔪᕐᓇᖅᑐᐊᓘᔭᓕᖅᑎᓪᓗᒋᑦ, ᑭᓯᐊᓂ ᐋᖅᑮᒋᐊᖅᑐᑦᑑᑦᑕᐃᓕᒋᑦ ᐊᑲᐅᖏᓕᐅᕈᑎᖏᓂᒃ ᐃᒡᕕᑑᓗᑎᑦ.

    ᖃᓄᕐᓕ ᖃᐅᔨᒪᓂᐊᕋᒪ ᐱᓪᓚᑦᑖᓕᕐᓂᖓᓂᒃ?

    ᓯᕗᓪᓕᕐᒥ, ᑐᑭᓯᔭᕆᐊᖃᖅᑕᐃᑦ ᑕᐃᓐᓇ ᐃᓄᒃ ᐱᔪᒪᓪᓚᕆᖕᒪᖔᑦ ᐃᓅᓯᕐᒥᓂᒃ ᐃᓱᓕᑎᑦᑎᔪᒪᓂᖅ, ᐅᕝᕙᓗᓐᓃᑦ ᓇᓗᓇᕐᓂᖅᓴᐅᔪᓂᒃ ᐃᖕᒥᓃᕈᒪᓂᕐᒥᒃ ᐃᓱᒪᖃᖃᑦᑕᖅᓯᒪᖕᒪᖔᑦ ᓲᕐᓗ ᒪᑯᓂᖓ ᐃᒪᐃᓕᖓᔪᓂᒃ ‘ᓲᕐᓕᑭᐊᖅ ᑲᔪᓯᒐᓱᐊᕆᐊᖃᖅᐳᖓ?’. ᑕᐃᒪᐃᓕᐅᕈᓐᓇᕐᓂᐊᕋᕕᑦ, ᐊᐱᕆᔭᕆᐊᖃᖅᐳᑎᑦ ᑕᐃᔅᓱᒥᖓ ᐸᕐᓇᒃᓯᒪᖕᒪᖔᑦ ᐃᖕᒥᓃᕈᒪᓂᖅ. ᐱᖓᓲᖕᒪᑕ ᐱᖁᑎᒃᓴᐃᑦ ᐊᐱᕆᔭᕆᐊᖃᖅᑕᑎᑦ.

    ᐃᓱᒪᓕᐅᖅᓯᒪᓕᖅᐲᑦ ᖃᓄᖅ ᐃᓕᖕᓂᒃ ᐃᒻᒥᓃᕐᓂᐊᕐᒪᖔᖅᐱᑦ?
    ᐃᓱᒪᓕᐅᖅᓯᒪᓕᖅᐹᑦ ᖃᖓ ᐃᖕᒥᓃᕐᓂᐊᕐᒪᖔᖅᐱᑦ?
    ᖃᓄᐃᓕᐅᕆᐊᖅᓯᒪᓕᖅᐱᑦ ᐱᖁᑎᓂᒃ ᐊᑐᐃᓐᓇᐅᑎᑦᑎᒋᐊᕐᓂᖅ ᐊᑐᕋᔭᖅᑕᕐᓂᒃ ᐸᕐᓇᒃᓯᒪᓕᖅᑕᕐᓄᑦ?

    ᖁᑦᑎᓐᓂᖅᓴᐅᓂᕋᖅᑕᐅᕙᑦᑐᓂᒃ ᐸᕐᓇᔅᓯᒪᓂᖅ ᓇᓗᓇᐃᒃᑯᑕᐅᕙᒃᑐᖅ ᐅᓗᕆᐊᓇᖅᑐᒦᓐᓂᖅᓴᐅᓂᖓᓄᑦ. ᑭᓯᐊᓂᓕᑕᐅᖅ, ᐃᖅᑲᐅᒪᔭᕆᐊᖃᕆᕗᑎᑦ ᐸᕐᓇᐅᑎᖃᒻᒪᕆᖏᒃᑲᓗᐊᖅᑎᓪᓗᒍ ᓇᓗᓇᐃᒃᑯᑕᓪᓚᕆᐅᖏᓐᓂᖓᓂᒃ ᐅᓗᕆᐊᓇᖅᑐᒦᖏᓐᓂᖓᓄᑦ. ᑕᒪᕐᒥᒃ ᐃᓱᒪᓕᖅᑐᑦ ᐃᖕᒥᓃᕈᒪᓂᕐᒥᒃ ᐱᒻᒪᕆᐅᑎᑕᐅᔭᕆᐊᖃᖅᐳᑦ.

    ᑖᒃᑯᓇᖓᑕᐅᖅ ᑭᖑᓂᐊᒍᑦ ᖃᐅᔨᒋᐊᖃᕐᓂᐊᓕᖅᑐᑎᓐ ᐅᑯᓂᖓ ᐊᓯᒃᑲᓐᓂᖏᓐᓂᒃ ᐅᓗᕆᐊᓇᕈᑕᐅᔪᓐᓇᕐᒥᔪᓂᒃ:

    ᑖᓐᓇ ᐊᑐᖅᓯᒪᕙ ᐃᒥᐊᓗᖕᒥᓗᓐᓃᑦ ᐊᓯᖏᓐᓂᓗᓐᓃᑦ ᐋᖓᖓᔭᕐᓇᖅᑐᓂᒃ? ᐊᑐᖅᑕᐅᖃᑕᕐᓂᖏᑦ ᐃᒥᐊᓗᐃᓪᓗᓐᓃᑦ ᐊᓯᖏᓪᓗᓐᓃᑦ ᐋᖓᔮᕐᓇᖅᑐᑦ ᐃᓄᖕᒧᑦ ᖃᓄᑐᐃᓐᓇᕈᑕᐅᓂᖅᓴᐅᔪᓐᓇᕐᒪᑕ ᐃᓱᒪᒋᑐᐃᓐᓇᖅᑕᖏᓐᓂ.

    ᑖᓐᓇ ᐃᓄᒃ ᐃᖕᒥᓃᕋᓱᐊᖅᓯᒪᕙ ᓯᕗᓂᐊᒍᑦ? ᓯᕗᓂᐊᒍᑦ ᐃᖕᒥᓃᕋᓱᐊᖅᓯᒪᓐᓂᕈᓂ ᐃᓄᒃ ᓯᕗᓂᒃᓴᒥ ᐆᒃᑐᑲᓐᓂᕐᕈᓐᓇᕐᓂᖅᓴᐅᕙᒃᑭᕗᖅ ᐃᖕᒥᓃᕐᓂᕐᒥᒃ.

    ᐅᖃᐅᓯᐅᓂᖏᓐᓂᒃ ᐱᔭᐅᓯᒪᔪᑦ ᐱᔾᔪᑎᖃᖅᑐᑦ “ᐃᖕᒥᓃᕈᒪᓂᕐᒥᒃ ᐃᓱᒪᓕᕐᓂᖅ ᐊᒻᒪᓗ ᐱᐅᓯᕆᔭᐅᔪᑦ”, ᓯᕗᓪᓕᐅᔪᓄᑦ ᐃᑲᔪᖅᑎᐅᔪᓄᑦ ᒪᓕᒐᒃᓴᐃᑦ ᓇᓗᓇᐃᒃᑯᑕᐃᑦ:” ᐱᓕᕆᕝᕕᖓᓂ ᐃᓱᒪᓕᕆᔨᒃᑯᑦ, ᐃᓕᓐᓂᐊᕐᕕᒡᔪᐊᕐᒥ ᔫᓂᕘᓯᑎᒥᒃ ᒥᐊᓪBᐅᐊᓐᒥ, ᐋᔅᑐᕇᓕᔭᒥ

    ᑕᐃᒪᓕ ᑐᑭᓯᓯᒪᓕᕈᕕᑦ ᐅᓗᕆᐊᓇᕐᓂᖃᕐᓂᖓᓂᒃ ᒫᓐᓇᐅᓕᖅᑐᖅ, ᖃᓄᐃᓕᐅᕆᐊᖃᓕᖅᐳᑎᑦ ᐱᓕᕆᐊᕆᓗᒍ ᑖᓐᓇ ᐃᓄᒃ ᐃᖕᒥᓂᒃ ᐋᓐᓂᖅᓯᑦᑕᐃᓕᒪᑎᒋᐊᕐᓗᒍ.

    ᖃᓄᕐᓕ ᐃᓄᒃ ᐃᖕᒥᓂᒃ ᐊᓐᓂᖅᓯᑦᑎᑕᐃᓕᒪᔪᓐᓇᖅᐸᕋ?

    ᑭᓇᑐᐃᓐᓇᖅ ᐃᖕᒥᓃᕈᒪᓕᖅᑐᖅ ᐃᓄᑑᑎᑕᐅᔭᕆᐊᖃᖏᓚᖅ. ᐱᖁᑎᒌᓐᓇᕈᓐᓇᔾᔭᖏᒃᑯᕕᐅᒃ, ᐊᓯᖕᓂᒃ ᐱᖃᑎᒋᔭᐅᑎᑦᑎᔭᕆᐊᖃᕐᓂᐊᖅᑐᑎᑦ. ᐊᒻᒪᑕᐅᖅ, ᑐᓂᓯᓯᒪᓗᑎᑦ ᐃᓄᖕᒧᑦ ᐅᓗᕆᐊᓇᖏᑦᑐᓂᒃᐅᖃᕐᕕᒃᓴᐅᔪᓐᓇᕐᓂᐊᖅᑐᓂᒃ ᖃᖓᓕᒫᖅ (ᓲᕐᓗ ᐅᖄᓚᐅᑎᒃᑯᑦ ᐃᑲᔪᖅᑎᐅᔪᒥᒃ, ᐱᖃᑎᐊᓗᖓᓂᒃ, ᐃᓚᖓᓂᒡᓗᓐᓃᑦ ᐊᖏᖅᓯᒪᔪᒥᒃ ᐃᑲᔪᖅᑎᐅᔪᓐᓇᕐᓂᖅ ᐅᕝᕙᓗᓐᓃᑦ ᐃᓕᓐᓂᐊᕌᓂᒃᓯᒪᑦᑎᐊᖅᑐᒥᒃ ᐃᑲᔪᖅᑎᓪᓚᕆᐅᔪᓐᓇᖅᑐᒥᒃ).

    ᐅᖃᐅᓯᖃᖅᑕᐃᓕᒋᑦ ᐃᓄᖕᒧᑦ ᐃᖕᒥᓂᒃ ᐸᓯᔭᒃᓴᐅᓂᕋᐃᒍᓐᓇᕐᓂᕐᒥᖅ ᐱᐅᖏᑑᓂᕋᐃᓂᖅ ᐊᒻᒪᓗ ᐅᓗᕆᐊᓇᖅᓴᕆᓂᕐᒥᒃ ᐃᖕᒥᓃᖅᑎᑦᑎᑕᐃᓕᒪᓂᕐᒧᑦ. ᓲᕐᓗ ᐆᒃᑑᑎᒋᓗᒍ, ᐅᖃᐅᑎᖃᑦᑕᖏᓪᓗᒋᑦ ᐃᑯᐊᓚᔪᐊᓗᖕᒧᐊᓚᖓᓂᕋᐃᓂᖅ ᐃᖕᒥᓃᕈᓂ ᐅᕝᕙᓗᓐᓃᑦ ᐃᓅᓯᕆᔭᔪᓂᒃ ᐊᓯᒥᓂᒃ ᓱᕈᐃᓚᖓᓂᖓᓂᒃ ᐃᖕᒥᓃᕋᓗᐊᕈᓂ.

    ᖃᓄᕐᓕ ᐃᓕᓐᓂᐊᖅᓯᒪᑦᑎᐊᖅᑐᓂᒃ ᖃᐅᔨᒪᔨᑕᓄᑦ ᐃᑲᔪᖅᑕᐅᒍᓐᓇᕐᓂ?

    ᑐᐊᕕᕐᓇᖅᓯᑎᓪᓗᒍ

    ᐃᓱᒪᓕᕆᔨᓄᑦ ᐃᓕᓐᓂᐊᖅᓯᒪᑦᑎᐊᖅᑐᑦ ᐃᑲᔪᖅᑎᐅᕙᒃᑐᑦ ᑕᐱᕆᔭᐅᔪᑦ ᖃᐅᔨᒪᔨᐅᔪᓄᑦ ᐃᑲᔪᖅᑕᐅᔪᒪᐃᓐᓇᓲᑦ, ᐱᓗᐊᖅᑐᒥᒃ ᐃᓄᒃ ᐃᓱᒪᒃᑯᑦ ᓈᒻᒪᒍᓐᓃᖅᓯᒪᓗᐊᓕᖅᑎᓪᓗᒍ ᖃᐅᔨᒪᑦᑎᐊᕈᓐᓃᖅᑐᔮᕐᓗᓂᓗ. ᐃᖕᒥᓃᕈᒪᔪᖅ ᐱᓯᒪᒍᓂ ᐋᓐᓂᖅᓯᔾᔪᑎᒋᔪᓐᓇᖅᑕᒥᓂᒃ ᐅᕝᕙᓗᓐᓃᑦ ᑲᑉᐱᐊᓵᕆᓕᖅᐸᑦ ᐃᓕᖕᓂᒃ, ᐃᑲᔪᖅᑕᐅᔭᕆᐊᖃᖅᐳᑎᑦ ᐸᓖᓯᒃᑯᓐᓄᑦ/ᐳᑭᖅᑕᓕᒃᑯᓐᓄᑦ, ᐃᓕᖕᓂᒃ ᓴᐳᓐᓂᐊᕐᕆᐊᖃᕋᕕᑦ.

    ᑭᓯᐊᓂᓕᑕᐅᖅ, ᑕᐃᓐᓇ ᐃᓄᒃ ᐃᑲᔪᖅᑕᐃᑦ ᐅᖃᕈᒪᖏᑐᐃᓐᓇᕆᐊᖃᕆᕗᖅ ᖃᐅᔨᒪᔨᑕᕐᒧᑦ ᐃᓕᓐᓂᐊᖅᓯᒪᑦᑎᐊᖅᑐᒧᑦ, ᑕᐃᓐᓇᓗ ᐃᓕᖕᓄᑦ ᖃᓂᑦᑑᒍᓂ ᖃᐅᔨᒪᑦᑎᐊᖅᑕᐃᑦ , ᐃᓱᒪᓘᑎᒋᑐᐃᓐᓇᕆᐊᖃᕐᒥᒐᕕᐅᒃ ᐃᓄᑑᑎᑦᑎᓕᕈᓐᓇᕐᓂᕐᒧᑦ. ᓱᓕᔪᒥᒃᑕᐅᖅ ᑕᐃᒪ, ᐃᓚᖏᑦ ᐃᓄᐃᑦ ᐃᓱᒪᓯᒪᓕᖅᑐᑦ ᐃᖕᒥᓃᕈᒪᓂᖅ ᐅᕝᕙᓗᓐᓃᑦ ᐸᕐᓇᒃᓯᒪᓕᖅᑐᑦ ᐃᖕᒥᓃᓚᖓᓕᕐᓂᒥᓂᒃ ᐃᓱᒪᖃᕈᓐᓇᕐᒥᔪᑦ ᐃᑲᔪᖅᑕᐅᒍᓐᓇᔾᔭᖏᓐᓂᕐᒥᓂᒃ.

    ᑐᐊᕕᕐᓇᕐᓂᖓ ᐊᓂᒎᑎᓯᒪᓕᖅᐸᑦ

    ᐃᖕᒥᓃᕈᒪᓂᖓᓄᑦ ᑐᐊᕕᕐᓇᖅᑐᖅ ᐊᓂᒍᖅᓯᒪᓕᖅᐸᑦ, ᐅᔾᔨᖅᑐᑦᑎᐊᕐᓂᐊᕐᐸᐃᑦ ᑕᐃᓐᓇ ᐃᓄᒃ ᐃᓱᒪᓕᕆᔨᓄᓪᓗᓐᓃᑦ ᐊᓐᓂᐊᓯᐅᖅᑎᓄᓪᓗᓐᓃᑦ ᐃᑲᔪᖅᑕᐅᔭᕆᐊᖃᕐᓂᖓᓂᒃ ᐱᔭᕆᐊᖃᕐᓂᖓᓂᒃ ᒪᓕᖕᓂᐊᖅᑐᓂᒃ. ᐊᓯᖏᑦ ᒪᓕᒐᒃᓴᐃᑦ ᓇᓗᓇᐃᒃᑯᑕᐃᑦᑕᐅᖅ ᑖᒃᑯᓇᓂ ᑭᖑᓕᕇᒃᑐᓂᒃ ᐊᑐᒐᒃᓴᓂ ᐊᑑᑎᖃᕈᓐᓇᕐᓂᐊᖅᑐᒃᓴᐅᒋᕗᑦ ᐃᓕᖕᓄᑦ ᑕᐃᒪᐃᓕᖓᑎᑦᑎᓕᕈᓐᓇᕐᓂᕐᒧᑦ.

    ᖃᓄᐃᓕᖓᓂᐊᕋᒪᓕ ᐅᕙᓐᓄᑦ ᓱᓕᔫᑎᑦᑎᓚᐅᕐᓂᖓᓂᒃ ᐊᓯᖓᓄᑦ ᐅᖃᐅᓯᕆᔾᔭᖏᓂᖅ?
    ᐊᖏᖃᑦᑕᕆᐊᖃᖏᑐᑎᑦ ᐊᑐᕈᒪᓚᐅᖅᑕᖏᓐᓂᒃ ᐃᖕᒥᓃᕈᒪᓂᕐᒧᑦ ᐅᖃᐅᓯᐅᑕᐃᓕᒪᓂᐊᕐᓂᕋᐃᓗᑎᑦ. ᑭᓯᐊᓂᓕ, ᐃᒃᐱᒋᑦᓯᐊᕆᐊᖃᖅᐸᐃᑦ ᐃᓅᑉ ᐸᒡᕕᓴᖅᑕᐅᔭᕆᐊᖃᖏᓐᓂᖓ ᒪᓕᒐᒃᓴᖃᖅᐳᖅ ᑖᒃᑯᓇᓂ ᓇᓗᓇᐃᒃᑯᑕᓂᒃ ᑭᖑᓕᕇᒃᑐᓂᒃ ᑕᐃᔭᐅᔪᓂᒃ ᓯᕗᓪᓕᖅᐹᖑᓪᓗᑎᒃ ᐃᑲᔪᖅᑎᐅᓂᕐᒧᑦ ᒪᓕᒐᒃᓴᐃᑦ ᐃᖕᒥᓂᖅ ᑖᓐᓇ ᐋᓐᓂᖅᓯᔪᓐᓇᕐᓂᖓᓂᒃ, ᑐᑭᓯᕚᓪᓕᕈᑕᐅᔪᓐᓇᖅᑐᑦ ᐃᓕᖕᓄᑦ ᐊᒻᒪᓗ ᐃᑲᔪᕐᓂᖃᕈᓐᓇᖅᑐᑦ ᑕᐃᒪᐃᓕᖓᔪᖃᖅᐸᑦ.

    ᑭᖑᓪᓕᖅᐹᑦ ᖃᐅᔨᒪᔭᐅᔭᕆᐊᓖᑦ

    ᐱᔪᓐᓇᕐᓂᓕᒫᕐᓂᒃ ᐱᓇᓱᐊᕈᔾᔨᓂᐊᖅᑯᑎᓐ ᐃᓄᖕᒥᒃ ᐃᑲᔪᕋᓱᐊᖅᑕᕐᓂᒃ. ᐃᖅᑲᐅᒪᓂᐊᖅᐳᑎᑦ, ᐊᒃᓱᕈᖅᓱᑎᒃ ᐃᑲᔪᕋᓱᐊᖅᓯᒪᔭᕋᓗᐊᕐᓂᒃ, ᐃᓚᖏᑦᑕᐅᖅ ᓱᓕ ᐃᓅᔫᓐᓃᓱᖑᖕᒥᔪᑦ ᐃᖕᒥᓃᕐᓂᕐᒧᑦ.

    ᐊᑐᖅᑕᐅᓯᒪᔪᑦ ᐅᑯᓇᖓᑦ: MHFA−ᒥᒃ ᐊᕈᓐᓃᖅᓴᐃᔾᔪᑏᓪᓗ ᖃᐅᔨᓴᕈᑏᓪᓗ ᐊᑐᖅᑕᐅᕙᖏᓂᖏᑦ, OREYGAN−ᑯᑦ ᖃᐅᐃᓴᕐᕕᖓᓐᓂᒃ, ᐱᓕᕆᕝᕕᖓᓂ ᐃᓱᒪᓕᕆᔨᒃᑯᑦ, ᐃᓕᓐᓂᐊᕐᕕᐊᓗᐊᓂ ᔫᓂᕘᓯᑎᒥᒃ ᒥᐊᓪBᐅᐊᓐᒥ, ᐋᔅᑐᕇᓕᔭᒥᒃ

ᒪᒃᐱᒐᕐᒧᑦ ᒪᓕᒃᑐᒧᑦ ᑲᔪᓯᓕ: ᐅᓗᕆᐊᓇᕈᑏᓪᓗ ᓴᐳᓐᓂᐊᕈᑕᐅᕙᒃᑐᓪᓗ ᐱᔾᔪᑕᐅᕙᖕᓂᖏᑦ