ᑖᓐᓇ ᐃᓕᓐᓂᐊᕈᑦ ᐃᓕᓐᓂᐊᖅᑐᒧᑦ ᑐᑭᓯᑎᑦᑎᒍᑎ ᐊᑐᖅᑕᐅᓲᓂᑦ ᐊᑐᖅᑕᐅᒐᔪᑦᑐᓂᑦ ᓂᐅᕐᕈᑎᖃᓲᓂᑦ.
ᓴᖅᑭᔮᙱᑦᑐᓂᑦ ᐃᔨᕋᖅᑐᖅᑐᓂᑦ ᐃᓄᓐᓂᑦ ᓂᐅᕐᕈᑎᖃᕐᐸᑦᑐᑦ ᐃᓅᓯᖏᓐᓂ, ᐊᔾᔨᒌᙱᑐᒡᒍᑎᓂᑦ ᐱᔭᕆᐊᑐᔪᓂᑦ ᐊᑐᖅᑕᐅᔪᖃᖃᑦᑕᕐᖓᑦ, ᐊᒻᒪᓗ ᐱᒻᒪᕆᐅᓪᓗᓂ ᐊᖏᕐᓯᒪᑦᑕᐃᓕᓂᖅ ᐊᑕᐅᓯᑐᐊᕐᒥᒃ−ᐃᓘᓐᓇᖏᓐᓄᑦ−ᐊᑐᖅᑕᐅᕙᑦᑐᒥᒃ ᐃᓱᒪᖃᕆᐊᔅᓴᖅ ᑐᑭᐅᓯᒪᓂᕆᔭᐅᕙᑦᑐᓂᑦ ᐅᓂᒃᑳᖑᕙᑦᑐᓂᓪᓗ. ᐃᖅᑲᐅᒪᔭᕆᐊᖃᕐᒥᔪᖅ, ᐊᑐᖅᑕᐅᓗᐊᕐᐸᑦᑐᓂᑦ ᐅᖃᐅᓯᖃᕋᔪᓲᖑᒻᒥᔪᑦ ᐊᒥᓱᑦ ᐊᓐᓇᔅᓯᒪᔪᑦ ᐱᓕᕆᖃᑎᖃᖃᑦᑕᑎᓪᓗᒋᑦ ᓂᐅᕐᕈᑎᖃᖃᑦᑕᕐᓯᒪᔪᓂᒃ ᑖᒃᑯᓂᖓ. ᒪᑯᐊᖑᓲᑦ ᐱᔪᒥᓴᐃᓂᖅ, ᐅᐸᓗᖓᐃᔭᐃᓂᖅ, ᐃᓄᑑᑦᑎᐅᑎᑎᑦᑎᓂᖅ, ᐊᐅᓚᑦᑎᓂᖅ ᐱᙳᐊᕆᓪᓗᒍ/ᑎᓕᐅᕆᖃᑦᑕᕐᓂᖅ ᑲᑉᐱᐊᓵᕆᕙᑦᑕᓂ, ᐊᒻᒪᓗ ᐊᑐᕐᓂᓗᓐᓂᖅ. ᐃᓘᓐᓇᑎᒃ ᑕᓪᓕᒪᑦ ᑕᒪᒃᑯᐊ ᐊᑐᖅᑕᐅᓲᑦ ᓴᖅᑭᔮᕈᓐᓇᖅᑐᑦ, ᐅᕝᕙᓘᓐᓃᑦ ᐃᓚᐃᓐᓇᖏᑦ ᓴᖅᑭᔮᕈᓐᓇᖅᑐᑦ; ᐊᑕᓲᑦ ᐊᒥᓱᓄᑦ ᐱᔾᔪᑕᐅᕙᑦᑐᓄᑦ ᓲᕐᓗ ᐱᖃᑎᒌᓐᓂᕆᕙᑦᑕᖓ ᑖᒃᑯᐊ ᐱᙳᐊᕆᔭᖅ/ᐱᓂᕐᓗᑦᑕᐅᓯᒪᔪᖅ ᐊᒻᒪᓗ ᓂᐅᕐᕈᑎᖃᕐᐸᑐᖅ, ᐱᙳᐊᕆᔭᐅᔫᑉ ᐃᓅᓯᖓᑕ ᖃᓄᐃᑦᑐᒦᓐᓂᖓ ᑲᑎᓯᑎᓪᓗᒍ ᓂᐅᕐᕈᑎᖃᓲᕐᒥᒃ, ᐊᓯᖏᓐᓂᓪᓗ.
ᐊᔾᔨᒋᙱᑕᖓᓂᓪᓕ ᖁᐊᕐᓵᓇᖅᑑᓪᓗᒋᑦ ᑐᓴᕋᔅᓴᓕᐊᖑᓲᑦ ᐅᓂᒃᑳᖑᕙᑦᑐᑦ ᐅᕝᕙᓘᓐᓃᑦ Hᐊᓕᕗᑦᒥ ᑕᕐᕆᔮᓕᐊᖑᕙᑦᑐᑦ, ᐊᑐᖅᑕᐅᓪᓚᑦᑖᐸᑦᑐᕐᓕ ᐱᓂᕐᓗᑦᑕᐅᕙᑦᑐᑦ ᑎᒍᔭᐅᑐᐃᓐᓇᕋᔪᐃᑦᑐᑦ ᓯᓚᒥ, ᐊᑦᑐᖏᖅᑕᐅᓯᒪᒐᔪᙱᑦᑐᑦ ᐊᒻᒪᓗ ᓯᐊᓛᖅᑎᑐᑦ ᐱᔭᐅᓲᖑᙱᑦᑐᑦ.
ᐅᖃᐅᓯᖃᓚᐅᙱᓂᑦᑎᓐᓂ ᑕᓪᓕᒪᓂᑦ ᐊᑐᖅᑕᐅᓲᓂᑦ ᐃᓄᓐᓂᑦ ᓂᐅᕐᕈᑎᖃᕐᐸᑦᑐᓂᑦ, ᕿᒥᕐᕈᖄᕐᓂᐊᖅᑐᒍᑦ ᖃᓄᖅ ᐱᙳᐊᖑᓕᑐᐃᓐᓇᕆᐊᓖᑦ ᓂᕈᐊᖅᑕᐅᓲᖑᒻᒪᖔᑕ.
ᓂᕈᐊᕐᓂᖅ ᑭᓇᐅᓂᐊᕐᒪᖔᖅ. ᓂᐅᕐᕈᑎᖃᓲᑦ ᓯᓚᐃᕐᕆᔭᐅᔨᐅᒻᒪᑕ ᕿᓂᓲᑦ ᐱᙳᐊᕆᔭᔅᓴᓂᑦ. ᐃᓄᓕᒫᓄᑦ ᑐᓴᕋᔅᓴᓕᕆᕕᒃ ᐊᑐᖅᑕᐅᓂᕐᐹᖑᕙᑦᑐᖅ ᕿᓂᖅᑎᓪᓗᒋᑦ ᓯᓚᐃᕐᕆᔭᕐᓂᓂᕐᐹᓂᑦ ᑭᒃᑯᑐᐃᓐᓇᕐᓂᑦ ᓇᓂᔪᓐᓇᖅᑕᖏᓐᓂᒃ. ᑕᑯᓂᐊᕈᕕᑦ ᑭᓇᑐᐃᓐᓇᐅᑉ ᒥᔅᓵᓄᑦ ᐋᖅᑭᑦᑕᐅᓯᒪᔪᓂᑦ ᐅᕘᓇ Instagram ᐅᕝᕙᓘᓐᓃᑦ TikTok ᑕᑯᔭᔅᓴᐅᕗᑦ ᖃᓄᖅ ᐃᒻᒥᓂᒃ ᐃᑉᐱᒋᒻᒪᖔᑕ, ᐊᑲᐅᙱᓕᐅᕈᑎᖃᖃᑦᑕᕐᒪᖔᑕ ᐊᖏᕐᕋᖏᓐᓂ ᐅᕝᕙᓘᓐᓃᑦ ᐱᖃᑎᖏᓐᓂᒃ, ᑮᓇᐅᔭᓂᑦ ᐃᓱᒫᓘᑎᖃᕐᒪᖔᑕ, ᐊᒻᒪᓗ ᓇᒧᙳᖃᑦᑕᓲᖑᒻᒪᖔᑕ. ᐃᓘᓐᓇᑎᒃ ᑕᐃᒫᒃ ᓇᓂᔭᐅᖃᑦᑕᖏᒻᒥᔪᑦ − ᐃᓚᖏᑦ ᐃᓚᒌᓂᑦ, ᐅᕝᕙᓘᓐᓃᑦ ᐱᖃᑎᖏᑕ ᐱᖃᑎᖏᑎᒍᑦ. ᐱᙳᐊᕆᔭᔅᓴᒥᒃ ᓇᓂᓯᓯᒪᓕᑐᐊᕋᐃᒻᒪᑕ, ᐅᑯᐊ ᓂᐅᕐᕈᑎᖃᕐᓂᕐᒧᑦ ᐊᑐᖅᑕᐅᓲᑦ ᐊᑐᖅᑕᐅᓯᓲᑦ.
ᐱᙳᐊᕆᔭᔅᓴᒥᒃ ᓇᓂᓯᓯᒪᓕᑐᐊᕋᐃᒻᒪᑕ, ᐅᑯᐊ ᓂᐅᕐᕈᑎᖃᕐᓂᕐᒧᑦ ᐊᑐᖅᑕᐅᓲᑦ ᐊᑐᖅᑕᐅᓯᓲᑦ.
ᑲᐃᑦ 13ᓂᒃ ᐅᑭᐅᓕᒃ ᐊᕐᓇᖅ ᓄᓇᕗᒻᒥᐅᑕᖅ ᐊᓈᓇᖓᓗ, ᐊᖑᑎᔅᓴᖓᓗ, ᖃᑕᙳᑎᖏᓪᓗ. ᑲᐃᑦ ᑕᑯᓐᓈᕋᔪᑉᐸᑦᑐᖅ ᐊᓈᓇᖓ, ᐊᓂᑯᓗᐊᓗ ᐊᖏᔪᑦᑎᖅ, ᐋᓐᓂᑎᖅᑕᐅᑎᓪᓗᒋᒃ ᓂᓪᓕᐊᑲᒻᒪᕝᕕᐅᑎᓪᓗᒋᓪᓗ ᐊᖑᑎᔅᓴᖓᓄᑦ. ᐊᖑᑎᔅᓴᖓ ᐃᒥᐊᓗᓗᐊᖃᑦᑕᕐᖓᑕ ᓄᖅᑲᕈᓐᓇᕋᓂ, ᐊᒻᒪᓗ ᐊᖏᕐᕋᖓᓂ ᐊᑲᐅᙱᑦᑐᒦᑎᑦᑎᖃᑦᑕᕐᖓᑦ ᑲᐃᑦᒥᒃ. ᑲᐃᑦ ᐊᖏᔪᖅᑳᖏᒃ ᐳᓛᖅᑎᖃᕋᔪᓲᖑᒻᒪᑎᒃ ᐱᖃᑎᖏᓐᓂᒃ, ᐊᒻᒪᓗ ᑲᐃᑦ ᓇᒻᒥᓂᕐᓱᑲᐃᓐᓇᕈᓐᓇᖃᑦᑕᕋᓂ ᐊᖏᕐᕋᓯᒪᒐᓗᐊᖅᑐᓂ. ᑲᐃᑦ ᖁᓄᔪᕐᓂᐊᖅᑕᐅᖃᑦᑕᕐᓯᒪᔪᖅ ᐅᖃᐅᓯᕆᓚᐅᕐᓯᒪᒐᓂᐅᒃ ᑕᒪᓐᓇ ᑭᓇᓕᒫᒧᑦ, ᐱᔾᔪᑎᒋᓪᓗᒍ ᑕᐃᒪᐃᓕᐅᖅᑎᒋᓯᒪᔭᖓ ᐃᓚᒋᒻᒪᒍ ᐊᒻᒪᓗ ᐅᑉᐱᕆᔭᐅᓂᐊᖅᑐᒋᖃᑦᑕᕋᓂ. ᑲᐃᑦ ᐃᓕᓴᕕᒻᒧᑦ ᐅᐸᑦᑎᐊᖃᑦᑕᓲᖅ, ᑭᓯᐊᓂ ᐃᓕᓴᐃᔨᖓ ᐅᔾᔨᕈᓱᔅᓯᒪᔪᖅ ᐃᑉᐱᒍᓱᒍᓐᓃᐸᓪᓕᐊᓕᕐᓂᖓᓂᒃ ᐃᓕᓐᓂᐊᕈᑎᖏᓐᓂᒃ, ᐅᔾᔨᕆᖃᑦᑕᓕᖅᑐᓂᐅᓪᓗ ᓇᒻᒥᓂᖅ ᖃᓄᐃᓕᐅᖃᑦᑕᕆᐊᔅᓴᖓᓂᒃ.
ᑲᐃᑦ ᖃᐅᔨᒪᔭᖅᑖᐸᓪᓕᐊᓕᕐᓯᒪᔪᖅ ᐊᖑᒻᒪᑦ ᓄᓇᖅᑲᑎᖓᓂᒃ. ᐅᑭᐅᓕᒃ 22ᓂᒃ, ᑭᓯᐊᓂ ᐅᖃᐅᔾᔨᖃᑦᑕᓲᖅ ᑲᐃᑦᒥᒃ ᐃᓱᒪᖃᕐᖓᒡᒍᖅ ᐃᓐᓇᖅᑎᑐᑦ ᐅᑭᐅᑭᒃᑲᓗᐊᖅᑐᓂ ᐊᒻᒪᓗ ᐅᑭᐅᖏᑦ ᖃᓂᒌᓗᐊᙱᒃᑲᓗᐊᖅᑎᓪᓗᒋᒃ ‘ᐃᓱᒫᓗᓇᓗᐊᙱᒪᒡᒎᖅ’. ᐃᑲᔪᖅᑎᒋᓕᖅᑐᓂᐅᒃ ᑲᐃᑦ, ᐊᒻᒪᓗ ᐃᑉᐱᒋᕙᑦᑐᓂᐅᒃ ᑐᑭᓯᐊᔭᐅᔪᖅᑎᑐᑦ. ᓂᓪᓕᐊᕕᒋᕙᑦᑕᖓ ᖃᓄᑎᒋ ᖁᕕᐊᓱᙱᑎᒋᕙᒻᒪᖔᕐᒥ ᐊᖏᕐᕋᖓᓂ ᐃᓛᓐᓂᒃᑯᑦ, ᖃᓄᕐᓗ ᐊᖑᑎᔅᓴᖓ ᑲᑉᐱᐊᓇᖃᑦᑕᕐᒪᖔᖅ, ᐊᒻᒪᓗ ᖁᓄᔪᕐᓂᐊᖅᑕᐅᓚᐅᕐᓯᒪᓂᖓᓂᒃ.
ᑲᐃᑦ ᑖᓐᓇᓗ ᐊᖑᑦ ᐃᑦᑎᒎᓯᓪᓗᑎᒃ, ᑲᐃᑦᓗ ᓇᓪᓕᒋᔭᐅᔭᕆᐊᔅᓴᖅ ᐃᑉᐱᒍᓱᑦᑐᓂ. ᑕᖅᑮᑦ ᐊᒥᓲᙱᑦᑐᑦ ᐊᓂᒍᕐᖓᑕ, ᑖᓐᓇ ᐊᖑᑦ ᐋᖓᔮᕐᓇᖅᑐᓂᑦ ᖃᐅᔨᑎᑦᑎᓪᓗᓂ ᑲᐃᑦᒥᒃ. ᑲᐃᑦ ᓱᕐᕋᓯᒪᖃᑦᑕᕈᓐᓇᓯᓪᓗᓂ ᐃᓱᒪᔮᖃᑦᑕᓂᐊᙱᓐᓇᒥ, ᐊᒻᒪᓗ ᖁᕕᐊᓱᐊᕕᐅᑎᖃᑦᑕᖅᑐᓂ ᓱᕐᕋᓇᖅᑐᓂᑦ ᐱᖃᑎᒋᕙᑦᑐᓂᐅᒃ ᑖᓐᓇ ᐊᖑᑦ. ᑖᓐᓇ ᐊᖑᑦ ᐋᓐᓂᖅᑎᕆᓲᕈᑐᓂ ᑲᐃᑦᒥᒃ. ᓂᓪᓕᐊᑲᒻᒪᕝᕕᖃᖃᑦᑕᓕᖅᑐᓂ ᖃᐃᒐᓛᕐᕕᖃᕐᐸᑦᑐᓂ ᓂᙵᐅᒪᓪᓗᓂ, ᒥᓪᓗᐸᑦᑐᓂ ᑖᔅᓱᒥᖓ, ᐱᖑᓯᕙᑦᑐᓂᓗ. ᓂᙵᐅᒪᓚᐅᖅᑐᓂ, ᒪᒥᐊᑉᐸᑦᑐᖅ ᐊᒻᒪᓗ ᐅᖃᕐᐸᑦᑐᓂ ᑮᓇᐅᔭᓂᒡᒎᖅ ᐱᔾᔪᑎᖃᖅᑐᓂ ᐊᔅᓱᕈᖃᑦᑕᕋᒥ, ᐊᒻᒪᓗ ᐋᖓᔮᕐᓇᖅᑐᑦ ᐊᑭᑐᔪᐊᓘᒻᒪᑕᒎᖅ. ᐅᖃᖅᑐᓂ ᑲᐃᑦᒧᑦ ᐃᖅᑲᓇᐃᔭᖃᑎᖓᒎᖅ ᐃᓱᒪᒋᔭᖃᖃᑦᑕᕐᖓᑦ ᑖᔅᓱᒥᖓ ᐃᑦᑎᓇᖅᑐᐊᓘᓂᕋᐃᕙᑦᑐᓂ, ᐊᒻᒪᓗ ᐊᐃᑉᐸᖃᕈᓂᒎᖅ ᑖᔅᓱᒥᖓ ᐊᑕᐅᓯᐊᕐᓗᓂ, ᓈᒻᒪᑦᑐᓂᑦ ᑮᓇᐅᔭᖅᑖᕋᔭᕐᖓᑎᒃ ᐅᓪᓗᒐᓴᓐᓂᒃ ᐅᓐᓄᒃᑯᑦ ᐹᑎᖃᑦᑕᕋᔭᕐᖓᑎᒃ. ᑲᐃᑦ ᖁᕕᐊᓱᑦᑎᑦᑎᒍᒪᓪᓗᓂ ᑖᔅᓱᒥᖓ ᐊᖑᒻᒥᒃ, ᐊᖏᖅᑐᓂ ᑕᒪᑐᒧᖓ.
ᑭᖑᓂᑦᑎᐊᖓᒍᑦ, ᑖᓐᓇ ᐊᖑᑦ ᐃᓪᓗᐊᕐᔪᖓᓗ ᓂᐅᕐᕈᑎᖃᖃᑦᑕᓯᓪᓗᑎᒃ ᑲᐃᑦᒥᒃ ᐊᔾᔨᒌᙱᑐᒡᒍᑎᓄᑦ ᐃᓪᓗᓄᑦ ᐃᓕᓐᓂᐊᕇᕋᐃᒻᒪᑦ. ᑲᐃᑦᒥᒃ ᐃᑉᐱᒍᓱᑦᑎᑎᓪᓗᑎᒃ ᐃᓚᒋᔭᐅᔫᔮᖃᑦᑕᖅᑐᑎᑐᑦ, ᐊᒻᒪᓗ ᐊᑑᑎᖃᕆᔭᐅᓪᓗᓂ. ᐊᐃᑉᐸᖃᖅᑎᑕᐅᕙᓕᖅᑐᓂ ᐊᒥᓱᐊᖅᑎᖅᑐᓂ ᖃᐅᑕᒫᑦ, ᐊᒻᒪᓗ ᐊᑭᓕᖅᑕᐅᕙᑦᑐᓂ ᐋᖓᔮᕐᓇᖅᑐᓂᑦ, ᓇᓪᓕᑯᒥᑦᑕᐅᖃᑦᑕᓂᕐᒥᒃ, ᓇᓪᓕᒋᔭᐅᖃᑦᑕᓂᕐᒥᒃ, ᐊᒻᒪᓗ ᐊᖏᕐᕋᖓᓃᙱᑲᐃᓐᓇᕈᑎᔅᓴᖓᓂᒃ.
ᐋᓇ 18ᓂᒃ ᐅᑭᐅᓕᒃ ᓄᓇᕗᒻᒥᐅᑕᖅ, ᐊᒻᒪᓗ ᐊᐅᓪᓛᕋᑖᕐᓂᑰᓪᓗᓂ ᐋᑐᕚᒧᑦ ᓯᓚᑦᑐᓴᕐᕕᒻᒧᑦ ᐃᓕᓐᓂᐊᕆᐊᖅᑐᓂ. ᐋᓇ ᖁᕕᐊᓱᓪᓚᕆᑦᑐᖅ ᖃᓪᓗᓈᑦ ᓄᓇᖓᓐᓅᕆᐊᔅᓴᖅ, ᓯᓚᑦᑐᓴᕐᕕᓕᐊᕆᐊᔅᓴᖅ, ᐊᒻᒪᓗ ᖃᐅᔨᕙᓪᓕᐊᒋᐊᖅᑐᖅᑐᓂ ᑭᓇᐅᓂᕐᒥᓂᒃ. ᐋᓇ ᐃᓚᓕᒃ ᐃᓚᒌᑦᑎᐊᖅᑐᐊᓗᓐᓂᑦ ᐱᒃᑯᒍᓱᑦᑎᐊᖅᑐᓂᓪᓗ ᐃᓄᓐᓂᑦ ᐃᓚᒌᓂᑦ, ᑭᓯᐊᓂ ᐃᓛᓐᓂᒃᑯᑦ ᐊᔅᓱᕈᕈᑎᖃᖃᑦᑕᓲᖅ ᓇᒻᒥᓂᖅ ᑕᐅᑦᑐᖓᓂᒃ ᓄᒫᓱᖃᑦᑕᓂᕐᒥᓪᓗ.
ᖃᓪᓗᓈᑦ ᓄᓇᖓᓐᓃᓕᕋᒥ, ᐋᓇ ᐱᖃᑎᑖᖅᑐᓯᑦᑕᐅᑎᒋᔪᖅ ᑕᕝᕗᖓᔅᓴᐃᓐᓇᖅ ᐃᓕᓐᓂᐊᕆᐊᕐᐸᑦᑐᓂᑦ ᐃᓕᓐᓂᐊᕐᕕᖓᓄᑦ, ᐊᒻᒪᓗ ᖁᕕᐊᒋᔭᖃᓯᓪᓗᓂ ᓯᓚᑦᑐᓴᕐᕕᒻᒥ ᑕᐃᒫᒃ ᐃᓅᓯᖃᕆᐊᔅᓴᖅ. ᐋᓇᐅᑉ ᐱᖃᑎᒋᕙᑦᑕᖏᑦ ᖁᕕᐊᒋᔭᓖᑦ ᐃᒥᕋᓚᖃᑦᑕᓂᕐᒥᒃ ᐃᓕᓐᓂᐊᕐᓇᐅᒍᓐᓃᕋᐃᒻᒪᑦ, ᐊᒻᒪᓗ ᐊᓂᒐᔪᓲᖑᓪᓗᑎᒃ ᑖᒃᑯᓄᖓᔅᓴᐃᓐᓇᖅ ᒪᕐᕉᓐᓄᒃ ᐃᒥᕋᓚᕝᕕᐅᕙᑦᑑᓐᓄᒃ ᑕᐅᓇᓂᒥᐅᓂᑦ ᐱᓇᓱᐊᕈᓯᐅᑉ ᓄᙳᐊᓂ.
ᐋᓇᐅᑉ ᐃᓕᓐᓂᐊᕈᑎᖏᑦ ᑲᑕᑉᐸᓪᓕᐊᓯᒪᔪᑦ ᐹᑎᓗᐊᖃᑦᑕᓕᕐᖓᑦ ᐱᖃᑎᖏᓐᓂᒃ ᐱᖃᑎᖃᖅᑐᓂ, ᐊᒻᒪᓗ ᕿᓚᒥᕕᔾᔪᐊᕌᓗᒃ ᑮᓇᐅᔭᖅᑖᕆᓯᒪᔭᖏᑦ ᐃᓕᓴᕕᒻᒧᑦ ᐊᑐᕐᓂᐊᖅᑕᖏᑦ ᓄᖑᑉᐸᓪᓕᐊᓯᓪᓗᑎᒃ. ᐱᖃᑎᖏᑎᑐᑦ ᐃᓚᖃᙱᒪᓪᓕ ᑕᒫᓂ ᓄᓇᓕᓐᓂᑦ, ᐋᓇ ᓇᓗᓕᖅᑐᓂ ᑭᓇᒧᑦ ᓵᓐᓂᐊᕆᐊᔅᓴᖅ. ᐃᓚᖏᑦ ᐅᐱᒍᓱᓪᓚᕆᒻᒪᑕ ᐃᓕᓴᔭᖅᑐᕐᓯᒪᒻᒪᑦ, ᐊᒻᒪᓗ ᖁᓅᒻᒥᖁᓇᓂᒋᑦ. ᐋᓇ ᐃᓄᑐᐊᕌᓘᔮᓕᖅᑐᓂ ᐃᓪᓗᒐᓴᓕᕐᔪᐊᓂᑦ ᐊᒻᒪᓗ ᓇᓗᓕᖅᑐᓂ ᑭᓇᒧᑦ ᐅᖃᕆᐊᔅᓴᖅ.
ᐋᓇ ᐅᐸᑦᑕᐅᒻᒪᑦ ᐊᖑᒻᒧᑦ ᐃᒥᕋᓚᕝᕖᑦ ᐃᓚᖓᓐᓂ ᐅᐸᒐᔪᑉᐸᑦᑕᖓᓂ. ᐋᖓᔮᖅᑐᓂ, ᐅᓂᒃᑲᐅᑎᓯᓪᓗᓂᐅᒃ ᑖᓐᓇ ᐊᖑᑦ ᐊᔅᓱᕈᕈᑎᒋᕙᑦᑕᖏᑕ ᒥᔅᓵᓄᑦ. ᑖᓐᓇ ᐊᖑᑦ ᐋᓇᒥᒃ ᒧᒥᕆᐊᖅᑐᓛᖁᔨᓪᓗᓂ ᐃᒥᕋᓚᕝᕕᐅᓲᒧᑦ ᓇᒻᒥᓂᖁᑎᖓᓄᑦ ᑯᐸᐃᒻᒦᑦᑐᒥᒃ, ᐅᖃᐅᔾᔨᓪᓗᓂ ᐋᓇᒥᒃ ᕿᓚᒥᐊᓗᒃ ᑮᓇᐅᔾᔭᒃᑲᔭᕐᖓᒡᒎᖅ, ᐃᓕᓐᓂᐊᕐᓇᕈᓐᓃᖅᑲᑦ, ᐊᒻᒪᓗ ᖃᐅᔨᒪᔭᐅᒋᐊᑐᒐᔭᙱᑦᑐᑦ ᑮᓇᐅᔭᖅᑖᕆᒐᔭᖅᑕᖏᑦ. ᐅᖃᖅᑐᓂ ᖃᐅᔨᒪᔪᖃᕆᐊᑐᒐᔭᙱᑦᑐᕉᖅ ᐃᓕᓴᕕᖓᓂ, ᐊᖏᕐᕋᖓᓂ, ᐊᒻᒪᓗ ᕿᓚᒥᕈᓘᖃᑦᑕᕋᔭᕐᖓᑦ ᐃᖅᑲᓇᐃᔭᑲᐃᓐᓇᖃᑦᑕᕐᓗᓂ ᐃᓕᓐᓂᐊᕈᑎᖏᓐᓂᒃ ᑲᒪᖃᑦᑕᕈᓐᓇᕋᔭᖅᑐᖅ ᓱᓕ.
ᒧᒥᖅᑎᕈᓚᐅᖅᑐᓂ ᐊᓐᓄᕋᐃᔭᖅᑎᕐᕕᒻᒥ, ᐊᒻᒪᓗ ᑕᑎᒋᔪᓐᓇᕐᓯᓚᐅᖅᑐᓂᐅᒃ ᑖᓐᓇ ᐊᖑᑦ ᖃᐅᔨᒋᐅᕐᓯᒪᔭᖓ, ᐅᖃᐅᔾᔨᓪᓗᓂ ᐋᓇᒥᒃ ᐊᑐᖃᑦᑕᖁᓯᓪᓗᓂᐅᒃ ᓴᙱᓂᕐᓴᒥᒃ ᓱᕐᕋᓯᒪᓇᖅᑐᒥᒃ ᑰᑲᐃᓐᒥᒃ ᐃᖅᑯᒪᑯᑖᖃᑦᑕᕈᓐᓇᓂᐊᕐᑦ ᐅᓐᓄᐊᒃᑯᑦ ᒧᒥᕐᕕᒻᒥ. ᐊᑭᖃᕋᓂ, ᑖᔅᓱᒪ ᐱᑎᖃᑦᑕᓂᐊᕐᖓᒍ ᑕᐃᒪᐃᑦᑐᓂᑦ.
ᐱᓇᓱᐊᕈᓰᑦ ᐊᒥᓲᙱᑦᑐᑦ ᐊᓂᒍᕐᖓᑕ, ᑖᓐᓇ ᐊᖑᑦ ᐊᐱᕆᓕᕆᓪᓗᓂ ᐋᓇᒥᒃ ᓄᓕᐊᕐᓂᕐᒨᖓᔪᓂᑦ ᐊᑐᖃᑦᑕᖁᓯᓪᓗᓂᐅᒃ ᑐᓄᐊᓂ ᐊᑭᓕᕐᓱᐃᕙᑦᑐᓄᑦ. ᐋᓇ ᐊᑲᐅᔅᓴᕋᓂ ᑕᐃᒫᒃ, ᑭᓯᐊᓂ ᖃᐅᔨᓕᖅᑐᓂ ᐊᓯᐊᒎᕐᕕᔅᓴᖃᓗᐊᙱᒋᐊᔅᓴᖅ. ᑖᓐᓇ ᐊᖑᑦ ᑲᑉᐱᐊᓵᕆᓯᓪᓗᓂ ᑕᕐᕆᔮᔅᓴᓂᒡᒎᖅ ᐊᔾᔨᙳᐊᓂᓪᓗ ᓇᔅᓯᐅᔾᔨᒍᒫᕐᖓᑦ ᐃᓚᖏᓐᓄᑦ ᐊᒻᒪᓗ ᑕᑯᓐᓈᖅᑕᐅᑲᒻᒪᓯᓛᕐᖓᑦ ᓄᓇᖅᑲᑎᖏᓐᓄᑦ ᖃᐅᔨᔭᐅᑎᓪᓗᒍ ᐊᓐᓄᕋᐃᔭᖅᑎᖃᑦᑕᕐᖓᑦ ᐃᖅᑲᓇᐃᔮᕆᓪᓗᒍ ᐊᒻᒪᓗ ᐋᖓᔮᕐᓇᑐᖅᑐᖃᑦᑕᕐᖓᑦ. ᑖᓐᓇ ᐊᖑᑦ ᐃᓕᕋᓇᕐᓯᓪᓗᓂ ᑎᒥᒃᑯᑦ ᖃᓄᐃᓕᐅᕆᓪᓗᓂ, ᐋᓇᓗ ᐊᖏᕐᓗᓂ ᑭᓯᐊᓂᐅᓕᖅᑐᓂ. ᑖᓐᓇ ᐊᖑᑦ ᐋᖅᑭᔅᓱᐃᖃᑦᑕᓕᖅᑐᓂ ‘ᐊᐃᑉᐸᕆᓂᐊᖅᑕᖏᓐᓂᒃ’ ᐋᓇᒧᑦ ᑐᓄᐊᓂ ᐊᓐᓄᕋᐃᔭᖅᑎᕐᕕᐅᕙᑦᑑᑉ, ᐊᒻᒪᓗ ᑮᓇᐅᔭᓂᑦ ᓄᐊᑦᑎᕙᑦᑐᓂ.
ᔮᓱᐊ 15ᓂᑦ ᐅᑭᐅᓕᒃ ᐊᖑᑦ, ᐊᓈᓇᖓᓂᒃ ᐃᓪᓗᖃᑎᓕᒃ, ᓄᑲᖅᑎᓂᓪᓗ ᖃᑕᙳᑎᖏᓐᓂᒃ, ᐊᖓᖓᓂᓪᓗ ᓄᓇᕗᒻᒥ. ᔮᓱᐊ ᖁᕕᐊᒋᔭᓕᒃ ᐃᓕᓴᕕᒻᒥᑦ, ᖁᕕᐊᒋᔭᓕᒃ ᐊᖑᓇᓱᖃᑦᑕᕆᐊᔅᓴᖅ, ᐊᒻᒪᓗ ᖁᕕᐊᒋᔭᖃᖅᑐᓂ ᐱᙳᐊᖃᑎᖃᖃᑦᑕᕆᐊᔅᓴᖅ ᓄᑲᖏᓐᓂᒃ. ᒫᓐᓇᕋᑖᖅ, ᔮᓱᐊ ᐅᖃᐅᔾᔨᕋᑖᔪᒻᒪᑦ ᐱᖃᑎᖏᓐᓂᒃ ᐃᓕᓴᕕᒻᒥ ᐊᖑᑕᐅᖃᑎᖏᓐᓅᖓᓂᕋᖅᑐᓂ. ᔮᓱᐊ ᑖᒃᑯᓂᖓᔅᓴᐃᓐᓇᖅ ᐱᖃᑎᖃᖃᑦᑕᕐᓯᒪᔪᖅ ᓱᕈᓯᐅᓂᖓᓂ ᐱᒋᐊᖅᑐᒍ, ᐊᒻᒪᓗ ᐃᓱᒪᓪᓗᓂ ᐃᑲᔪᕐᓯᖅᑕᐅᓂᐊᕆᐊᔅᓴᖅ ᑖᒃᑯᓄᖓ, ᑭᓯᐊᓂᓕ ᒥᑕᐅᑎᒋᔭᐅᓯᓪᓗᓂ, ᑕᓗᕈᒃᑯᑎᓂᕐᒥᒃ ᐃᑉᐱᒍᓱᓕᖅᑎᑕᐅᓪᓗᓂ, ᐊᒻᒪᓗ ᐅᖃᐅᔾᔭᐅᓪᓗᓂ ᖃᓂᒋᔭᐅᖃᑦᑕᕈᒪᒍᓐᓃᕐᓂᕋᖅᑐᑎᒃ. ᕿᓚᒥᕕᔾᔪᐊᕌᓗᒃ ᐅᖃᐅᓯᒥᓂᐅᓕᖅᑐᓂ ᐊᒻᒪᓗ ᔮᓱᐊ ᐱᐅᙱᑐᕐᔪᐊᕌᓗᓐᓂᑦ ᐊᖑᖃᑕᐅᖃᑎᖏᓐᓅᖓᓂᖓᓂᒃ ᓂᓪᓕᕐᕕᐅᖃᑦᑕᓕᖅᑐᒥᓂᐅᓪᓗᓂ ᖃᕋᓴᐅᔭᒃᑯᑦ, ᐃᓕᓴᕕᒻᒥ, ᐊᒻᒪᓗ ᐃᓪᓗᒥᐅᖃᑎᖏᓐᓂᒃ. ᔮᓱᐊ ᐊᖓᖓ ᒥᑕᐅᑎᔅᓴᖅᑐᓂ, ᐊᒻᒪᓗ ᔮᓱᐊ ᐊᓈᓇᖓ ᓯᕐᓈᕋᓂ ᑖᔅᓱᒥᖓ. ᔮᓱᐊ ᐃᓅᓯᕐᒥᓂᒃ ᓴᐱᓕᕆᐊᔅᓴᖅ ᐃᓱᒪᖃᓕᖅᑐᓂ, ᐊᒻᒪᓗ ᐃᓄᑐᐊᕌᓘᔮᓕᖅᑐᓂ. ᐃᓄᑐᐊᓪᓚᕆᐅᔮᓕᖅᑐᓂ ᓄᓇᖅᑲᑎᖏᓐᓂᒃ, ᕿᓂᓯᓪᓗᓂ ᐃᑲᔪᖅᑎᔅᓴᓂᑦ ᖃᕋᓴᐅᔭᒃᑯᑦ. ᔮᓱᐊ ᓇᓂᓯᓪᓗᓂ 2SLGBTQ+ ᑲᑐᔾᔨᖃᑎᒌᓂᑦ ᖃᕋᓴᐅᔭᒃᑯᑦ ᐊᒻᒪᓗ ᐱᖃᑎᑖᖅᑐᖅᑐᓂ ᐃᑲᔪᖅᑐᓂᑦ ᑐᑭᓯᐊᔭᐅᔫᔮᓕᖅᑐᓂ. ᔮᓱᐊ ᐱᖃᑎᑖᖅᑐᓂ ᐊᑕᐅᓯᕐᒥᒃ ᐃᓐᓇᓵᕐᒥᒃ ᐊᖑᒻᒥᑦ ᐋᑐᕚᒥᐅᑕᕐᒥᒃ, ᐅᖃᖅᑐᓂ ᐋᑐᕚ ᖁᕕᐊᓇᓪᓚᕆᓐᓂᕋᖅᑐᒍ, ᐊᒻᒪᓗ ᑭᒃᑯᑐᐃᓐᓇᐃᒡᒎᖅ ᖃᓄᐃᔅᓴᖏᑦᑐᑦ ᐊᖑᑕᐅᖃᑎᖏᓐᓅᖓᒐᓗᖅᑲᑦ ᑕᒫᓂ. ᐅᖃᐅᔾᔨᓪᓗᓂ ᔮᓱᐊᒥᒃ ᐋᑐᕚᓕᐊᖅᑲᑦ ᓂᐅᕐᕈᓗᓂ, ᐊᑭᓕᕐᓂᐊᕐᓂᕋᖅᑐᓂᐅᒃ ᐃᖏᕐᕋᔾᔪᑎᖏᑦ ᑖᔅᓱᒧᖓ.
ᔮᔅ ᐃᓚᓕᒃ ᐊᒥᓲᙱᑦᑐᓂᑦ ᐋᑐᕚᒥ, ᑕᐃᒫᒃ ᐊᓈᓇᓂ ᐅᑉᐱᕈᓱᓕᖅᑎᑦᑐᓂᐅᒃ ᐋᑐᕚᒨᕈᓐᓇᕐᓯᓂᐊᕐᖓᑦ ᐊᒻᒪᓗ ᑐᔪᕐᒥᒐᔭᕐᖓᑦ ᐊᔭᒃᑯᖏᑕ ᐃᓚᖓᓐᓂᒃ. ᐱᖃᑎᖓ ᖃᖓᑦᑕᐅᓰᓪᓗᓂ ᑖᔅᓱᒥᖓ, ᐊᒻᒪᓗ ᔮᓱᐊᑉ ᐃᓚᖏᑦ ᐊᐱᕐᓱᖅᑐᖃᓗᐊᕋᑎᒃ. ᔮᔅ ᐊᔭᒃᑯᖏᓐᓅᕋᒥ ᐋᑐᕚᒥ, ᐊᓂᒍᒪᕕᐅᑎᑦᑐᓂ ᑕᑯᔭᖅᑐᕐᓗᓂᐅᒃ ᐱᖃᑎᑖᖅᑲᐅᖓ.
ᑲᑎᖃᑎᒌᓚᐅᖅᑐᑎᒃ, ᐱᖃᑎᖓ ᐅᖃᖅᑐᓂ ᐊᐃᑉᐸᖃᕐᐸᒪᒡᒎᖅ ᐊᖑᑎᓂᑦ ᑮᓇᐅᔭᒧᑦ ᐊᒻᒪᓗ ᐅᖃᖅᑐᓂ “ᐱᔭᕆᐊᑭᕕᐅᑎᓐᓂᕋᖅᑐᓂᐅᒃ”. ᐅᖃᖅᑐᓂ ᐱᖃᑎᖃᕐᓂᕋᖅᑐᓂ ᐃᑲᔪᕐᓯᒪᔪᒥᒃ ᓇᓂᓯᑎᑦᑎᓂᕐᒥᒃ ᐃᖅᑲᓇᐃᔮᔅᓴᒥᒃ. ᔮᔅ ᐅᖃᖅᑐᓂ ᑕᐃᒫᒃ ᑯᔭᓐᓂᒃᑯᑦ ᐊᐃᑉᐸᖃᓪᓚᕆᓚᐅᕐᓯᒪᙱᓐᓂᕋᖅᑐᓂ ᐊᒻᒪᓗ ᖃᐅᔨᒪᓗᐊᕋᓂ ᖃᓄᖅ ᑕᐃᒫᒃ ᐃᑉᐱᒋᔭᖃᕆᐊᔅᓴᖅ. ᐱᖃᑎᖓ ᐅᖃᐅᓯᖃᖅᑐᓂ ᑮᓇᐅᔭᓂᑦ, ᖁᕕᐊᓇᖅᑐᒥᒃ, ᐃᓱᒪᕐᓱᓂᕐᒥᓪᓗ ᐊᑐᖃᑦᑕᕋᒥ ᑕᐃᒫᒃ ‘ᐃᖅᑲᓇᐃᔭᕋᐃᒐᒥ’, ᑭᓯᐊᓂ ᓱᓕ ᔮᓐ ᓇᓗᖅᑯᑎᓪᓗᓂ. ᐱᖃᑎᖓ ᐅᖃᐅᔾᔨᑦᑎᐊᖅᑐᓂ ᖃᓄᐃᓕᐅᕆᐊᖃᙱᒻᒪᕆᒻᒪᒡᒎᖅ ᖃᓄᐃᓕᐅᕈᒪᙱᒃᑯᓂ, ᐊᒻᒪᓗ ᐊᖑᑎᓂᑦ ᖃᓂᒃᑯᑦ ᓱᑎᒋᑎᑦᑎᖔᖃᑦᑕᕈᓐᓇᕐᓂᕋᐃᓪᓗᓂ ᐊᒻᒪᓗ ᐊᔾᔨᓕᐅᕆᖃᑦᑕᕐᓗᓂ ᑖᔅᓱᒥᖓ. ᔮ ᖁᕕᐊᒋᔭᖃᓪᓚᕆᑦᑐᓂ ᑖᔅᓱᒥᖓ ᓇᔫᑎᒋᐊᔅᓴᖅ ᐊᒻᒪᓗ ᖃᓄᐃᒋᔭᐅᙱᒋᐊᔅᓴᖅ ᐱᖃᑎᑖᖅᑲᐅᖓᓄᑦ ᐊᒻᒪᓗ ᑕᐃᒫᒃ ᐸᕐᓇᒃᑲᒥᒃ ᖃᓄᐃᑦᑑᔮᕋᓂ. ᔮᔅ ᐱᖃᑎᖓ ᖃᐅᔨᑎᑦᑎᓪᓗᓂ ᐊᐅᓚᑦᑎᔨᖓᓄᑦ ᑖᔅᓱᒥᖓ.
ᐱᒋᐊᙵᕐᓂᖓᓂ ᔮᔅ ᐃᓱᒪᓪᓗᓂ ᐊᖏᖅᑐᒥᓂᐅᔭᕆᐊᔅᓴᖅ. ᖃᓄᐃᔅᓴᖅᑑᔮᕋᓂ ᐊᔾᔨᓕᐅᖅᑕᐅᖃᑦᑕᑲᐃᓐᓇᕈᓂ, ᐊᒻᒪᓗ ᐊᖑᑎᓄᑦ ᐊᑦᑐᐊᔭᐅᖃᑦᑕᕐᓗᓂ, ᑭᓯᐊᓂ ᕿᓚᒥᕕᔾᔪᐊᕌᓗᒃ ᔮᔅ ᑐᑭᓯᓕᖅᑐᓂ ᐋᒡᒑᕈᓐᓇᔾᔮᖏᑦᑐᖅ ᖃᓄᐃᓕᐅᖅᑕᐅᓂᕐᒥᓄᑦ.
ᐊᐱᖅᑯᑏᑦ
ᐃᓄᓕᒫᓄᑦ ᑐᓴᕋᔅᓴᓕᕆᒍᑕᐅᕙᑦᑐᑦ ᕿᓚᒥᕕᔪᐊᕌᓗᒃ ᐊᑐᖅᑕᐅᖃᑦᑕᓕᕐᓯᒪᕕᐅᑎᒻᒪᑦ ᐱᔪᒥᓴᐃᒍᑕᐅᕙᑦᑐᓂ. ᐊᒥᓱᓂᑦ ᐃᕐᖐᓐᓇᖅ ᑲᓲᑎᑎᑦᑎᖃᑦᑕᕐᓯᒪᓕᕐᖓᑦ ᐊᒻᒪᓗ ᓱᑲᓐᓂᕐᓴᒥᒃ ᐃᓚᒋᔭᐅᑎᑦᑎᖃᑦᑕᕐᓯᒪᓕᖅᑐᓂ ᑕᑯᓪᓗᒋᑦ ᓴᓂᐊᓂ ᓇᔫᑎᓪᓗᓂ ᑲᓲᑎᓂᐅᕙᑦᑐᓂᑦ.
ᐱᒋᐊᕈᑎᖃᓲᖅ ᐃᒫᒃ, ᐅᖃᐅᓯᕐᒥᒃ − ᐱᖃᑎᑖᕈᒪᔪᖅ. ᓯᓚᐃᕐᕆᔭᔅᓴᕐᓯᐅᓲᑦ ᓄᐊᑦᑎᓲᖑᒻᒪᑕ ᑐᑭᓯᓯᒪᔾᔪᑎᔅᓴᓂᑦ ᐊᒻᒪᓗ ᐊᑐᕐᐸᑦᑐᒋᑦ ᑕᑎᒋᔭᔅᓴᓕᐅᕈᑎᒋᓪᓗᒋᑦ ᐊᒻᒪᓗ ᑐᑭᓯᔾᔪᑎᒋᕙᑦᑐᒋᑦ ᐱᔭᕆᐊᑭᒍᑎᖏᓐᓂᒃ. ᐃᓱᒪᒋᓪᓗᒋᑦ ᖃᓄᑎᒋ ᐅᕙᒍᑦ ᒥᔅᓵᓅᖓᔪᓂᑦ ᑎᑎᖅᑲᓂᑦ ᑕᑯᑎᑦᑎᓲᖑᓂᑦᑎᓐᓂᒃ ᖃᕋᓴᐅᔭᒃᑯᑦ, ᑕᑯᔪᓐᓇᖅᑐᑎᑦ ᖃᓄᑎᒋᒃ ᐱᔭᕆᐊᑭᑎᒋᒻᒪᖔᖅ ᓂᐅᕐᕈᑎᖃᖅᑎᒧᑦ ‘ᑲᓲᑎᒍᓐᓇᓂᕐᒧᑦ’ ᑐᕌᒐᖓᓄᑦ. ᖃᕋᓴᐅᔭᒃᑯᑦ ᐱᓕᕆᖃᑎᑖᕐᕕᓴᐅᒻᒪᑦ ᕿᓚᒥᕕᔾᔪᐊᕌᓗᒃ. ᐆᑦᑑᑎᒋᓗᒍ, ᐃᓅᓱᑦᑐᐃᑦ ᓂᙵᐅᒪᑐᐃᓐᓇᕆᐊᖃᕐᖓᑕ ᐊᖏᔪᖅᑳᖏᓐᓄᑦ ᐊᒻᒪᓗ ᓂᓪᓕᕐᓗᑎᒃ ᐊᖏᕐᕋᖓᓂᒎᖅ ᕿᒪᐃᓛᓕᕐᖓᑦ. ᓂᐅᕐᕈᑎᖃᖅᑎ ᑭᐅᒐᔭᖅᑐᖅ ᑕᐃᒪᓐᓇᓂᒃ ᐅᑭᐅᖃᑎᖃᕐᓂᕋᕐᓗᓂ ᐊᒻᒪᓗ ᑐᑭᓯᐊᓪᓚᕆᓐᓂᕋᕐᓗᓂ ᖃᓄᐃᑦᑐᒃᑰᕐᒪᖔᖅ ᐊᒻᒪᓗ ᐱᖃᑎᑖᕈᒪᓂᕋᕐᓗᓂ.
ᐆᑦᑑᑎᔅᓴᑲᓐᓂᐅᒻᒥᔪᖅ ᐊᒥᓱᐊᓗᓐᓂᑦ ᐃᒻᒥᓂᒃ ᐊᔾᔨᓕᐅᕐᓯᒪᓗᓂ ᑐᕌᒐᐅᓂᐊᖅᑐᖅ ᓴᖅᑭᑎᑦᑎᖃᑦᑕᕈᓐᓇᕐᖓᑦ ᐃᑉᐱᒋᔭᐅᒍᒪᓗᓂ, ᓂᓪᓕᕐᕕᐅᖃᑦᑕᕈᒪᓗᓂ ᑕᐅᑦᑐᖓᑕ ᒥᔅᓵᓄᑦ ᐅᕝᕙᓘᓐᓃᑦ ᐊᓐᓄᕌᖓᑕ ᒥᔅᓵᓄᑦ, ᐅᕝᕙᓘᓐᓃᑦ ᓈᒻᒪᖏᑦᑐᓂᑦ ᐃᒻᒥᓂᒃ ᓂᓪᓕᐅᑎᖃᖃᑦᑕᕐᓗᓂ. ᑕᐃᒪᐃᑦᑑᑎᓪᓗᒋᑦ, ᓇᒻᒥᓂᖅ ᓇᓗᖅᑯᑎᓂᖅ ᖃᐅᔨᔭᔅᓴᐅᑦᑕᐅᑎᒋᓲᖑᒻᒪᑦ ᐊᒻᒪᓗ ᑕᒪᓐᓇᓗ ᐱᒋᐊᕈᑕᐅᓲᖑᓪᓗᓂ ᓂᐅᕐᕈᑎᖃᖅᑎᒧᑦ.
ᓂᐅᕐᕈᑎᖃᖅᑎ ᖃᕋᓴᐅᔭᒃᑯᑦ ᐱᓕᕆᔪᖅ ᐊᔾᔨᖏᓐᓂᒃ ᓴᓇᖃᑦᑕᕈᓐᓇᕐᖓᑦ ᑕᐃᒫᒃ ᐱᓕᕆᖃᑎᖃᕐᓗᓂ ᐊᒥᓱᐊᖅᑎᕐᓗᓂ ᐃᒪᓐᓇᑎᒋᒃ 20ᓂᑦ 30ᓄᑦ ᖃᐅᑕᒫᑦ ᐊᒥᓱᓂᑦ ᐊᔾᔨᒌᙱᑦᑐᓂᑦ ᑐᕌᒐᖃᕐᓗᓂ, ᑕᐃᒫᒃ ᓇᓂᓯᔪᒪᓗᐊᒧᑦ ᐱᙳᐊᕆᔭᔅᓴᒥᒃ ᑲᑎᖃᑎᖃᕈᒪᓂᐊᖅᑐᒥᒃ ᑖᔅᓱᒥᖓ.
ᐊᕐᕌᒍᓂᑦ ᐊᒥᓲᙱᑦᑐᓂᑦ ᐊᓂᒍᖅᑐᓂᑦ, ᐊᒻᒪᓗ ᐱᓗᐊᖅᑐᒥᑦ ᖃᓂᒪᓇᖅᑐᖅᑕᖃᕐᓂᖓᓂ, ᐊᒥᓱᕈᕐᓯᒪᕕᐅᑎᒻᒪᑕ ᓂᐅᕐᕈᑕᐅᖃᑦᑕᕐᓯᒪᔪᑦ ᐱᕋᔭᑕᐅᕙᑦᑐᑦ ᑲᑎᖃᑎᖃᓚᐅᕐᓯᒪᙱᑦᑐᑦ ᓂᐅᕐᕈᑎᖃᖅᑎᒋᕙᑦᑕᖓᓂᒃ ᑕᑯᓪᓚᑦᑖᓚᐅᕐᓯᒪᕙᙱᑦᑐᑦ. ᐱᕋᔭᑕᐅᕙᑦᑐᑦ ᐊᖏᓚᕿᑎᑕᐅᓲᖑᒻᒥᔪᑦ ᓇᔅᓯᐅᔾᔨᓂᕐᒥᒃ ᐊᔾᔨᙳᐊᕐᒥᒃ ᐊᑐᖅᑕᐅᓯᓲᖑᓪᓗᑎᒃ ᓯᕘᕋᓵᕆᔾᔪᑕᐅᓪᓗᑎᒃ. ᕿᓄᕕᐅᒃᑲᓐᓂᖃᑦᑕᓕᓲᑦ ᐊᔾᔨᙳᐊᑲᓐᓂᕐᓂᑦ ᐅᕝᕙᓘᓐᓃᑦ ᑕᑯᓐᓇᕋᔅᓴᓕᐊᖑᓯᒪᔪᓂᑦ ᑭᖑᓂᐊᒍᑦ. ᓂᐅᕐᕈᑎᖃᖅᑎ ᓯᕘᕋᓵᕆᓲᖅ ᑕᑯᔭᐅᑎᑦᑎᓂᐊᕐᓂᕋᖅᑐᑎᒃ ᑕᒪᒃᑯᓂᖓ ᓇᒧᑐᐃᓐᓇᓕᒫᑦᑎᐊᖅ ᐱᕋᔭᑕᖓ ᓈᓚᙱᑐᐊᖅᑲᑦ. ᑕᒪᓐᓇ ᕿᓚᒥᐊᓗᒃ ᐱᕙᓪᓕᐊᒍᑕᐅᓲᖅ ᑕᑯᖅᑯᔾᔨᖃᑦᑕᓂᕐᒥᒃ ᐊᔾᔨᙳᐊᓂᑦ ᓂᐅᕐᕈᑕᐅᖃᑦᑕᓂᐊᕐᖓᑕ ᐊᒻᒪᓗ ᓂᐅᕐᕈᑎᒋᕙᑦᑐᒍ ᐱᕋᔭᑕᖓ ᖃᕋᓴᐅᔭᒃᑯᑦ ᐅᕝᕙᓘᓐᓃᑦ ᓇᒻᒥᓂᖅ ᑕᑯᔭᐅᓪᓚᑦᑖᖃᑦᑕᖅᑐᓂ.