ᑭᙵᕐᓂᑦ ᐱᓯᒪᔪᓂᑦ ᓴᓇᐅᒐᖃᕐᕕᒃ ᐋᖅᑭᑦᑕᐅᓂᑯᒃ ᑐᕌᓐᑐᒥ 1978ᖑᑎᓪᓗᒍ ᓂᐅᕕᐊᖑᓯᒪᔪᓂᑦ ᓂᐅᕐᕈᑎᖃᕐᕕᐅᓪᓗᓂ ᐱᖓᓐᓇᖓᓂ ᕿᑭᖅᑖᓘᑉ ᐃᓄᓐᓄᑦ ᑯᐊᐸᒃᑯᑦ. ᑯᐊᐸᒃᑯᑦ ᑭᙵᕐᓃᑦᑐᑦ (ᑭᙵᐃᑦ), ᓄᓇᕗᒥ ᐊᒻᒪᓗ ᐊᔾᔨᒋᔭᐅᒐᓂ ᐅᑭᐅᖅᑕᖅᑐᒥ ᑯᐊᐸᐅᔪᓂᑦ ᑲᒪᒋᔭᖃᕐᓂᓴᐅᒻᒪᑕ ᓴᓇᐅᒐᕐᓂᑦ ᐊᒻᒪᓗ ᓴᓇᙳᐊᖅᑎᖏᓐᓂᒃ ᓄᓇᖓᓐᓂ. ᐊᕐᕌᒍᑕᒫᑦ ᑕᑯᔭᔅᓴᓂᑦ ᓄᐊᑕᐅᓯᒪᔪᓂᑦ ᑭᙵᕐᓂᑦ ᓴᖅᑭᑎᑦᑎᖃᑦᑕᕐᓯᒪᔪᓂᑦ ᐱᒋᐊᓚᐅᕐᓯᒪᓪᓗᑎᒃ 1959ᖑᑎᓪᓗᒍ ᐊᒻᒪᓗ ᑯᐊᐸᒃᑯᑦ ᑭᒡᒐᖅᑐᐃᕙᒻᒥᔪᑦ ᐊᒥᓱᓂᑦ ᖁᕕᐊᒋᔭᐅᓂᕐᐹᓂᑦ ᑎᑎᖅᑐᒐᖅᑎᓂᑦ.
ᑭᙵᕐᓂᑦ ᐱᓯᒪᔪᓂᑦ ᓴᓇᐅᒐᖃᕐᕕᒃ ᐋᖅᑭᑦᑕᐅᓂᑯᒃ ᓴᓇᖃᑦᑕᓂᐊᕐᖓᑕ ᐊᒻᒪᓗ ᓂᐅᕐᕈᑎᖃᖃᑦᑕᓂᐊᕐᖓᑕ ᐃᓄᓐᓄᑦ ᓴᓇᐅᒐᓕᐊᖑᓯᒪᔪᓂᑦ ᓴᓇᔭᐅᓯᒪᔪᓂᑦ ᐃᓚᒋᔭᐅᔪᓄᑦ ᑯᐊᐸᒃᑯᓐᓄᑦ. ᓂᐅᕐᕈᑕᐅᓲᑦ ᑕᑯᔅᓴᐅᑎᑕᐅᓲᖑᓪᓗᑎᓪᓗ ᑎᑎᖅᑐᒐᐃᑦ, ᑎᑎᕋᐅᔭᖅᑕᐅᓯᒪᔪᑦ ᐊᒻᒪᓗ ᓴᓇᐅᒐᐃᑦ ᑕᕝᕘᓇ ᑭᙵᕐᓂᑦ ᓴᓇᐅᒐᖃᕐᕕᑦᑎᒍᑦ ᑐᕌᓐᑐᒥ ᑕᑯᔭᒐᖃᕐᕕᓐᓄᑦ ᓇᒥᓕᒫᖅ ᓄᓇᕐᔪᐊᓕᒫᒥ.